Богослужебные тексты, службы (видео и текст)
» Служба иконе Божией Матери «Призри на смирение»
к Дискуссиям
|
Служба пред иконой Божией Матери «Призри на смирение»
29 сентября (16 сентября по старому стилю)  Празднование Пресвятей Владычице нашей Богородице и Приснодеве Марии ради чудотворныя Ея иконы, именуемыя «Призри на смирение» На велицей вечерни Блажен муж: 1-й антифон. На Господи, воззвах: стихиры, глас 1. Подобен: Прехвальнии мученицы: Приидите, Киевстии людие, * и вси народи земли Русския, * и хвалитеся, с веселием ликовствующе, * Божия бо Мати нас милостивно посети * чудотворным Своим образом, * имже дарует в нуждах пособие, * в скорбех исцеление, * в бедах избавление, * и всем подает велию милость. Страшно чудо явления Твоего, Владычице, * и несказанно удивляет премирная * и ужасает земная, * вкупе же и просвещает * светоносною благодатию пречистаго Твоего образа * и рождшагося от Тебе Христа Бога нашего. * Того моли, Чистая, * в Божственнем торжестве Твоем * подати нам просвещение и велию милость. Пресветлое Твое явление, * Пренепорочная Богородице, * лик Ангельский песнословит на небеси, * и человеческий род восхваляет на земли, * и яко мати сущи Живота, * молиши о нас Христа Бога нашего, * на Тя бо крепкую надежду * по Бозе возложихом, * Путеводительнице неложная спасения нашего. Слава, и ныне, глас 8: Светися, славный граде Киеве, обретши в себе новую обитель Богоматерню, в нейже есть светило велие образ чудотворный Владычицы нашея. Ангели Сея трепещут, и человецы Тую воспевают: радуйся, неисповедимая радосте всем, святая Дево: радуйся, образом Своим святым нас просвещающая: радуйся, и отражением того всем исцеление подавающая: радуйся, от всяких бед и скорбей избавляющая: радуйся, всем похвало и верным утверждение и спасение, радуйся, Невесто Неневестная. Вход. Прокимен дне. Чтения три. Бытия чтение. Изыде Иаков от студенца клятвеннаго, и иде в Харрань, и обрете место, и спа тамо, зайде бо солнце. И взят от камения места того, и положи возглавие себе, и спа на месте оном: и сон виде, и се лествица утверждена на земли, еяже глава досязаше до небес, и Ангели Божии восхождаху и низхождаху по ней. Господь же утверждашеся на ней, и рече: Аз Бог Авраамов, отца твоего, и Бог Исааков, не бойся: земля, идеже ты спиши на ней, тебе дам ю, и семени твоему. И будет семя твое яко песок земный, и распространится на море, и ливу, и север и на востоки, и возблагословятся о тебе вся колена земная, и о семени твоем. И се Аз с тобою, сохраняяй тя на всяком пути, аможе аще пойдеши. И возвращу тя в землю сию, яко не имам тебе оставити, дондеже сотворити ми вся, елика глаголах тебе. И воста Иаков от сна своего, и рече: яко есть Господь на месте сем, аз же не ведех. И убояся, и рече: яко страшно место сие, несть сие, но дом Божий, и сия врата небесная. Пророчества Иезекиилева чтение. Тако глаголет Господь: будет от дне осмаго и прочее, сотворят иереи на олтари всесожжения вашего, и яже спасения вашего, и прииму вы, глаголет Адонаи Господь. И обрати мя на путь врат святых внешних, зрящих на востоки, и сия бяху затворена. И рече Господь ко мне: врата сия затворена будут, и не отверзутся, и никтоже пройдет сквозе их, яко Господь Бог Израилев пройдет ими, и будут затворена. яко игумен сядет в них снести хлеб, по пути Еламских врат внидет, и по пути его изыдет. И введе мя по пути врат святых сущих к северу, прямо храму, и