Богослужебные тексты, службы (видео и текст)
» Канон святому блаженному Василию Московскому
к Дискуссиям
|
Канон святому блаженному Василию Московскому
Тропарь, глас 8-й Житие твое, Василие, неложное, и чистота нескверна, Христа ради тело твое изнурил еси постом и бдением, и мразом и теплотою солнечною, и слотою и дождевным облаком, и просветися лице твое, яко солнце, и ныне приходят к тебе Российстии народи и вси людие, прославляюще святое твое успение. Тем Христа Бога моли, да избавит ны от варварскаго пленения и междоусобныя брани и мир мирови подаст и душам нашим велию милость. Ин тропарь, глас тойже Якоже бо солнце и луна наготою своею не срамляются, тако и ты, угодниче Христов Василие, наг сый, не срамляшеся, восприят бо ризу Адама первозданнаго, юже он ношаше прежде в раи, ты же сию на земли поносил еси; и был еси добрый купец: елико имеяше, вся остави и купи мздою терпения своего село, на немже сокровен безценный Бисер, Христос. Сего ради явися всем грешным образ покаяния и вселися в райскую широту, и, предстоя Христови, не забуди град, в немже обита, и люди, преблаженне, и моли спасти души наша. КАНОН, глас 8-й Песнь 1 Ирмос: Посеченный несекомаго пресече, и виде солнце землю, юже не виде; лютаго врага вода потопи, и непроходимое пройде Израиль. Песнь же воспевашеся: Господеви поим, славно бо прославися. Припев: Святый блаженный отче наш Василие, моли Бога о нас. Одеяйся светом, яко ризою, одея тя, Василие чудне, ризою безстрастия. Темже взимаяся духом к Божественному видению и озарився благодатию Божия Промысла, странен показался еси от всех сродник и знаемых, и преселился еси к сродству Небесному, и ныне живеши жизнь безконечную. Святый блаженный отче наш Василие, моли Бога о нас. Показался еси Российстей земли светило великое, просвещая нас светом твоих добродетелей. И кто может изчести многия подвиги и труды твоя, и всенощная стояния, и иных множества к сим добродетелей, имже возмездие от Бога приял еси? Слава: Ума человеча превзыде чин, дивное на земли житие пожил еси, бдя, и моляся, и труждаяся, и наг на земли скитаяся, не имея где главы подклонити, во всем животе твоем. И сего ради вселился еси во обители Небесныя, многи бо, рече Господь, обители в дому Отца Моего, по мере добродетелей. И ныне: Кое спасение ино таково, якоже Ты, Пречистая Богородице, крепкое поможение и теплое заступление? Избави душу мою от сети диаволи, Ты бо еси всех земных спасение, спаси и мене, люте потопляема волнами греховными, молитвами угодника Твоего Василия. Песнь 3 Ирмос: Небеснаго круга Верхотворче, Господи, и Церкве Зиждителю, Ты мене утверди в любви Твоей, желаний краю, верных утверждение, Едине Человеколюбче. Святый блаженный отче наш Василие, моли Бога о нас. Дым, и прах, и сень вменил еси красная века сего и ничтоже от любве Христовы паче изволил еси, Сего желая насытитися славы и веселия присносущнаго, в няже желают Ангели приникнути. И, сих радости получив, предстоиши во свете Святей Троице, радуяся, Ейже молися за ны, преблаженне Василие. Святый блаженный отче наш Василие, моли Бога о нас. Воцарився над страстьми, великодушне Василие, одолел еси плотское желание, и явился еси чистоты сокровище духовное, и сего ради приял еси тавлу белу, на нейже написано имя ново, дивно, неведомо. И не бысть на души твоей скверны, ни враски: убелил бо еси ю токи слез твоих, и ныне непрестанно радуешися. Слава: Веру неоскудну в души имея, преблаженне, данный тебе талант трудолюбно возделал еси и приял еси власть над десятию градов добродетелей, бесы прогоняти, прокаженныя очищати, разслабленныя быстро ходити, слепыя пpocвeщaти, и усугуби дар всем исцеления, творящим святую память твою. И ныне: Аз, Дево Святая Богородице, надежду имея на Тя, спасаюся. Разгони, Владычице, враги души моея и направи мя на путь жизненный, да, спасся, вопию Ти: радуйся, Помощнице мира, Надеждо христианская, Радуйся, Господь с Тобою, Благословенная. Господи, помилуй (трижды). Седален, глас 8-й От земных на Небесная помыслив и делом совершив, красная мира сего во уметы вменил еси, Христа ради юрод быв на земли, терпением и жестоким подвизанием сын света показался еси и в Царствии Небеснем светло зриши Святую Троицу, преблаженне Василие. Юже моли согрешений оставление даровати празднующим любовию святую память твою. Слава, и ныне: Красоте Твоей, Богорадованная, Архангел Гавриил предстоя, дивляшеся и вопияше Ти: О, Невесто Неискусобрачная, Отроковице