Богослужебные тексты, службы (видео и текст)
» Неделя 4-ая Великого Поста - Прп.Иоанна Лествичник
к Дискуссиям
|
Неделя 4-ая Великого Поста - Преподобного Иоанна Лествичника
Каноны два Триоди и Преподобного Песнь 1. Ирмос: Спасителю Богу в мори люди немокрыми ногами наставльшему, и фараона со всевоинством потопльшему, Тому Единому поим: яко прославися. Слава Тебе Боже наш, слава Тебе. Уподобихся Христе в руце разбойников впадшему, и биеньми еле живу от сих оставленному Спасе: и аз сице уязвлен есмь грехи моими. Слава Тебе Боже наш, слава Тебе. Не презри мене недугующа люто, вопияше Спасе рыдая, на разбойники богатство изнуривый Твое. И аз сице молюся: ущедри и спаси мя. Слава Тебе Боже наш, слава Тебе. Уврачевавый мя убиен имуща ум грехи в язвах, от разбойников неправедных и лукавых помышлений, Христе Спасе, спаси мя яко многомилостивый. Пресвятая Богородице, спаси нас. Богородичен: Пречистая Мати Христова, воплощшагося из Тебе, и от недр Родителя не отлучшася Бога, непрестанно моли, от всякаго обстояния спасти, яже созда. Иный канон преподобнаго, глас 8. Преподобне Отче наш Иоанне, моли Бога о нас. Во свет невещественный и умный, от печали вещественных востек Иоанне преподобне, молитвами твоими ко Господу просвети мя. Преподобне Отче наш Иоанне, моли Бога о нас. Яко воздержания сладость ссав, отринул еси горесть сластей: темже паче меда и сота услаждаеши отче, чувства наша. Слава: Возшед на высоту добродетелей, доле плежущия поплевав сласти, сладость явился еси спасения, преподобне отче, стаду твоему. Богородичен: Премудрость и Слово Отчее несказанно рождшая, души моея лютую уврачуй язву, и сердца болезнь укроти. Песнь 3. Ирмос: Утверди ны, Боже, Твоею силою, и низложи еретическая шатания, и вознеси рог наш. Слава Тебе Боже наш, слава Тебе. Путем жития Христе, люте путешествуя, уязвлен есмь от разбойник в страстех: но возстави мя молюся. Слава Тебе Боже наш, слава Тебе. Разбиша ум мой разбойницы, и оставиша мя в язвах еле жива прегрешений моих: но исцели мя Господи. Слава Тебе Боже наш, слава Тебе. Обнажиша мя Спасе Христе, заповедей Твоих страсти, и сластьми уязвихся: но излей на мя милость. Слава Тебе Боже наш, слава Тебе. Богородичен: Моли непрестанно Чистая, Прошедшаго из чресл Твоих, избавитися лести диаволи, поющим Тя Матерь Божию. Иный. Попалил еси углем обучения преславно страстей терние, и согреваеши монашествующих состояния. Миро освящения от постнических преподобне аромат, весь сложился еси в воню благоухания Божия. В законех обучения поучаяся, страсти потопил еси, якоже иныя ныне фараониты, течением слез твоих. Богородичен: Устави мое непостоянное помышлений, Чистая, смущение, Мати Божия, к Сыну Твоему направляющи движение. Седален, глас 5. Подобен: Странное: Пречистый Крест Твой, Спасе наш, яко оружие спасения содержаще, тем Тебе вопием: спаси ны пострадавый волею о нас, всех Боже, яко многомилостивый. Слава, преподобнаго, глас 4. Добродетельми к небеси возсиявый, водружен яве, возшел еси к Боговидения неизмеримой глубине благочестно: вся убо победив демонския козни, покрываеши же человеки от вреда сих, Иоанне, лествице добродетелей: и ныне молишися спастися рабом твоим. И ныне, Богородичен. Подобен: На престоле херувимском седяй, и в недрех Отчих водворяяйся, яко на престоле седит святем Своем Владычице, в недрех Твоих плотски: Бог бо воцаривыйся тако над всеми языки, и разумно ныне поем Ему: Егоже и Ты Чистая моли, спастися рабом Твоим. Песнь 4. Ирмос: Услышах слух силы