Канон пред иконой Пресвятой Богородицы «Знамение»

Тропарь, глас 4-й

Яко необоримую стену и источник чудес стяжавше Тя раби Твои, Богородице Пречистая, сопротивных ополчения низлагаем. Темже молим Тя: мир граду Твоему даруй и душам нашим велию милость.

Канон

Глас 6-й

Песнь 1

Ирмос: Волною морскою Скрывшаго древле гонителя мучителя – под землею скрыша спасенных отроцы; но мы, яко отроковицы, Господеви поим, славно бо прославися.

Пресвятая Богородице, спаси нас.

Да радуется радостию Божественною множество Новаграда днесь, зряще теплую Заступницу, странну победу дарующу на противныя, и да поет Божественными песньми.

Слава: Якоже лествицу превысоку, зрим днесь икону Твою, Дево Всенепорочная, юже сопротивнии зряще, конечней слепоте предашася, мы же, к ней верне взирающе, от бед избавляемся.

И ныне: В Рождестве тли не приимши, тления всех нас, Дево, измени, печали уставляющи матерним пременением, Богорадованная.

Песнь 3

Ирмос: Тобою, Христе, Небеса утверждаема вся, Слово Божие и сила, исповедают славу неизреченну и вседетельныя руки Твоея сотворения, несть бо пресвят, разве Тебе, Господи.

Пресвятая Богородице, спаси нас.

Яко звери, устремившеся на стадо Твое, Пречистая, но Ты тех челюсти сокруши и сих немощны до конца показа.

Слава: Общаго Пастыря, Владыку Христа рождши, Дево неискусобрачная, Тому молися настоящаго гнева избавити нас и противных обстояния, Владычице.

И ныне: Милостивая, Милостиваго рождши Спаса, виждь озлобление и воздыхание людей Твоих, ускори, Пречистая, и ущедри ны.

Господи, помилуй (трижды). Слава, и ныне:

Седален, глас 8-й

Яже древле пророки проповедася, Дверь Небесная, Неопалимая Купина, Свещник Многосветлый, Златая Кадильница, Ручка и Жезл преславно днесь чудному святителю является, народом дерзати повелевает и дивную победу показует. Темже благодарная Той возопиим: Дево Богородительнице, моли Христа Бога грехов оставление даровати нам; Тебе бо имамы надежду, раби Твои.

Песнь 4

Ирмос: Удивися Твой разум от мене, услышавшу преславная веления смотрения Твоего, укрепися же возлюблением Твоего схождения, Ты бо моея нищеты не отверглся еси.

Пресвятая Богородице, спаси нас.

Почитающий Тя град, Пречистая, и по долгу славящий, ограждай от безбожных, Чистая, иноплеменник, Ты бо тому, Пречистая, богатство неотъемлемо еси, покров же и слава.

Слава: Мнящиися, якоже древле Иерихон, разорити град Твой, Пречистая Мати Слова, сами конечней погибели предашася силою из Тебе Воплощеннаго, Владычице.

И ныне: Призри, Чистая, спаси поющия Тя, потребитися хотяща от сопротивных, темже нашедшаго прещения избави, Богородительнице.

Песнь 5

Ирмос: Союзом любве связуеми, апостоли, владычествующему всеми себе Христу возложше, красны ноги очищаху, благовествующе всем мир.

Пресвятая Богородице, спаси нас.

Теплая заступница к Тебе прибегающим и ненадеющимся надежда, виждь озлобление людей Твоих и подаждь помощь, Пречистая.

Слава: Иже огнь рождшая Божественный, Дево, противных, Пречистая, молитвою Твоею огнем попали, яко Мати сущи Зиждителя, Всепетая.

И ныне: Чистая Богоневесто, недоуменныя люди ущедри матерними Твоими мольбами и яже на ны противных обстояния разори вскоре молитвами Твоими.

Песнь 6

Ирмос: Ят бысть, но не удержан в персех китовых Иона: Твой бо образ нося, Страдавшаго и погребению давшагося, яко от чертога, от зверя изыде. Приглашаше же кустодии: хранящии суетная и ложная, милость сию оставили есте.

Пресвятая Богородице, спаси нас.

Избави ратных нашествия рабы Твоя, Пречистая, и не предаждь до конца погибнути наследию Твоему, Всепетая, но силою из Тебе Рожденнаго противныя низложи.

Слава: Многосогрешших Тебе не презри, но приим мольбу Матере Твоея о нас, Щедре, да не похвалятся сопротивнии, – где есть Бог их? – глаголюще, но да разумеют вси, яко Ты, Избавитель, с нами еси.