неблазненная! Како Ти изреку прежде век сокровенную тайну? Ты бо еси Небесным и земным соединение. Радуйся, Обрадованная, Господь с Тобою. Песнь 4 Ирмос: Пророк Аввакум умныма очима провиде, Господи, Пришествие Твое, тем и вопияше: от юга приидет Бог. Слава силе Твоей, слава снизхождению Твоему. Святый блаженный отче наш Василие, моли Бога о нас. Был еси под владыкою учинен Христова повеления, и повелевая рабу своему, телу, сотворити службу свою, Христу работая, и покори уму, владыце, страстныя помыслы, и был еси сын послушания, вопия Христу: силе Твоей слава, Человеколюбче. Святый блаженный отче наш Василие, моли Бога о нас. Имеющим цел ум не требовати писания, – рече Великий Антоний. На тебе сие сбыстся, премудре Василие: не учився книгам, вся разумел еси Божественная Писания, непрестанно поя Христу: силе Твоей слава, Человеколюбче. Слава: Во граде, яко в пустыни, живый, преблаженне Василие, и ни от чегоже смущаяся, но венчался еси ради трудов твоих, посещая вдовицу, якоже Илия пророк сарефтяныню, и поя песнь немолчную: силе Твоей слава, Человеколюбче. И ныне: Иже Отцу и Духу Собезначальный от Тебе изволи родитися нашего ради спасения и дарова Тя роду христианскому теплую Заступницу и в бедах скорую Помощницу, Темже, Мати безмужная, покланяемся верно Рождеству Твоему. Песнь 5 Ирмос: Мрак души моея разжени, Светодавче Христе Боже, началородную тьму изгнав бездны, и даруй ми свет повелений Твоих, Слове, да, утренюя, славлю Тя. Святый блаженный отче наш Василие, моли Бога о нас. Процвет, яко кипарис, посреде земли Российския, угодниче Христов Василие, принесл еси плоды духа во мнозе терпении, безыменство, и телесное удручение, и от бесов и злых человек озлобление. Сего ради приял еси ныне вечное утешение. Святый блаженный отче наш Василие, моли Бога о нас. Сила бо Моя, – рече Господь, – в немощи совершается. Се бо на тебе совершися Божие смотрение, чудне Василие, силою Христовою дивен явился еси в житии твоем, зло стражда, никакоже болезни ощущал еси: облегчеваше тя желание будущих благ, яже получил еси. Слава: Звание твое не от человек бысть, но от Бога, премудре Василие. И, яко елень, жаждя, на источники воды живыя потекл еси, напитавая душу Христовою любовию, и ктому никакоже от зноя греховнаго вжаждался еси: укрепи бо тя на се Царь мира. И ныне: Ангели и Архангели, Херувими и Серафими многоочитии, Начала, и Власти, и Господствия раболепно покланяются Рождеству Твоему, Богородице, славяще Тя, Владычице. Темже и мы, Мати Преблагословенная, покланяемся со страхом и молим Тя: спаси души наша. Песнь 6 Ирмос: Якоже пророка избавил еси из глубины преисподния, Христе Боже, и мене от грехов моих избави, яко Человеколюбец, и управи живот мой, молюся. Святый блаженный отче наш Василие, моли Бога о нас. Кто может изчести чудеса премудраго Василия, егоже видяху по морю шествующа немокренно, яко по суху, и видяху невернии языцы, дивляхуся и, пришедше в Россию, поведаху: мы, – рекоша, – видехом такова человека, по морю шествующа; истинно бо свидетельство и от враг приносится. Мы же глаголем: слава Богу, творящему чудеса дивная. Святый блаженный отче наш Василие, моли Бога о нас. Уподобился еси, премудре Василие, всеми нравы и обычаем Симеону, юродивому Христа ради, и Андрею Цареградскому, и Великому отцу Макарию, и Онуфрию, и Павлу Фивейскому, и Максиму чудному, и Прокопию Великому. С нимиже сожитель явился еси во Царствии Христа Бога нашего. Слава: О, премудре Василие, чудный житием и разумом! Молим тя, блаженне: моли Христа Бога нашего за люди православныя, и всем верным спасение испроси, и миру мир, и от грех свобождение, и умоли Царствию быти наследником. И ныне: Кто нас избавит от муки вечныя и от смерти душевныя, аще не Ты воздежеши пречистеи руце, Богородице, Сыну Твоему и Богу нашему? Да спасет ны, ниоткудуже имущия помощи, Твоим покровом, Преблагословенная. Господи, помилуй (трижды). Слава, и ныне: Кондак, глас 4-й Духом Божиим водим, преблаженне Василие, оттрясл еси мирский мятеж, и жития треволнения возгнушался еси, и, совлекся одеяний тленных и облекся в ризу безстрастия, убежал еси ловления льстиваго миродержца, и был еси странен во твоем языце, и, паче земнаго богатства избрав богатство Небесное, увязлся еси венцем терпения. И ныне, преблаженне Василие, моли Христа Бога о творящих святую память твою, да зовем ти: радуйся, преблаженне Василие. Икос Трудолюбному житию твоему Ангели удивишася, мужески бо востал