Креста, яко рай отверзеся им и возопих: слава силе Твоей Господи. Слава Тебе Боже наш, слава Тебе. Разбойницы окрадоша мое деяние Божественное, и оставиша мя язвами мучима. Слава Тебе Боже наш, слава Тебе. Извлекоша мя Спасе заповедей Твоих, непостоянная помышления моя, отонудуже уязвлен есмь прегрешеньми. Слава Тебе Боже наш, слава Тебе. Левит ранами уязвленна, яко виде мя, мимо иде, Спасе мой: но Ты мя спаси. Пресвятая Богородице, спаси нас. Богородичен: Господственно прославляем Тя Богородице Безневестная, и к Твоему пристанищу вернии прибегаем. Иный. Преподобне Отче наш Иоанне, моли Бога о нас. Яко цветник благовоннейший, и добродетелей рай одушевленный, воздержание процвел еси, имже вся напитал еси чтущия тя. Преподобне Отче наш Иоанне, моли Бога о нас. Законоположителя обучения, и монахов правило кротчайшее, яко Моисеа тя и Давида воистинну, стяжавше отче, ублажаем. Слава: Насажден на водах воздержания, явился еси блаженне, розга отче благоцветущая, благочестия грозды произносящая. И ныне: Под летом бываема, от Отца безлетно возсиявша, Богомати нам родила еси: Егоже моли спасти поющия Тя. Песнь 5. Ирмос: Утренююще вопием Ти Господи, спаси ны: Ты бо еси Бог наш, разве бо Тебе иного не знаем. Слава Тебе Боже наш, слава Тебе. Иисусе, посети раны души моея, якоже древле в руце впадшаго разбойничи, и уврачуй болезнь мою Христе, молюся. Слава Тебе Боже наш, слава Тебе. Болезненно язвами изнемогох, Христе мой, прегрешений, и оттуду наг лежу добродетелей Божественных: молю, спаси мя. Слава Тебе Боже наш, слава Тебе. Иерей якоже виде мя, и левит не возможе яве, мимоидоша бо мя: но Сам яко благоутробен, ныне спасение подал, и спасл еси. Пресвятая Богородице, спаси нас. Богородичен: Не презри Владыко окаяннаго мене, молюся, уязвленнаго умом болезненно от разбойник: но ущедри молитвами Спасе, Рождшия тя. Иный. Преподобне Отче наш Иоанне, моли Бога о нас. Погасив вся страсти, росою подвигов твоих отче блаженне, обильно возжег огнем любве и веры, воздержания светильник, и просвещение безстрастия, и дне сын был еси. Преподобне Отче наш Иоанне, моли Бога о нас. Веры грозд, Божественным земледелием твоим отче воспитал еси, и в точила вложил еси, и возделал еси труды обучения, и чашу исполнь духовную воздержания: веселиши сердца стада твоего. Слава: Претерпев добре прилоги и язвы противных врагов, явился еси столп терпения, утверждая стадо твое палицею Божественною, на пажити воздержания, и на воде воспитовая блаженне. И ныне: Речем Твоих устен Всечистая последующе, Тя ублажаем: с Тобою бо воистинну величия сотворивый Господь возвеличи Тя, и истинную Божию Матерь, рождейся из чрева Твоего показа. Песнь 6. Ирмос: Обыде мя бездна, гроб мне кит бысть, аз же возопих к Тебе Человеколюбцу, и спасе мя десница Твоя Господи. Слава Тебе Боже наш, слава Тебе. Страстьми иждих житие Божественное Владыко, и всяко прегрешеньми люте уязвен, прибегох к Тебе: ущедри мя, молюся. Слава Тебе Боже наш, слава Тебе. Расхитиша богатство мое, и якоже мертва мя оставиша разбойницы, страстьми ум мой уязвивше: но ущедрив спаси мя Господи. Слава Тебе Боже наш, слава Тебе. Яко виде левит мою ран болезнь, язв не терпя, мимоиде мя: Сам же Человеколюбче, излиял ми еси богатую Твою милость. Пресвятая Богородице, спаси нас. Богородичен: Купину Тя неопалимую, и гору, и лествицу одушевленную, и дверь небесную, достойно славим, Марие преславная, православных похвало. Иный. Преподобне Отче наш Иоанне, моли Бога о нас. Приял еси в души Божественное