видех, и се исполнь славы храм Господень. Притчей чтение. Премудрость созда себе дом, и утверди столпов седмь. Закла своя жертвенная, и раствори в чаши своей вино, и уготова свою трапезу. Посла своя рабы, созывающи с высоким проповеданием на чашу, глаголющи: иже есть безумен, да уклонится ко мне. И требующим ума рече: приидите, ядите мой хлеб, и пийте вино, еже растворих вам; оставите безумие, и живи будете, и взыщите разума, да поживете и исправите разум в ведении. Наказуяй злыя, приимет себе безчестие: обличаяй же нечестиваго опорочит себе; обличения бо нечестивому раны ему. Не обличай злых, да не возненавидят тебе: обличай премудра, и возлюбит тя. Даждь премудрому вину, и премудрейший будет: сказуй праведному, и приложит приимати. Начало премудрости страх Господень, и совет святых разум. Разумети бо закон помысла есть благаго: сим бо образом многое поживеши время, и приложатся тебе лета живота. На литии стихира, глас 2, самогласна: Яко воистинну древняго кивота пречестнее, егда Давид, собрав чины ликовствоваше, ныне Твоя, Богородице, икона, ейже предстоят архиерей собори с чинми Ангел, монаси же и простии достойно блажат Тя, Матерь Божию, и прославляют раболепно, и чествуют и покланяются, и молятся Тебе по Бозе, да мир умириши в Православии, и отечество утвердиши, и спасеши от всех зол Твоя рабы, яко едина Благословенная. Слава и ныне, глас 6: Тебе вси роди человечестии хвальныя дары приносят, Владычице, и молятся яко Царице и Матери Божией: пророцы Тя премудро проповедаша, левити благословиша, апостоли и мученицы исповедаша, священницы покланяются, архиереи проповедают, монаси и простии благоговеют. Богатии и убозии, сироты и вдовицы, и всяк возраст, и всяко преспеяние, старческое и младенческое, под кров Твой державный с верою прибегаем: покрый и соблюди, Госпоже, молитвами Твоими, и спаси от бед души наша. На стиховне стихиры, глас 2. Подобен: Доме Евфрафов: Вместилище чистое * Света Пречистаго, Богородице, * како Тя, раби, достойно воспеваем? * Яко явлением пречестныя Твоея иконы * вся освящаеши. Стих: Помяну имя Твое во всяком роде и роде. О Дево нескверная, Богорадованная, * что Ти, когда таково принесем благодарение? * яко блаженнаго Твоего Рождества * всесияющею лучею всех * от тления к жизни возвела еси. Стих: Слыши, Дщи, и виждь, и приклони ухо Твое. О Дево Госпоже, Мати Зиждителева, * небесных еси чинов радование * и человеческому роду * благословенная Помощнице, * моли о спасении душ наших. Слава и ныне, глас 8: Кто не удивится, Богоизбранная Дево, Твоему о нас всеблагому смотрению? Кто не воспоет еже к нам Твое Матернее благоутробие? Се к нам достиже от пределов Псковских чудес источник приснотекущий, всесвятый образ Твой и Твоего Сына Вседетеля, имже украшается храм и процветает обитель Твоя. Той бо всем верным изливает благодатныя струи богодейственно, целительны душам и телесем, и веселящии сердца, печалию сокрушенная. О воистинну миро излиянное имя Твое, Владычице! Темже Ти взываем: радуйся, земнородных радосте: радуйся, упование всех верных, прибежище и спасение душ наших. Тропарь, глас 4: Необоримая стена образ Твой и источник чудес, якоже древле от него заступление Твое граду Пскову даровала еси, тако и ныне нас от всех бед и скорбей милостивно избави, и спаси души наша яко любвеобильная Мати. На утрени По 1-м стихословии седален, глас 4. Подобен: Удивися Иосиф: Божественными зарями просвети