Богослужебные тексты, службы (видео и текст)
» Служба преподобномученице Елизавете Феодоровне
к Дискуссиям
|
Служба преподобномученице Елисавете и дружине ея
Творение некоего афонскаго священноинока Аще настоятель изволит, службу сию можно присоединять к службе преподобному Сергию. На Господи, воззвах: стихиры на 6. Глас 1. Подобен: Небесных чинов: Преподобномученица Елисавета, * вземши крест свои на рамо свое, * бывши послушлива даже до смерти * за Возлюбльшаго, глаголаше: * никтоже мя разлучит * от любве Его! Варвара преподобномученица, * верна бывши начальнице своей в жизни временной, * пребысть верна до конца * по слову подвигоположника Христа: * верныи в мале * и в велице верен есть. Отрасли от благаго корене: * князи страстотерпцы иподиакон Иоанн, Константин и Игорь * добре страдаша за Христа. * Но аще настанет на ны, Господи, время и нашего испытания, * да принесем и мы плод духовный, * и да венчаемся. Днесь Сергию преподобному празднуем, * мощей ради пренесения, * великий же князь Сергии страстотерпец * в вечность преселяется, * вкупе с верным Феодором. * Вси да ублажаются от нас. Слава, глас 6: Овчата истиннаго Пастыря являеми страстоносцы, преподобномученицы Елисавето и Варваро, князи великии Иоанне, Константине, Игоре и Сергие, страстотерпцы же Феодоре вкупе с Владимиром, посреде дивиих волков невреждени пребысте и скончавше добре течение и веру соблюдше пастыреначальнику Христу, божественнии, во ограду небесную вселистеся. И ныне, Богородичен или Крестобогородичен. На стиховне стихиры Октоиха. Слава, глас 8: Подобен: О преславнаго чудесе: Мученицы Христовы прехвальнии, * гонителей стремления, * и нуждную смерть нивочтоже вменивше, * и благодерзостно ополчившеся * мужемудренно к борением, * победоносною славою одеястеся, * и причтостеся всем праведным, * с нимиже вас всегда * хваляще, ублажаем. И ныне, Богородичен или Крестобогородичен. Тропарь, глас 4: Кротость и смирение и любовь вселивши в душу свою, усердно послужила еси страждущим, страстотерпице святая княгине Елисавето, таже с верою претерпела еси страдания и смерть за Христа, с мученицею Варварою. С неюже моли о всех с любовию почитающих вас. На утрени, канон, глас 8, на 6: Песнь 1 Ирмос: Воду прошед, яко сушу, и египетскаго зла избежав, израильтянин вопияше: Избавителю и Богу нашему поим. Веры бронею оградившеся страстотерпцы непобедимии, воинов Христовых осмерица всечестная крестом на враги вооружишася. Не на князи и сыны человеческия упование свое возложивше, святии, но на единаго Бога, Тому верно послужисте в преподобии и правде. Сынове тьмы беззаконнии лишиша вас жизни и царства временнаго, обаче Небесному Царствию устремилися есте, идеже творит Господь сыны света. Велия ваша страдания и больша дарования: Царя Небеснаго молите от тли и бед избавитися совершающим память вашу верно. Богородичен: От дел спасения несть ми, Владычице, грехи бо прилагаю ко грехом, и к злобе злобу: молитвою убо Твоею, Чистая, ущедри и спаси мя. Песнь 3 Ирмос: Небеснаго круга Верхотворче, Господи, и Церкве Зиждителю, Ты мене утверди в любви Твоей, желаний краю, верных утверждение, Едине Человеколюбче. Возлюбила еси богоизбранный народ, преподобномученице богоблаженная, якоже Руфь древле, и глаголала еси: святая Русь не погибнет! Искала еси всем спастися и в разум истины приити. Жениха земнаго лишилася еси, обаче Небеснаго обрела, Егоже ради отреклася еси от мира сего и вся яже в нем, глаголя: несть свят паче Тебе, Господи! Любовь ко врагом стяжала есть Елисавета милосердная, не токмо словом, но делом и истиною подобящися Богу, об убивающих ю моляшеся: прости им, не ведят бо что творят! Клеветаша на тя лукавии человецы, не ведяще яко клеветник есть ди-авол. Но яко смиренная подражательница Христа, вся в кротости претерпела еси. Богородичен: Суд при дверех, судище готово, уготовися, смиренная