богатство Духа, непорочную молитву, чистоту, честность, бдение всегдашнее, воздержания труды, имиже дом познался еси Божий. Преподобне Отче наш Иоанне, моли Бога о нас. Вещества еже доле, премудре, претекл еси худость, невещественною же молитвою ум восперив, и вышняго упокоения явился еси наследник, совершенства ради жития. Слава: Потами постническими углие стрел вражиих угасил еси воистинну, и огнь веры возсияв, попалил еси неверия, ересей шатания. И ныне: Возсия от Сиона вышняго благолепие, предложением плоти по соединению неизреченному, из Тебе Неискусобрачная обложенное, и мир просвети. Господи помилуй (трижды) Кондак, глас 4. На высоте Господь воздержания истинна тя положи, якоже звезду нелестную, световодящую концы, наставниче Иоанне отче наш. Икос: Дом Божий яко воистинну, самаго себе соделал еси отче, Божественными твоими добродетельми: яве украсив яко злато светлое, веру, надежду, и любовь истинную: Божественныя законы излагая, воздержанием обучився яко безплотный: разум, мужество, целомудрие стяжав, смирение, имже вознеслся еси. Темже и просветился еси молитвами непрестанными, и небесная приял еси селения, наставниче Иоанне отче наш. Таже чтется синаксарий дневный. Посем житие преподобнаго отца нашего Иоанна Лествичника, в мире скончавшагося. Стихи: Иже плотию и живый, мертв сый Иоанн, Вечно живет, и мертв явлься бездыханный: Списание оставль лествицу восхождения, Показует своего путь восхождения. Иоанн умре в тридесятый день. Иже шестинадесяти лет сый, и остроумный сый, принесе себе Богу жертву священнейшую, на Синайскую гору возшед. Таже по девятинадесятих летех востав приходит в безмолвия поприще от пяти знамении Кириака: во обитель Палестры достиг, на место глаголемое Фола, четыредесять лет пожив, присно разжигаемь любовию, и огнем Божественныя любве. Ядяше убо вся, яже непорочно пристояху заповеди, но умеренно зело, и в сем гордости рог сломляя всепремудро. Но источник слез его кий ум изрекл бы? Сна же причащашеся, елико ума существу бдением не вредитися. Течение же его молитва бяше присная, и к Богу любовь безмерная. Сими всеми богоугодно пожив исправленьми, и лествицу списавый, словеса учения изложив, и исполнен благости достойно упокоися в Господе, многа и иная списания оставив. Егоже молитвами Боже помилуй, и спаси нас. Песнь 7. Ирмос: Превозносимый отцев Господь пламень угаси, отроки ороси, согласно поющия: Боже, благословен еси. Слава Тебе Боже наш, слава Тебе. Разбойницы обпадоша на мя окаяннаго, и язвами оставиша мертва, якоже бездыханна мя, темже молюся Ти: Боже, посети мя. Слава Тебе Боже наш, слава Тебе. Ум мой плениша помышления непостоянная, и уязвивше страстьми, мертва мя оставиша, множеством прегрешений, но Спасе, исцели мя. Слава Тебе Боже наш, слава Тебе. Яко виде левит мя ранами боляща, не терпя язв неисцельнаго ради, мимоиде мя, Спасе мой: но Сам уврачуй мя. Пресвятая Богородице, спаси нас. Богородичен: Ты от Девы воплотивыйся, спасл мя еси, язвам моим возливая богатую милость, Христе щедрот Твоих: сего ради Тя славлю. Иный. Преподобне Отче наш Иоанне, моли Бога о нас. На злаце вышняго царствия, стадо отче воспитал еси и жезлом догмат звери отгнав ересей, воспел еси: отец наших Боже благословен еси. Преподобне Отче наш Иоанне, моли Бога о нас. В горний вшел еси и невестнический чертог Царства Христова, одеждею облечен достойною звавшаго, в немже и возлегл еси, вопия: отец наших Боже благословен еси. Слава: Невлажная грехми, река явился еси воздержания отче, помыслы