Кано́на два́. Творе́ние Иоа́нна Дамаски́на.
Пе́рвый свята́го апо́стола Петра́, гла́с 4.

Пе́снь 1.
Ирмос: Не́сть Тебе́ подо́бен, препросла́вленный Го́споди, руко́ю бо кре́пкою изба́вил еси́ лю́ди, я́же стяжа́л еси́, Человеколю́бче.

Припев: Апо́столи Христо́вы Пе́тре и Па́вле, моли́те Бо́га о нас.

Верхо́внейшаго апо́столов дне́сь, я́ко первозва́ннаго Христо́ва, богодохнове́нными пе́сньми досто́йно воспои́м.

Припев: Апо́столи Христо́вы Пе́тре и Па́вле, моли́те Бо́га о нас.

Тя́ предве́чный проуве́дев, предуста́ви, всеблаже́нне Пе́тре, я́ко предста́теля Своея́ Це́ркве и первопресто́льника.

Припев: Апо́столи Христо́вы Пе́тре и Па́вле, моли́те Бо́га о нас.

Ни пло́ть, ниже́ кро́вь тебе́, но Оте́ц вдохну́ Христа́ богосло́вити, Сы́на и́стиннаго Бо́га Вы́шняго, апо́столе.

Припев: Пресвятая Богородице, спаси нас.

Богородичен: Го́ру святу́ю, превы́шнее носи́ло, Ма́терь Бо́жию и Де́ву и́стинную по рождестве́ воспое́м.

Припев: Апо́столи Христо́вы Пе́тре и Па́вле, моли́те Бо́га о нас.

Якоже су́щая нарица́я не су́щая Христо́с боже́ственным ра́зумом, Па́вле всеблаже́нне, То́й из ма́терня чре́ва тя́ избра́ понести́ пред язы́ки боже́ственное Его́ и́мя, е́же па́че вся́каго и́мене: сла́вно бо просла́вися.

Припев: Апо́столи Христо́вы Пе́тре и Па́вле, моли́те Бо́га о нас.

Бу́дущее возвеща́я тебе́ сия́ние благоче́стия, Па́вле, и ле́сти очище́ние, Христо́с я́влься на горе́ молниезра́чен, о́чи у́бо помрача́ет плотски́я, душе́вныя же вразумля́ет Тро́ическим ра́зумом: сла́вно бо просла́вися.

Сла́ва Отцу́ и Сы́ну и Свято́му Ду́ху:

Обре́зание у́бо соверша́я осмодне́вное и ревни́тель оте́ческих, Па́вле, преда́ний, от се́мене евре́йска, коле́на Вениами́нова, по зако́ну же фарисе́й я́влься, вмени́л еси́ вся́ уме́ты и Христа́ приобре́л еси́: сла́вно бо просла́вися.

И ны́не и при́сно и во ве́ки веко́в. Ами́нь.

Богородичен: Чи́стая Ма́ти Бо́га Вседержи́теля, от ца́рскаго коле́на, Влады́чице, изра́стши и еди́на Бо́га, все́ми ца́рствующаго, ро́ждшая пло́тию па́че естества́, от бе́д мя́ спаси́, Сы́ну Твоему́ пою́ща: сла́вно бо просла́вися.

Пе́снь 3.

Ирмос: Не му́дростию, и си́лою, и бога́тством хва́лимся, но Тобо́ю, Отчею Ипоста́сною Му́дростию, Христе́: не́сть бо свя́т, па́че Тебе́, Человеколю́бие.

Припев: Апо́столи Христо́вы Пе́тре и Па́вле, моли́те Бо́га о нас.

Тя́, блаже́нна, сла́дкая уста́ Христа́ Бо́га и сокро́вище тве́рдо Ца́рствия показа́ша, те́мже воспева́ем тя́, Пе́тре апо́столе.

Припев: Апо́столи Христо́вы Пе́тре и Па́вле, моли́те Бо́га о нас.