душе, и возопий: внегда судити Ти, Слове, не осуди мене, молитвами Рождшия Тя. Седален, глас 3: Светло празднуем днесь память Алапаевских страстотерпцев, иже доблественно пострадаша, живопогребенни в рове глубоце, в непрестанном славословлении Христа, диаволю прелесть упраздниша и смерть попраша, вопиюще: Христос воскресе из мертвых! Богородичен: Святая Дево, Мати Христова, мучеников славо и ангелов радосте, с ними моли Сына Твоего, ущедрити и спасти рабы Твоя. Или Крестобогородичен. Песнь 4 Ирмос: Услышах, Господи, смотрения Твоего таинство, разумех дела Твоя и прославих Твое Божество. Отцем твоим послушания ревнительница сущи, стяжала еси матерь непорочныя молитвы: глубочайшее смирение. Марфа убо служаше Иисусу, Мария же седяше при ногу Его. Ихже образ была еси, преподобномученице, в деянии обрела еси видения восход во обители твоей. Имуще сердца молитвою и слезами очищенныя, преподобныя жены Елисавето с другинею Варварою, во свете неприступнем зрите свет. Ни сна дала еси очима твоима, ниже веждома дремания, дондеже достигла еси любве благих, присно учащи чада твоя: любите друг друга! Богородичен: Объем греховныя плоды, умертвихся, и принося душу неплодну, зову Ти: плодоносну покажи, Яже Плодом Твоим тление потребившая. Песнь 5 Ирмос: Просвети нас повелении Твоими, Господи, и мышцею Твоею высокою Твой мир подаждь нам, Человеколюбче. Алчущих питательницы, странных утешительницы, неизлечимых больных посетительницы были есте, сего ради небесная наследовасте. Сострадательная Елисавета потщася овчата заблудшия взыскати, подражающи Пастыря добраго, Иже рече: приидох спасти погибшаго. Кротость присную, смирение высокое, нелицемерную любовь, мудрость же духовную стяжала еси, сего ради тя ублажаем. Рыдание и горе неутешное постиже обитель мирную, егда тя человецы зверонравнии от среды верных учениц твоих отлучаху, ты же всех утешаше. Богородичен: Надежду и утверждение, и спасения стену недвижиму имуще Тя, Всепетая, неудобства всякаго избавляемся. Песнь 6 Ирмос: Ризу мне подаждь светлу, одеяйся светом, яко ризою, Многомилостиве Христе Боже наш. Язвы Господа Иисуса на телесех ваших носяще, всю силу адову в терпении покористе. Мученицы непобедимии, не отвергостеся Пожершагося за вы. Но Тому жертву непорочную себе принесосте. На камени заповедей бе основана храмина душ ваших, сего ради неподвижни пребысте, страстотерпцы осмочислении. Иже на земли изгнани быша Христа ради, ныне небожителие блаженнии радуются во вся веки. Богородичен: Препетая Владычице, во святых Почивающаго паче слова родила еси, сего ради Тя песньми почитаем. Кондак, глас 4: От славы царственныя, вземши крест Христов, прешла еси к славе не-бесней, молящися за врагов, и обрела еси радость вечную, святая мученице княгине Елисавето, с Варварою мученицею. Темже молите о душах наших. Икос: Жертвы Богу живопогребенныя, в кладязеподобный ров низринутыя; прежде всех Елисавета страстотерпица, к горним устремленная княгиня милосердная, бисер Православия в новом отечестве обретшая, евангельски убийцу мужа своего простившая, молитвою, бдением и благотворением Богу угодившая, безбожными же беспощадно умученная, темже вопием ти: Радуйся, сердцем в Бозе утвержденная; радуйся, с верою и упованием понесшая крест твой и Христу последовавшая. Радуйся, избранная Богом на служение страждущим, невесто Христова; радуйся, отдавших жизнь на служение ближним покровительнице. Радуйся, заповеди Господни исполнити возжелевшая; радуйся, ревность по Бозе в сердцах наших воспламеняющая. Радуйся, презренных и отверженных не оставляющая; радуйся многия души от тьмы греховныя и погибели спасшая. Радуйся, приобщитися страстем Христовым удостоившаяся; радуйся, в исповедничестем подвизе люди российския утверждающая. Радуйся, жертво непорочная, благоприятная, Богу принесенная; радуйся, со всеми святыми земли нашея