потопляя, и скверну очищая, вопиющих верою: отец наших Боже благословен еси. И ныне: Из чрева Твоего пройде воплотивыйся Дево, всех Господь: темже Тя Богородицу мудрствующе православно, Сыну Твоему зовем: отец наших Боже благословен еси. Песнь 8. Ирмос: Тебе, Вседетелю, в пещи отроцы, всемирный лик сплетше, пояху: дела всякая, Господа пойте и превозносите во вся веки. Слава Тебе Боже наш, слава Тебе. От разбойник помыслов моих Спасе, растлих житие мое согрешений язвами. Темже Божественнаго обнажихся образа, Тебе человеколюбиваго Бога: но ущедри мя. Слава Тебе Боже наш, слава Тебе. Пришел еси на землю от вышних Спасе, ущедрив биеньми ураненнаго мя всего прегрешений язвами Щедре, и излиял еси на мя Христе, милость Твою. Слава Тебе Боже наш, слава Тебе. Тело и душу Ты Владыко Спасе, избаву дал еси за мя, и спасл мя еси, мечем грехов уязвленаго, в неисцельных язвах, яко милостивый. Пресвятая Богородице, спаси нас. Богородичен: Тя паче ума Богомужным словом рождшую Господа и девствующую, вся дела Дево благословим и превозносим во вся веки. Иный. Преподобне Отче наш Иоанне, моли Бога о нас. Столп тя одушевленный яко воистинну, и образ воздержания отче стяжавше, вси твою память почитаем Иоанне. Преподобне Отче наш Иоанне, моли Бога о нас. Множество радуется монахов, и ликует преподобных собор и праведных: венец бо достойно с ними приял еси. Слава: Украшен добродетельми, в невестник неизреченныя славы сошел еси, песнь воспевая Христу во веки. И ныне: Помощи яже от Тебе требующия не презри Дево, поющия и превозносящия Тя во веки. Песнь 9. Ирмос: Исаие, ликуй: Дева име во чреве и роди Сына Еммануила, Бога же и Человека, Восток имя Ему: Егоже величающе, Деву ублажаем. Слава Тебе Боже наш, слава Тебе. Заповеди Твоя Владыко, не сохранив разумом моим, в страсти вшед сластей, обнажихся благодати, и язвами извержен наг. Темже молю Тя Спасе, спаси мя. Слава Тебе Боже наш, слава Тебе. Ниже левит возможе отмыти струпы моя: но пришел еси ко мне Блаже сострадательно, и излиял еси милость Твоих щедрот Спасе на мя, яко всеизрядный врач исцеляя мя. Яко сый благоутробен, ущедрив спасл еси Христе, язвами люте от разбойник Спасе убиена мя: душу же и тело Свое, яко динаря два дал еси избавление. Богородичен: Паче ума рождество Твое Богомати, без мужа бо зачатие в Тебе, и девственно рождение бысть: ибо Бог есть рождейся, Егоже величающе, Тя Дево ублажаем. Иный. Преподобне Отче наш Иоанне, моли Бога о нас. Врач болящих в прегрешениих, от Бога блаженне, губитель же явился еси и прогонитель лукавых духов: темже тя ублажаем. Преподобне Отче наш Иоанне, моли Бога о нас. Землю, якоже тли жилище, оставил еси отче, и в земли вселился еси кротких, и с ними веселишися, Божественныя наслаждаяся сладости. Слава: Днесь день празднственный, вся бо созывает монашествующих стада, в лик духовный, на трапезу и снедь нетленныя жизни. И ныне: В Тебе вселився Всенепорочная, прежде родоначальники злонравно прельстившаго человекоубийцу Низложивый, родися, и вся ны спасе. Ексапостиларий воскресен, и преподобнаго. Мира благострастия, якоже вреднаго уклонился еси, и безбрашием плоть увядив, обновил еси души крепость преподобне, и славою обогатился еси небесною преславне. Темже не престай моляся о нас Иоанне. Слава и ныне: Богородичен: Господственно Богородицу Тя исповедуем Владычице, Тобою спасени: ибо Бога родила еси неизреченно, разоршаго Крестом смерть, к Себе же привлекшаго преподобных соборы: с нимиже Тя восхваляем Дево. |
|
|
|
|
|
|