На ка́мени твоего́ богосло́вия водрузи́ Влады́ка Иису́с Це́рковь непрекло́нну, в не́йже тя́, апо́столе Пе́тре, сла́вим.

Припев: Апо́столи Христо́вы Пе́тре и Па́вле, моли́те Бо́га о нас.

Яко пребо́льши Ангел, Пе́тр в телеси́: во све́тлом бо прише́ствии сего́ Христо́с Бо́г судию́ же и соседа́теля бы́ти рече́.

Припев: Пресвятая Богородице, спаси нас.

Богородичен: Неискусобра́чная, Бо́га пло́тию ро́ждшая, страстны́ми прило́ги преклоне́нна мя́ утверди́: не́сть бо, Чи́стая, ра́зве Тебе́, помо́щницы.

Припев: Апо́столи Христо́вы Пе́тре и Па́вле, моли́те Бо́га о нас.

Ты́ ка́мень основа́ния ве́рным душа́м положи́лся еси́ многоце́нен, краеуго́лен Спа́са и Го́спода.

Припев: Апо́столи Христо́вы Пе́тре и Па́вле, моли́те Бо́га о нас.

Па́вле всеблаже́нне, на основа́нии твое́м, моли́ся, доброде́телей всехва́льных назда́тися све́тлости.

Сла́ва Отцу́ и Сы́ну и Свято́му Ду́ху:

Всегда́ ме́ртвость Иису́сову на твое́м те́ле соверше́нно, Па́вле, обнося́й, сподо́бился еси́ и́стинныя жи́зни.

И ны́не и при́сно и во ве́ки веко́в. Ами́нь.

Богородичен: Тя́ вси́ стяжа́хом прибе́жище и сте́ну на́шу, христиа́не, Тя́ славосло́вим немо́лчно, Безневе́стная.

Ипакои́, гла́с 8:

Ка́я темни́ца не име́ тебе́ ю́зника? Ка́я же Це́рковь не и́мать тя́ вити́ю? Дама́ск великому́дрствует о тебе́, Па́вле, ве́де бо тя́ запя́та све́том; Ри́м, твою́ кро́вь прие́мый, и то́й хва́лится; но и Та́рс мно́жае ра́дуется и лю́бит, почита́я твои́ пелены́. Пе́тре, ве́ры ка́меню, Па́вле, похвало́ вселе́нныя, от Ри́ма соше́дшеся, утверди́те на́с.

Пе́снь 4.

Ирмос: Се́й Бо́г на́ш, от Де́вы вопло́щся и естество́ обожи́в, Его́же воспева́юще, вопие́м: сла́ва си́ле Твое́й, Го́споди.

Припев: Апо́столи Христо́вы Пе́тре и Па́вле, моли́те Бо́га о нас.

Челове́ком ловца́ тя́, я́коже обеща́ Христо́с, соде́ла боже́ственна Своея́ Це́ркве, пе́рвому вручи́в корми́ла.

Припев: Апо́столи Христо́вы Пе́тре и Па́вле, моли́те Бо́га о нас.

Тобо́ю умоля́емь Жизнода́вец Иису́с, вяза́ти же и реши́ти да́вый тебе́ вла́сть, Пе́тре, да бу́дет ми́ ми́лостив.

Припев: Апо́столи Христо́вы Пе́тре и Па́вле, моли́те Бо́га о нас.

Христо́во Ца́рствие отве́рсти приле́жно моли́ся, Пе́тре, боже́ственную твою́ па́мять ве́рою несумне́нною чту́щим.

Припев: Пресвятая Богородице, спаси нас.

Богородичен: Госпоже́ Всепе́тая, Богороди́тельнице, моя́ помышле́ния Твои́ми моли́твами очи́стивши, покажи́ мя благопло́дна, Ма́ти все́х Бо́га.

Припев: Апо́столи Христо́вы Пе́тре и Па́вле, моли́те Бо́га о нас.

