Богослужебные тексты, службы (видео и текст)
» Канон Пресвятой Богородице, поемый в безнадежии
к Дискуссиям
|
Канон Владычице нашей Пресвятей Богородице, поемый в безнадежии Глас 8-й Песнь 1 Ирмос: Воду прошед яко сушу и египетскаго зла избежав, израильтянин вопияше: Избавителю и Богу нашему поим. Пресвятая Богородице, спаси нас! Ты еси, Владычице, неоскудный источник милости, сего ради молю Тя, хотя каплю едину милости Твоея укани в изсохшее грехом сердце мое. Пресвятая Богородице, спаси нас! Пристанище сущим в бедах Ты, Владычице; от бед всяческих избави мя, молю Тя. Слава Отцу и Сыну и Святому Духу: В молитвах неусыпающая Богородице, облегчение Твоя молитва есть всем, грехами обремененным. Облегчи бремя тяжкое, греховное души моея страстныя, молюся. И ныне и присно, и во веки веков. Аминь. Пречистая, Преблагословенная, вем Тя страстей отгнание, грехов разрешение и всяческих болезней исцеление, темже и припадаю Ти, моляся: болезни моя исцели, грехи прости, страсти моя вся искорени. Песнь 3 Ирмос: Небеснаго круга Верхотворче Господи и Церкве Зиждителю, Ты мене утверди в любви Твоей, желаний краю, верных утверждение, едине Человеколюбче. Пресвятая Богородице, спаси нас! Ты еси, Пречистая, земнородным всем помощь, покров и прибежище. О, Владычице, темже и молю Тя: покрый, соблюди мя от всякаго зла и помощь Твою низпосли ми, безпомощному грешнику Пресвятая Богородице, спаси нас! Мнози мытари, блудницы и грешницы от уз страстей своих и прегрешений свободу улучиша Тобою, Богородице Дево. Разреши, молю Тя, Пречистая, узы и моих бесчисленных согрешений. Слава Отцу и Сыну и Святому Духу: Воистину Тя Матерь Божию и Деву Пренепорочную православно исповедую, Богоневесто, Зиждителя бо и Господа родила еси, Девою пребыла еси едина. От дел ми несть спасения, Владычице, вместо дел вмени мне исповедание сие православное. И ныне и присно, и во веки веков. Аминь. Тишина Ты еси, Богородице, Божественная, беззаконий моих лютыя потоки и сердца моего свирепыя бури и волны тишиною Твоею укроти, утиши, Преблагословенная. Песнь 4 Ирмос: Услышах, Господи, смотрения Твоего таинство, разумех дела Твоя и прославих Твое Божество. Пресвятая Богородице, спаси нас! Честнейшая Херувим и Славнейшая без сравнения Серафим, много может ходатайство Твое пред Сыном Твоим и Богом: темже молю Тя, да ходатайствуеши к Рождшемуся от Тебе о мне, непотребном рабе Твоем. О, Владычице мира, буди мне ходатаица. Пресвятая Богородице, спаси нас! Храм Тя Божий вем, Богородице, невместимаго Бога вместивый, сего ради молю Тя: бывша мя вертеп разбойников и всякой нечистоты вместилище, храм Божий соделай. Слава Отцу и Сыну и Святому Духу: Одевающаго небо облаки, безсеменно рождшая Мати браконеискусная, ризу мне подаждь светлу, тьмою страстей омраченному. И ныне и присно, и во веки веков. Аминь. «Радуйся, Благодатная!» — великий Гавриил Тебе с небесе провозгласи, Дево Мати Марие. Темже радости исполни мое сердце, ядом горчайшим змииным преогорченное. Песнь 5 Ирмос: Просвети нас повелении Твоими, Господи, и мышцею Твоею Высокою Твой мир подаждь нам, Человеколюбче. Пресвятая Богородице, спаси нас! О, Дево, Мати Пречистая, в недоведомом Рождестве Твоем Сына Божия милость и истина сретостеся, правда и мир облобызастася; сего ради молю Тя, Владычице, милость Сына Твоего излей на страстную мою душу. Пресвятая Богородице, спаси нас! Истиною Истины вечныя лукавое сердце мое исправи, правдою превечнаго Бога ко страху Божию пригвозди мя всего и миром тишайшим Сладчайшаго Иисуса сердце мое умири. Пресвятая Богородице, спаси нас! Низпосли Божественный свет рабу Твоему, во тьме греховней сущему, Светоносная Сене Небесная Неискусобрачная, рождшая Бога, изведшаго свет от тьмы, Чистая. Слава Отцу и Сыну и Святому Духу: Моление теплое, Богородице, молитвы Твоя яко кадило благовонное к Богу всяческих восходят: темже злосмрадие греховное благоуханием молитв Твоих от души моея отжени, молюся Ти И ныне и присно, и во веки веков. Аминь. Избавление