и верою утверди, Пренепорочная Дево, поющих Тя умы, да вси любовию торжествуем, славяще в песнех лика Твоего отображение, и Тя, яко Заступницу христиан, просим спасти рабы Твоя от веяния беды, на путь покаяния наставити и сохранити от хотящих погубити души наша. Слава, и ныне, глас тойже. Яко необоримая стена и источник чудес, древле икона Твоя, Владычице, во граде Пскове явися, тако и ныне во граде Киеве, призирая на смирение православных, стяжавших Тя Заступницу усердную, преславно чудодееши во иконе Твоей, лика Твоего изображения предивно умножая, темже молим Тя державе нашей даровати мир и душам нашим велию милость. По 2-м стихословии седален, глас 3. Подобен: Красоте девства: Пресветлаго зрака Твоего новое явление радость приносит всем верующим, и град Киев в скорбех утешается, богатство благости в обители нашей процветает. Темже вси, утверждение в правоверии от Тебе приемше, купно с Гавриилом возопиим: радуйся, Благодатная! Слава, и ныне, глас тойже. Призри на смирение Твоих раб, Всенепорочная, утоляющи лютая на ны востания, всякия скорби нас изменяющи, Тя бо православнии твердое и известное утверждение имамы, и Твое предстательство стяжавше, ко иконе Твоей прибегаем: не посрами нашего упования, Владычице, вопиющих: Ты бо еси всех помоще, радосте и покрове, и спасение душ наших. Величание: Величаем Тя, Пресвятая Дево, Богоизбранная Отроковице, и чтем святыя иконы Твоея чудесное отображение. По полиелеи седален, глас 4. Подобен: Скоро предвари: Световидным явлением Твоим и божественным блистанием озари славящия Тя, и ум к содержанию крепкому истиннаго благочестия просвети, Пренепорочная Дево, неложна бо еси миру всему Предводительница к вечному радованию. Сего ради празднуем любовию вси явление Твоего зрака, славословяще Тя: не лиши нас Царствия Сына Твоего, едина Благословенная. Слава, и ныне, тойже. Степенна, 1-й антифон 4-го гласа. Прокимен: Помяну имя Твое во всяком роде и роде. Стих: Слыши, Дщи, и виждь, и приклони ухо Твое. Всякое дыхание: Евангелие от Луки, зачало 4. По 50-м псалме стихира, глас 6: Да радуется с нами все вышних ликостояние, да играет вся тварь, и да веселятся собори верных, яко всех Зиждителя Мати, Царица сущи небесе и земли, являет нам неизреченное благоутробие целебными Своего образа чудесы, подающи слепым прозрение, возставляющи разслабленныя, свобождающи от злых духов томимыя и спасающи в мире души наша. Канон Богородицы, глас 4, егоже краегранесие: Достойно есть величати Тя, Богородице. Песнь 1. Ирмос: Отверзу уста моя, и наполнятся духа, и слово отрыгну Царице Матери, и явлюся светло торжествуя, и воспою, радуяся, Тоя чудеса. Даждь, Владыко Христе, слово безгласным устом моим и просвети помраченный ми смысл, да восхвалю новое и ужасное чудо Пречистыя Твоея Матере. О Пресвятая Владычице Богородице! Приими сие малое моление и принеси е Сыну Твоему и Богу нашему, да спасет и просветит Тебе ради души наша. Сердца наша привлекла еси, Дево Чистая, и тайным образа Твоего благолепием, и боголепными онаго чудесы. Темже, поюще молим Тя: и наша души благообразны соделай, Владычице. Тя, Богоневесто Чистая, недостойнии раби, славим, лобызающе бренными усты образ Твой святый, и Тебе молимся со слезами: спаси нас от лютых грехопадений, да избавимся от вечныя муки. Песнь 3. Ирмос: Твоя песнословцы, Богородице, живый и независтный источниче, лик Себе совокупльшия, духовно утверди, в