Все́де, я́коже ле́в, ярови́дно погубля́я Христо́ву Це́рковь, Са́вл иногда́, я́т же бы́в Боже́ственным гла́сом Агнца Бо́жия, Его́же гоня́ше, ста́до я́ко па́стырю вруча́ет.

Припев: Апо́столи Христо́вы Пе́тре и Па́вле, моли́те Бо́га о нас.

Хотя́й просвети́ти вселе́нную омрача́ется, Ана́ния же к сему́ посла́ся, душе́вное же просвеще́ние дая́й и теле́сное от Боже́ственнаго явле́ния, сосу́д избра́н показа́в того́.

Сла́ва Отцу́ и Сы́ну и Свято́му Ду́ху:

Па́влом досто́йно Дама́ск напоя́ется: от сего́ бо, я́коже от рая́ иногда́, во́д боже́ственных се́й произы́де вели́кий исто́чник и упои́ всю́ богоразу́мием незави́стно зе́млю.

И ны́не и при́сно и во ве́ки веко́в. Ами́нь.

Богородичен: Низложи́ си́льныя со престо́л Госпо́дь, Де́ва и Ма́ти я́коже рече́, а́лчущия же боже́ственных бла́г испо́лни, ве́рою зову́щия: сла́ва си́ле Твое́й, Го́споди.

Пе́снь 5

Ирмос: Стяжа́вый ны́, избра́нныя лю́ди, кро́вию Твое́ю, Го́споди, Тво́й ми́р да́ждь на́м, во единомы́слии сохраня́я ста́до Твое́.

Припев: Апо́столи Христо́вы Пе́тре и Па́вле, моли́те Бо́га о нас.

Иже от любве́ прии́м дерзнове́ние к Бо́гу, досто́йно чуди́мь быва́ше, лове́ц и неве́жда, чудоде́йствуя пресла́вно благода́тию.

Припев: Апо́столи Христо́вы Пе́тре и Па́вле, моли́те Бо́га о нас.

Не зла́то Тебе́ ра́ди, ни сребро́, Христе́, боже́ственный Тво́й апо́стол, но доброде́тель стяжа́в, чуде́с обогати́ся си́лою.

Припев: Апо́столи Христо́вы Пе́тре и Па́вле, моли́те Бо́га о нас.

Исправля́хуся стопы́ и гле́зне хромы́х, де́йственным твои́м глаго́лом: Боже́ственным бо Ду́хом соверша́хуся пресла́вныя ве́щи.

Припев: Пресвятая Богородице, спаси нас.

Богородичен: Воплоти́ся Бо́г по Ипоста́си, Чи́стая, из Тебе́ пло́тию соединя́емь, пребы́в неизме́нен, по Боже́ственному существу́ безпло́тен.

Припев: Апо́столи Христо́вы Пе́тре и Па́вле, моли́те Бо́га о нас.

Ты́ и́стинную избра́л еси́, Па́вле, похвалу́, Кре́ст Царя́ Христа́ при́сно нося́, я́коже побе́ду, апо́столе.

Припев: Апо́столи Христо́вы Пе́тре и Па́вле, моли́те Бо́га о нас.

Тебе́ е́же жи́ти, Христо́с, и е́же умре́ти, приобре́тение изря́дно: любо́вию бо сраспя́лся еси́ Распе́ншемуся на́с ра́ди, Па́вле пресла́вне.

Сла́ва Отцу́ и Сы́ну и Свято́му Ду́ху:

Ра́дуешися вои́стинну о Го́споде, Па́вле честны́й, изше́д из телесе́ и отше́д ко Христу́, Жизнода́вцу Бо́гу.

И ны́не и при́сно и во ве́ки веко́в. Ами́нь.

Богородичен: Моли́ при́сно Сы́на Твоего́ и Бо́га на́шего, Неискусобра́чная Мари́е Чи́стая, посла́ти на́м, ве́рным, ми́лость.

Песнь 6

Ирмос: В ки́те, Христе́, тридне́вновав, Ио́на прописа́ Тя, Безсме́ртнаго, я́ко ме́ртва во́лею в се́рдце земне́м тридне́вновавша.