еси на естество: разумев непостоянное житие сего, совлеклся еси одеяний и, наг сый, стал еси противу кознем диавольским, якоже храбрый ратоборец, по словеси, преблаженне, апостолову: несть наша брань к крови и плоти, но к началом, и ко властем, и к миродержителем тьмы века сего. И, сему наготою телесною сплется доблественне, ни от коеяже страсти победился еси, но всех сетей убежал еси гордаго велиара, прескочив пропасть адову, юже изры враг между Лазарем и богатым, и ныне у Авраама на лоне почиваеши, отнесен святыми Ангелы. Молися, преблаженне, Христу Богу нашему о творящих святую память твою, да зовем ти: радуйся, преблаженне Василие. Песнь 7 Ирмос: На поле Деире иногда мучитель пещь постави на мучение Богоносных, в нейже три отроки песнословяху Единаго Бога, троично воспеваху, глаголюще: отцев Боже, благословен еси. Святый блаженный отче наш Василие, моли Бога о нас. День Господень всегда пред очима зря, премудре Василие, предстоял еси наг, якоже судищу нелицемерному Сына Божия, и послужил еси Владыце твоему во мнозе терпении, воспевая: отец наших Боже, благословен еси. Святый блаженный отче наш Василие, моли Бога о нас. Разумев, блаженне Василие, яко ничтоже нужднее души, за нюже Христос умре и воскресе, не осквернил еси ризы душевныя, юже приял еси от святаго Крещения. И ныне, предстоя Христу, взываеши: отец наших Боже, благословен еси. Слава: Ничтоже разлучит мя от любве Христовы, – сия преблаженный Василие глаголаше, – ни высота, ни глубина, ни Ангели, ни Силы, ни слава, ни богатство, ничтоже бо хощу красных мира сего, паче Иисуса Сладкаго, Емуже вопию: отец наших Боже, благословен еси. И ныне: Прежде Рождества пребысть Девою Мати Сына Божия и по Рождестве явися паки Дева: Бог бо бе, идеже хощет, побеждаются естества чини. Ты бо явилася еси село пространно Сына Отча, Благословенная, Емуже вопием: благословен Бог отец наших. Песнь 8 Ирмос: Победители мучителя и пламене благодатию Твоею бывше, заповедем Твоим зело прилежаще, отроцы вопияху: благословите, вся дела Господня, Господа. Святый блаженный отче наш Василие, моли Бога о нас. Видя Господь труды твоя и многая подвиги, чудес даром обогати тя, просиял бо еси на свещнице Христова сияния, и яви тя вселенней знаема ради чудес исцеления, и вси вопиют с тобою, преблаженне: благословите, вся дела Господня, Господа и превозносите Его во веки. Святый блаженный отче наш Василие, моли Бога о нас. Слышал еси, премудре Василие, Спасову заповедь: аще, рече, человек весь мир приобрящет и отщетит душу свою, что даст измену на души своей? Ты же сие в сердцы твоем скрыл еси и пеклся еси, како угодити Богу, Емуже взываеши: благословите, вся дела Господня, Господа и превозносите Его во веки. Слава: Ничимже меньши прежних святых, чудне Василие, явился еси, изряден многими труды и подвиги и тайными к Богу молитвами, аще человеком и неведомы, но Богом вся зримы и ведомы, Емуже вопиеши: благословите, вся дела Господня, Господа и превозносите Его во веки. И ныне: Благословите, вся дела Господня, Господа, рождшагося от Девы Марии, и спасшаго всероднаго Адама от падения, и вознесшаго паки человечество на высоту Небесную, и седящаго одесную Отца, Емуже вопиют вси Ангели: да благословит вся тварь Господа и превозносит Его во веки. Песнь 9 Ирмос: Благословен Господь, Бог Израилев, воздвигнувый рог спасения нам в дому Давидове, отрока Своего, в нихже посети нас Восток с высоты и направил ны есть на путь мира. Святый блаженный отче наш Василие, моли Бога о нас. Якоже рече Христос, самая Истина, внутрь вас есть Царство Небесное. Ты бо, Василие чудне, был еси сын и наследник Царствия Божия, еже скрыл еси внутрь себе добродетельми. Сего ради тя вси ублажаем, Христа величающе. Святый блаженный отче наш Василие, моли Бога о нас. Бдите, – рече Господь, – и молитеся, не весте бо дне и часа, како приидет Сын Божий. Ты же, праведне Василие, всегда готов сый, ожидал еси Пришествия Христа Царя Небеснаго, Егоже и радостно усрел еси и приял еси блаженство вечное, Христа величия. Слава: Егда преставился еси, преблаженне Василие, тогда стекошася царие и князи и вси собори российстии, юноши и девы, старцы со юнотами твоим честным мощем поклонитися, и воскликнуша купно вси память вечную, Христа величающе. И ныне: Возвеличим Матерь Бога нашего, Юже поют вси Ангели и Архангели, и вси роди и колена покланяются и блажат от ныне и до века, вопиюще: радуйся, о Благодатная, Господь с Тобою. |
|
|
|
|
|
|