божественней Твоей славе, венцев славы сподоби. Оружие убо на ны обострив, совещавает льстивый враг беззаконный: Ты же, Дево Богородице, силою молитв Твоих вооружаеши на него рабы Твоя: темже проповедуем славу Твою. Исполни, о Владычице, благими помышлении мой ум, долу приклоненный, да возвеселюся, узрев чудес сокровище, пречистый образ Твой. Начало и худость моего естества познавая, молю Тя, Дево, утоли страстей моих свирепеющую волну, и бурю злых помышлений потреби. Обуреваемь волнами моих прегрешений, и люте всегда борца работами потопляемь, и во глубину погибели ныне отпущен, вопию Ти, Пренепорочная: спаси мя. Седален, глас 1: В годину новых испытаний и нестроений явившая образ Твой, Всепетая, люди, верно чтущия Тя и покланяющияся новоявленному образу Твоему, в православии и благочестии утверди. Слава, и ныне: Почитающий Тя град, Владычице, и по долгу славящий ограждай от безбожных, от еретиков и отступников, Пречистая Дево, Ты бо тому богатство неотемлемо еси, покров же и слава. Песнь 4. Ирмос: Седяй в славе на Престоле Божества во облаце легце, прииде Иисус Пребожественный нетленною дланию, и спасе зовущая: слава, Христе, силе Твоей. Егда душа окаянная моя от телесе сего имать разлучатися, и не обрящется избавляяй, ниже утешаяй ю: тогда, Владычице, предстани и избави мя бесовскаго озлобления. Со всякою скорбию, с печалию горькою прибегаю к Тебе, Мати Божия, яко чадо, от злых обидимое, вся приношу Тебе, Дево Чистая, чающи утешения и матерния милости. Тобою возстают разслабленнии, недугующии исцеляются, слепии прозирают, от бесов томимии свобождаются. Радуйся, источниче дарований, Богоблагодатная. Егоже от Твоих кровей родила еси, Чистая, совершенна Человека и Бога Истинна, Иисуса: умоли Того избавитися нам огня вечнаго. Песнь 5. Ирмос: Ужасошася всяческая о божественней славе Твоей, Ты бо, Неискусобрачная Дево, имела еси во утробе над всеми Бога и родила еси Безлетного Сына, всем воспевающим Тя мир подавающая. Во уповании тленных и временных вещей не остави мя, Пречистая, сокрушистася бо колена моя от нощи печали и забвения, но Ты не забуди мене, Мати Божия, и возстави мя, унывающаго. Егда огусте мрак неверствия и лжесловесия, ересей и злокознства, явила еси, Владычице, небесную помощь земному отечеству нашему, чудесы от святаго образа Твоего православную веру в нем утверждающе. Любовь сея жизни преизлишнюю и плотскаго покоя рачение отложи от нас, молим Тя, Чистая, да не омрачени суетными и ложными, впадем в злочестия мрак душегубительный. Истины познание даруй нам, Владычице, изымающе из среды нашея всяко идолослужение, лихоимание и безбожие, да сохраним, Пречистая, заповеди Сына Твоего. Песнь 6. Ирмос: Божественное сие и всечестное совершающе празднество, богомудрии, Богоматере, приидите руками восплещим, от Нея рождшагося Бога славим. Чистоты сокровище, огнь нечистоты и всякия скверны во мне морем благости Твоея угаси, и мглу греховную разжени, и сердце мое радости исполни. Ааронов жезле прозябший, потреби лукавая страстей прозябения в души моей, да чистое сердце принесу Христу Богу моему. Тело и душу нескверны Богови соблюдши, чертог Божий одушевленный показалася еси, Дево Пренепорочная, темже присно молися соблюсти без вреда рабы Твоя. Имуще Твою, Богородице, икону, молим Тя, яко Матерь Света незаходимаго: отжени от нас мрак страстей да Того светлостию, просветившеся, воспоем Тя. Кондак, глас 3: Пренепорочная