Припев: Апо́столи Христо́вы Пе́тре и Па́вле, моли́те Бо́га о нас.

Якоже дре́вле, Христе́, десни́цею Твое́ю по воде́ пе́ша ходя́ща Петра́ спа́сл еси́, и мене́, потопля́ема бу́рею лю́тых напа́стей, спаси́, я́ко Милосе́рд.

Припев: Апо́столи Христо́вы Пе́тре и Па́вле, моли́те Бо́га о нас.

Оста́вил еси́, о Пе́тре, не су́щая, и су́щая дости́гл еси́, я́коже не́кий купе́ц, и я́ве улови́л еси́ би́сер, Христа́, многоце́нный.

Припев: Апо́столи Христо́вы Пе́тре и Па́вле, моли́те Бо́га о нас.

Искуша́ти безу́мно покуси́вшияся Ду́ха Пресвята́го, Пе́тре, умертви́л еси́: Его́же богосло́вил еси́ ты́ пе́рвее, я́ве испове́дав Бо́га, всеблаже́нне.

Припев: Пресвятая Богородице, спаси нас.

Богородичен: Вся́каго вы́шша существа́ Сло́во Бо́жие родила́ еси́, воплоще́нно на́м, те́мже Богоро́дицу Тя́ устна́ми же и душе́ю пропове́дуем.

Припев: Апо́столи Христо́вы Пе́тре и Па́вле, моли́те Бо́га о нас.

Вся́ пренебре́г кра́сная ми́ра, уя́звлен Влады́чнею любо́вию и о́бщаго спасе́ния жела́нием, свиде́тельствовати тому́ изво́лив, о Па́вле блаже́нне, и ны́не о вселе́нней моли́ся.

Припев: Апо́столи Христо́вы Пе́тре и Па́вле, моли́те Бо́га о нас.

Яко изря́дный Влады́це подо́бник и в Того́ оде́ян, Па́вле, вои́стинну все́м бы́л еси́ вся́к, да вся́ приобря́щеши и спасе́ши лю́ди, и спа́сл еси́ я́ко вои́стинну, Христу́ улови́в концы́.

Сла́ва Отцу́ и Сы́ну и Свято́му Ду́ху:

Досто́йно тебе́ дарова́ Христо́с житие́, апо́столе Па́вле, на небесе́х: пребыва́ющаго бо зде́ не возжела́л еси́ гра́да, блаже́нне, ве́рен служи́тель бы́в и строи́тель та́ин Его́.

И ны́не и при́сно и во ве́ки веко́в. Ами́нь.

Богородичен: Призре́ на Тя́ Госпо́дь, мое́ обновля́я существо́, я́ко Си́лен, вели́чия сотво́рь, Богороди́тельнице, я́коже рекла́ еси́, Всенепоро́чная, и спасе́ мя Тобо́ю из тли́ Бо́г мо́й, я́ко Милосе́рд.

Конда́к, гла́с 2:
Тве́рдыя и боговеща́нныя пропове́датели, ве́рх апо́столов Твои́х, Го́споди, прия́л еси́ в наслажде́ние благи́х Твои́х и поко́й: боле́зни бо о́нех и сме́рть прия́л еси́ па́че вся́каго всепло́дия, Еди́не, све́дый серде́чная.

Икос:
Уясни́ мо́й язы́к, Спа́се мо́й, разшири́в моя́ уста́ и испо́лнив я́, умили́ се́рдце мое́, да, я́же глаго́лю, после́дую и, я́же у́бо учу́, сотворю́ пе́рвее: вся́к бо творя́ и уча́, рече́, се́й вели́к е́сть. Аще бо глаго́лю, и не творю́, я́ко ме́дь звеня́щая вменю́ся; те́мже рещи́ ми подо́бная и твори́ти поле́зная да́руй, Еди́не, све́дый серде́чная.

Пе́снь 7.