нам родила еси без Семене, Христа Спасителя, Пречистая: от вечныя погибели спаси мя, Владычице, от вечнаго пламене избави мя, Милосердная Мати. Песнь 6 Ирмос: Молитву пролию ко Господу и Тому возвещу печали моя, яко зол душа моя исполнися и живот мой аду приближися, и молюся, яко Иона: от тли, Боже, возведи мя. Пресвятая Богородице, спаси нас! За премножество нечистоты моея не отрини мене, Пречистая, за премножество скверны моея не лиши мя покрова Своего небеснаго, едина Нескверная. Пресвятая Богородице, спаси нас! Буди ми, Владычице, заблуждшему Путеводительница, потемненному страстьми — свет, умерщвленному грехом — жизнь. Слава Отцу и Сыну и Святому Духу: Оком милостивым призри на мя, Всемилостивая, взирающаго со страхом, и радостию, и надеждою на образ Твой пресвятый: виждь неисцельныя язвы души моея и исцели я. И ныне и присно, и во веки веков. Аминь. О, Богородице, Мати Света, да будет Евангелие Сына Твоего светильник ногама моима, свет стезям моим да будут заповеди Его вечныя. Песнь 7 Ирмос: От Иудеи дошедше отроцы, в Вавилоне иногда верою Троическою пламень пещный попраша, поюще: отцев Боже, благословен еси. Пресвятая Богородице, спаси нас! Мати неизследимыя Божия Мудрости Христа, умудри мя, молю Тя, да присно ум мой богомыслием спасительным преисполняется. Пресвятая Богородице, спаси нас! Благость Твою, Владычице, молю: и еще потерпи на мне, потерпи неисправность мою и Сама благодатию Твоею помози ми положити начало благое. Слава Отцу и Сыну и Святому Духу: Падый, Владычице моя Богородице, падением лютым, ниц лежу аз, возстави мя падшаго, Возстание наше рождшая. И ныне и присно, и во веки веков. Аминь. Грех содевая, Владычице, не стыдяхся, ныне же в чувство пришед и наготу свою зря, стыждуся; покрый мя, обнаженнаго, молюся, покровом Твоим, грешников кающихся от вечнаго срама покрывающая. Песнь 8 Ирмос: Царя Небеснаго, Егоже поют вои Ангельстии, хвалите и превозносите во вся веки. Пресвятая Богородице, спаси нас! Владычице моя, благ всяких Подательнице, даруй мне едино высочайшее благо, еже Сына Твоего и Тебе всегда пред собою предзрети, в страсе Божием пожити, пред Богом ходити и тако непорочну быти. Пресвятая Богородице, спаси нас! Неизглаголанно, Чистая, млеком питала еси Дающаго пищу всякой плоти: Егоже убо моли, да даст ми, алчущему, достойно вкушати пищи вечныя Плоти Его, моли, да не в суд ми будет, жаждущему, питие вечное. Кровь Его Пречистая, Честная. Слава Отцу и Сыну и Святому Духу: Тебе припадаю, Благая, духовно ногам Твоим пречистым касаяся, от сердца всего молюся: помилуй мя, Владычице, коснися десницею Твоею всеисцеляющею души моея болящия, да исцелеет. И ныне и присно, и во веки веков. Аминь. Чистая Агнице, Дево Мати, Отроковице чистая, соделай мя чиста от страстей телесных, да чистым сердцем узрю в себе Сына Твоего и Бога. Песнь 9 Ирмос: Воистину Богородицу Тебя исповедуем, спасеннии Тобою, Дево Чистая, с безплотными лики Тя величающе. Пресвятая Богородице, спаси нас! Надеждо моя, Богородице, крепко надеюся на Тя аз окаянный, яко взирая с молитвою и верою на образ Твой пречистый, никогдаже погибну, но спасуся всенепременно. Пресвятая Богородице, спаси нас! Разслабленным Ты еси сила, Владычице, болящим исцеление, мертвым оживление. Всем вся Ты еси, Пречистая; буди и мне, нищему, богатство, слава, сокровище, жизнь, едина радость, помощь, заступление, свет, сила, крепость, ограда, утешение, вся подавающая мне, Благая, еже к животу моему и благочестию. Слава Отцу и Сыну и Святому Духу: Твой Божественный видя образ, Владычице, зрю в нем Тя, якоже яве мне присутствующую, сего ради, ненавидя безумие еретиков на земли, отвергающих почитание честнаго образа Твоего, покланяюся святейшему зраку Твоему. И ныне и присно, и во веки веков. Аминь. Исцелений бездну и благодати пучину зрю Тя, Чистая: темже николиже унываю, аще и зело грешен есмь, веруя, яко вся грехи моя, яко песчинка малейшая, исчезнут в пучинах и бездне благодати Твоея. |
|
|
|
|
|
|