торжествующая. Радуйся, преподобномученице Елисавето, молитвенница о душах наших. Песнь 7 Ирмос: От Иудеи дошедше, отроцы в Вавилоне иногда верою Троическою пламень пещный попраша, поюще: отцев Боже, благословен еси. Пожерты быша святии, якоже агнцы, за прегрешения народа их, и безгласны ведошася на предлежащий им подвиг, взирающе на начальника веры Иисуса. Яко трие отроцы в пещи, песнь победы над смертию воспеваху в шахту ввержени, мученицы святии: Избавителю Боже, благословен еси. Блажени есте, умирающии о Господе, отныне да почиете от трудов ваших, дела бо ваша вслед вас да ходят, рече Дух Святый, повелевая и нам вопити: Боже, благословен еси. Подобает вам почесть от Господа, пострадавшим крепко, и обнажившим хитрости вражия, и поющим согласно: Избавителю Боже, благословен еси. Богородичен: Подаждь нам радость нечаянную, еже радуйся от ангела приимшая, да гласом велиим возопиим: Избавителю Боже, благословен еси. Песнь 8 Ирмос: Благословите, отроцы, Троицы равночисленнии, Содетеля Отца Бога, пойте снизшедшее Слово и огнь в росу претворшее и превозносите всем жизнь подавающаго Духа Всесвятаго во веки. Воини Христолюбивии, изнесше святая телеса ваша из земли, честию во гробы положиша, песнь надгробную поюще: священницы, воспойте, людие, превозносите Господа во веки. Возлюбивши Сион, Божие жилище, и возжелавши видети благая Иерусалима вся дни живота своего, святая Елисавета, погребение в нем прият, идеже священницы поют, людие превозносят Христа во веки. Земля положением священных мученик мощей освятися: ибо источник источающ исцелений всяческих сия Божественнаго стяжавает, страсти телесныя и душевныя непрестанно исцеляющи превозносящим Христа во веки. Триипостасный Боже! Приими нас, грешных, болезненный глас воздыхания сердечнаго. Призри на страждущую страну нашу, да и в той выну священницы поют, людие же воспевают Тя во вся веки. Богородичен: Просвети ми очи сердечныя, Яже дверь света чистая, облак страстей и тьму глубокую разгоняющи, да поют священницы, люди же превозносят Тя во вся веки. Песнь 9 Ирмос: Воистинну Богородицу Тя исповедуем, спасеннии Тобою, Дево Чистая, с безплотными лики Тя величающе. Вы, страстоносцы осмочислении, в чаянии осьмаго дне пребывали есте непоколеблеми до скончания временнаго жития. Царственнии отрасли достохвальнии, паче плотскаго благородия духовное улучили есте. Горняго Царствия возжелели есте, идеже Христос царствует. Бог бо есть Бог живых, глаголет Господь, посему не забудите чад ваших в разсеянии сущих и страждущую страну Российскую, да избавимся от лютых врагов наших. Пред святыми мощами вашими в земном Иерусалиме молимся: прежде даже до конца не погибнем, заступите нас и введите в горний Иерусалим. Богородичен: Пред Державною Твоею иконою, Владычице, моляхуся страстотерпцы: не отыми от нас покрова Твоего! Светилен: Подобен: Небо звездами: Приидите, мучениколюбцев собор, зде совокупльшеся в Гефсиманийстей веси, припадем к честным мощем страстотерпиц и в молитве теплой испросим ниспослати нам мир и велию милость. Богородичен: Оболкся в мя, пройде из Тебе Бог, нетления облече мя одеждою, злым нравом обнажшася Божественныя одежды, Богородительнице Владычице, всех человеков прибежище, мучеников венценосных утверждение, и ангелов радование. На стиховне Октоиха. Слава, глас 1 : В заточении злостраждуще, молитву деясте, и в шахту ввержени благодушествующе поясте, яко Даниил во рву львином, темже избавите ны от рова страстей наших, верою и любовию совершающих память вашу. И ныне: Богородичен или Крестобогородичен. На литургии Блаженны Октоиха, на 4, и от канона святых, песнь 3, на 4. Прокимен, глас 4: Святым, иже суть на земли Его, удиви Господь вся хотения Своя в них. Стих: Предзрех Господа предо мною выну. Апостол к Римляном, зач. 99. Аллилуиа, глас 4: Многи скорби праведным: Причастен: Радуйтеся, праведни |
|
|
|
|
|
|