Ирмос: В нача́ле Безнача́льное Сло́во, со Отце́м и Ду́хом, Сы́н Единоро́дный, благослове́н еси́, и превозноси́мый Бо́же оте́ц на́ших.

Припев: Апо́столи Христо́вы Пе́тре и Па́вле, моли́те Бо́га о нас.

Ми́лостивному, Боже́ственным про́мыслом Христо́вым наказу́емь, подо́битися попуще́н бы́л еси́, пре́жде стра́сти, Пе́тре, отверже́ния подпа́сти волне́нию.

Припев: Апо́столи Христо́вы Пе́тре и Па́вле, моли́те Бо́га о нас.

Тебе́ Христо́с, первозва́нному и зело́ возлю́бленному, я́ко председа́телю благосла́вну апо́столов, пе́рвому явля́ется, воскре́с от гро́ба.

Припев: Апо́столи Христо́вы Пе́тре и Па́вле, моли́те Бо́га о нас.

Твое́ трикра́тное, е́же пре́жде стра́сти, исцеля́я отверже́ние, Влады́ка трикра́тным боговеща́нным, Пе́тре, вопроше́нием утвержда́ет любо́вь.

Припев: Апо́столи Христо́вы Пе́тре и Па́вле, моли́те Бо́га о нас.

Еже ко Христу́, Пе́тре, любле́ния, предлага́л еси́ свиде́теля и Всеви́дящаго я́ко Бо́га Сло́ва, те́мже и люби́мое вруча́ет тебе́ ста́до.

Припев: Пресвятая Богородице, спаси нас.

Богородичен: Яже во утро́бе Преве́чнаго, от Отца́ возсия́вша Бо́га Сло́ва пло́тию заче́ншую, вси́ ублажа́ем, я́ко Ма́терь все́х Бо́га.

Припев: Апо́столи Христо́вы Пе́тре и Па́вле, моли́те Бо́га о нас.

Бы́сть, Христе́, печа́ть и вене́ц апо́столов Твои́х, и́же напосле́док зва́нный време́н, тща́нием же все́х превозше́д, с ни́мже лю́дие церко́внии пою́т Тебе́: оте́ц на́ших Бо́же, благослове́н еси́.

Припев: Апо́столи Христо́вы Пе́тре и Па́вле, моли́те Бо́га о нас.

Аще и гони́в пе́рвее Це́рковь Твою́ Па́вел у́зник, но премину́ дре́внюю де́рзость Твое́ю ре́вностию последи́. Собра́ бо, Христе́, язы́ки, зову́щия: оте́ц на́ших Бо́же, благослове́н еси́.

Припев: Апо́столи Христо́вы Пе́тре и Па́вле, моли́те Бо́га о нас.

Ты́ из Иерусали́ма пропове́дав все́м Ева́нгелие, объя́т же о́крест всю́ зе́млю, Па́вле, да́же до коне́ц Иллири́ка, уча́, взыва́л еси́: оте́ц на́ших Бо́же, благослове́н еси́.

Сла́ва Отцу́ и Сы́ну и Свято́му Ду́ху:

Во у́жасе взя́т бы́в, тре́тие дости́гл еси́ не́бо, пребога́те, и, услы́шав неизглаго́ланная словеса́, вопие́ши: сла́ва превы́шнему Отцу́ и Сы́ну, сия́ние же сопресто́льно испыта́ющаго я́ве Ду́ха Бо́жия глубины́.

И ны́не и при́сно и во ве́ки веко́в. Ами́нь.

Богородичен: Якоже на руно́ до́ждь, на Тя́ сни́де, Де́во, Христо́с Бо́г, и Плотоно́сец из Тебе́ про́йде, соединя́я пре́жде разстоя́щая, ми́р на земли́ и на небеси́ да́руя: оте́ц на́ших Бо́же, благослове́н еси́.

Пе́снь 8.