И ныне: Ныне помощи прииде время, ныне пременения потреба, Чистая. Молися Сыну Твоему и Богу, яко да ущедрит согрешившия и належащаго гнева избавит.

Господи, помилуй (трижды). Слава, и ныне:
Кондак, глас 4-й

Честнаго образа Твоего знамение празднующе людие Твои, Богородительнице, имже дивную победу на сопротивныя граду Твоему даровала еси. Темже Тебе верою взываем: радуйся, Дево, христиан похвало.

Икос

Разреши тьму моих согрешений, во уме моем лежащую, и Твоим мя светом просвети, Дево, яко да возмогу Тебе похвалу принести, Юже Отец восхвали, и Дух Святый осени, Сын же и Слово Божие, вселився и нетленно от пречистою Твоею боку прошед, с человеки поживе. Темже мы, грешнии и недостойнии раби Твои, днесь совершающе священное торжество знамения, бывшаго честною иконою Твоею, еюже преславную победу на противныя граду Твоему даровала еси, и, от всех чудес исполнившеся, вместо благовонных аромат, елико возможно нам, земным, похвальная Тебе приносим, глаголюще: радуйся, Богородице, радосте Ангелов и человеков; радуйся, твердая надежда и покрове граду Твоему; радуйся, яко противныя силою Твоею низлагаем; радуйся, умнаго Солнца Мати, верныя просвещающаго, неверныя же помрачающаго; радуйся, Дево, христиан похвало.

Песнь 7

Ирмос: Неизреченное чудо: в пещи Избавивый преподобныя отроки из пламене во Гробе мертв, бездыханен полагается во спасение нас, поющих: Избавителю Боже, благословен еси.

Пресвятая Богородице, спаси нас.

Воистинну сокровище честно граду Твоему, икона Твоя, Пречистая, даровася, юже и сами зряще, чудеси удивляемся и Сыну Твоему вопием: Избавителю Боже, благословен еси.

Слава: Якоже иногда ниневитяны покаяния ради пощадил еси, Слове Божий, проповедию Ионы пророка, такожде и зде показал еси образом Пречистыя Твоея Матере, Христе, вопиющим: Избавителю Боже, благословен еси.

И ныне: Храм Тя Божий, Владычице, ведуще, во святем храме Твоем руки наша возносим на молитву: виждь озлобление наше и подаждь нам помощь.

Песнь 8

Ирмос: Ужаснися, бояйся, Небо, и да подвижатся основания земли: се бо в мертвецех вменяется в Вышних Живый и во Гроб мал странноприемлется. Егоже, отроцы, благословите, священницы, воспойте, людие, превозносите во вся веки.

Пресвятая Богородице, спаси нас.

Собезначальное Слово отчее, Дево Пречистая, нетленно родила еси и от сосцу питала еси. Того моли, Богородительнице, от обстояния вражия спасти поющия Тя и превозносящия во веки.

Слава: Егоже провиде на Престоле превзятем Исаия, Сего в ложеснах, Дево, вместила еси и нетленно родила еси. Егоже моли спастися рабом Твоим, поющим: дети, благословите, священнии, пойте и превозносите Его во веки.

И ныне: Едина сущи благая, преблагое Слово моли прилежно настоящаго гнева рабом Твоим избавитися, несомненною верою Сыну Твоему поющим: дети, благословите, священнии, пойте и превозносите Его во веки.

Песнь 9

Ирмос: Странствия Владычня и Безсмертныя Трапезы на Горнем месте высокими умы, вернии, приидите, насладимся, возшедша Слова, от Слова научившеся, Егоже величаем.

Пресвятая Богородице, спаси нас.

Милосердым оком свыше призри на град и люди Твоя, Пречистая, иныя бо помощи не имамы, токмо Тебе, Всенепорочная, да Тя вси, Матерь Божию, непрестанно величаем.

Слава: Едина, рождшая Слово воплощенное, Дево Всепетая, приснотекущий источник исцелений изливаеши верою притекающим храму Твоему, Пречистая.

И ныне: Се, раби Твои, вопием Ти, Мати Божия: обычныя милости Твоя на град и люди Твоя милостивно показующи, противных обстояний нас измени, да Тя вси непрестанно величаем.

Пресвятая Богородице, спаси нас!!!

Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем с верою притекающим к нему.

Кондак Божией Матери пред иконой Ее 'Знамение':
Честнаго образа Твоего знамение празднующе людие Твои, Богородительнице, имже дивную победу на сопротивныя граду Твоему даровала еси, темже Тебе верою взываем: радуйся, Дево, христиан похвало.