Ирмос: Вся́ческая нося́й непристу́пною Твое́ю си́лою, Христе́, преподо́бныя Твоя́ о́троки в пла́мени ороси́л еси́, зову́щия: благослови́те, вся́ дела́ Госпо́дня, Го́спода.

Припев: Апо́столи Христо́вы Пе́тре и Па́вле, моли́те Бо́га о нас.

Возде́жут твои́ ру́це и ко кресту́ тя препоя́шут, — Влады́ка предре́к, Пе́тре, повелева́ет после́довати зову́щу: благослови́те, вся́ дела́ Госпо́дня, Го́спода.

Припев: Апо́столи Христо́вы Пе́тре и Па́вле, моли́те Бо́га о нас.

Благода́ти сло́вом Ене́я, у́бо разсла́бленна лю́те, Тави́фу же уме́ршую, чудоде́йствуя, воскреси́л еси́, зову́щия: благослови́те, вся́ дела́ Госпо́дня, Го́спода.

Припев: Апо́столи Христо́вы Пе́тре и Па́вле, моли́те Бо́га о нас.

Иже Петру́ язы́ки очище́ны пове́дав, Христе́, духо́вною заре́ю и мне́ помышле́ния очи́сти, зову́щу: благослови́те, вся́ дела́ Госпо́дня, Го́спода.

Припев: Пресвятая Богородице, спаси нас.

Богородичен: Всесвята́я Де́во, Яже Бо́га Сло́ва ро́ждшая пло́тию, души́ моея́ мра́к Твои́ми моли́твами отгна́вши, просвети́, взыва́юща: благослови́те, вся́ дела́ Госпо́дня, Го́спода.

Припев: Апо́столи Христо́вы Пе́тре и Па́вле, моли́те Бо́га о нас.

Сраствори́ся любо́вию Твое́ю Па́вел, до́брым же измене́нием изступи́: не себе́ бо живя́ше сла́вный, имя́ше же, Ще́дре, живу́ща Тя́ в себе́ во вся́ ве́ки.

Припев: Апо́столи Христо́вы Пе́тре и Па́вле, моли́те Бо́га о нас.

Ты́ обручи́л еси́, я́коже неве́сту, предста́вити Жениху́ Христу́ Це́рковь: невестово́ждь бо сея́ показа́лся еси́, Па́вле богоно́се. Те́мже тя́ сла́вит во вся́ ве́ки.

Сла́ва Отцу́ и Сы́ну и Свято́му Ду́ху:

Подвиза́лся еси́ до́брым по́двигом и, сконча́в тече́ние твое́ зако́нно, сокро́вище ве́ры соблю́л еси́. Те́мже венце́в, Па́вле, сподо́бился еси́ пра́вды.

И ны́не и при́сно и во ве́ки веко́в. Ами́нь.

Богородичен: Ра́дуйся, престо́ле огнезра́чный Госпо́день; ра́дуйся, Неве́сто неневе́стная, Де́во; ра́дуйся, о́блаче, Со́лнца возсия́вшая пра́вды, Его́же превозно́сим во вся́ ве́ки.

Песнь 9

Ирмос: Тя́, пресла́вную Неве́сту и Всесвяту́ю Богоро́дицу, Зижди́теля ро́ждшую неви́димых же и все́х ви́димых, пе́сньми велича́ем.

Припев: Апо́столи Христо́вы Пе́тре и Па́вле, моли́те Бо́га о нас.

Твоя́ преизя́щная благода́ть сла́вится досто́йно, се́ни бо твое́й стра́сти немощны́х, Пе́тре, отгоня́ющей, те́мже тя́ велича́ем.

Припев: Апо́столи Христо́вы Пе́тре и Па́вле, моли́те Бо́га о нас.

Мечта́ньми Си́мона волхва́ богобо́рца взя́та к возду́шней высоте́, низложи́в неизглаго́ланною Боже́ственною си́лою, Пе́тр ублажа́ется.

Припев: Апо́столи Христо́вы Пе́тре и Па́вле, моли́те Бо́га о нас.

Согреше́ний разреше́ние моли́твами твои́ми пода́ждь, просвеще́ние же се́рдца и весе́лие ду́ха пою́щим па́мять твою́, апо́столе.

Припев: Апо́столи Христо́вы Пе́тре и Па́вле, моли́те Бо́га о нас.

Твоя́ вся́ испо́лнена сла́вы, освяще́ния же и чуде́с: словеса́, мо́щи, пе́рсть и ве́рою, Пе́тре, покланя́емыя и любо́вию боже́ственныя вери́ги.

Припев: Пресвятая Богородице, спаси нас.

Богородичен: Твое́ и́мя Пло́д чре́ва соде́я лико́вника пе́снь пе́ти Тебе́, Яже ра́дость ро́ждши, велегла́сно — ра́дуйся — провещава́юща.

Припев: Апо́столи Христо́вы Пе́тре и Па́вле, моли́те Бо́га о нас.

Твои́м покланя́емся вери́гам, я́же за Христа́, я́ко злоде́й, носи́л еси́, я́звы же, Па́вле, облобыза́ем, я́же на сла́внем твое́м и победоно́снем но́сиши телеси́.

Припев: Апо́столи Христо́вы Пе́тре и Па́вле, моли́те Бо́га о нас.

Ны́не разреши́лся еси́, апо́столе, ко Иже тобо́ю непреста́нно Жела́емому, с Ни́мже я́ко служи́тель водворя́яся, непреста́нными мольба́ми твоя́ рабы́ к себе́ привлецы́.

Сла́ва Отцу́ и Сы́ну и Свято́му Ду́ху:

Ны́не ника́коже в гада́ниих, ниже́ в зерца́ле Христо́с тебе́ зри́мь е́сть, лице́м же па́че зри́тся к лицу́, соверше́нне тебе́ ра́зум открыва́я Божества́.

И ны́не и при́сно и во ве́ки веко́в. Ами́нь.

Богородичен: Ты́, Пресвята́я Богома́ти, похвала́ Христо́вых апо́столов была́ еси́, му́чеников же сла́ва и проро́ков основа́ние. Те́мже, ве́рнии, Тя́ вси́ достодо́лжно велича́ем.

Свети́лен.
Апо́столов вси́ ве́рх воспое́м, Петра́ и Па́вла боже́ственныя, вселе́нныя свети́льники, пропове́дники ве́ры, богосло́вныя трубы́, уче́ний сказа́тели, церко́вныя столпы́ и разори́тели ле́сти.

Сла́ва, и ны́не, Богородичен:

Вели́ко и пресла́вно рождества́ Твоего́ та́инство, Богора́дованная Отрокови́це и Богома́ти Де́во, проро́цы пропове́даша, апо́столи научи́ша, му́ченицы испове́даша, Ангели же воспева́ют и челове́цы покланя́ются.

Моли́тва

О пресла́внии апо́столи Пе́тре и Па́вле, ду́ши за Христа́ преда́вшии и кро́вию ва́шею па́жить Его́ удобри́вшии! Услы́шите чад ва́ших моли́твы и воздыха́ния, се́рдцем сокруше́нным ны́не приноси́мыя. Се бо беззако́ньми омрачи́хомся и того́ ра́ди беда́ми, я́коже ту́чами, обложи́хомся, еле́я же до́браго жития́ обнища́хом зело́. О си́льнии! Понеси́те не́мощи на́ша, не отлуча́йтеся ду́хом от нас, да не разлучи́мся вконе́ц от любве́ Бо́жия, но кре́пким заступле́нием ва́шим нас защити́те, да помилует Госпо́дь всех нас моли́тв ва́ших ра́ди, да истреби́т же рукописа́ние безме́рных грехо́в на́ших и да сподо́бит со все́ми святы́ми блаже́ннаго Ца́рствия и бра́ка А́гнца Своего́, Ему́же честь, и сла́ва, и благодаре́ние, и поклонение во ве́ки веко́в. Ами́нь.