Дево, отображение лика Твоего чтущих благодарныя дары приемлеши, живым и мертвым помогаеши, град и страну нашу заступающи и к Сыну Твоему молитвы приносиши, о спасении душ наших. Икос: Яко дар прияла еси, Мати Божия, всех христиан недуги исцеляти и от бед избавляти, и от пленения спасати, и от врагов заступати; не презри нас, Госпоже, веси бо, ихже требуем, и молися о спасении душ наших. Песнь 7. Ирмос: Не послужиша твари богомудрии паче Создавшаго, но огненное прещение мужески поправше, радовахуся, поюще: препетый отцев Господь и Бог, благословен еси. Тя едину в женах благословенную мы грешнии, поюще, молим, избави нас, Пречистая, от страстей греховных благодатию Сына Твоего, и укрепи ны в заповедех Его ходити, вопиющих: Боже, благословен еси. Яко призре Господь на смирение Твое, Отроковице, тако призри на смиренныя и грешныя рабы Твоя, Мати Господа нашего, и приведи ны к горнему отечеству, вопиющих: Боже, благословен еси. Богородице милостивая, горькая жизни сея нам услади слезами покаяния: окамененная мира сего сокрушением сердечным умягчи, вся бо можеши, молением неусыпающим одесную Христа Бога предстоящи и вопиющи: Боже, благословен еси. От брения мя очисти и тины греховныя, и храм мя божественный сотвори, Богородице, Сыну Твоему взывающаго: Боже, благословен еси. Песнь 8. Ирмос: Отроки благочестивыя в пещи Рождество Богородичо спасло есть; тогда убо образуемое, ныне же действуемое, вселенную всю воздвизает пети Тебе: Господа пойте, дела, и превозносите Его во вся веки. Гнева огнь неугасимый сожигает мя, гордыни червь неусыпающий снедает сердце мое: спаси мя, Пресвятая Богородице, от мук адовых, достигших до души моея, да Тя прославлю во вся веки. Огнь нечистоты и всякия скверны, во мне зело разжженный, росою благодати Твоея угаси, хулу, умножающую души моея озлобление, и всякий вид злобы, гнездящийся в сердце моем, потреби, Дево, да прославлю Тя, Чистая, во веки. Радование благодарственное Тебе Единей приношу, Мати Божия, яко посещением Твоим освящаеши душу мою, да прославлю Тя, Чистая, во веки. Образ благодати Божия напиши, Всечистая, в души моей и печатию милости Твоея утверди, да всех зол избавлен, мирными усты прославлю Тя, Чистая во веки. Песнь 9. Ирмос: Всяк земнородный да взыграется, духом просвещаемь, да торжествует же безплотных умов естество, почитающее священное торжество Богоматере, и да вопиет: радуйся, Всеблаженная Богородице, Чистая Приснодево. Древния обители иконами Твоими светло украшаются, Пречистая, и сия обитель новая образ Твой хранящи и сей утверждение имущи, молит Тя грехов оставление нам испросити у Сына Твоего. Исполнила еси благодати иногда первописанную Твою икону, Госпоже, и ныне тая же благодать многоразличныя чудесы от новыя изливается, да приведет вся верныя на пути мирны и истинны. Церковь Русскую призрела еси милостивным Ти оком, Владычице, доселе неведомое отображение лика Твоего святаго явивши, да Тобою спасаеми, избавимся суда вечнаго. Евангелия Христова богогласный списатель Лука Божиим мановением Твой написует образ, Богородице, и Младенца Превечнаго на руку Твоею, к Немуже притекающии покрываеши и спасаеши Твоею милостию. Светилен: Световодительница сущим во тме, Свет Мысленный рождши, Пречистая, просвети мою душу, и ум освяти, страстей и прегрешений тму решащи. На хвалитех стихиры, глас 4. Подобен: Дал еси знамение: Дал еси в знамение * смотрения о рабех Твоих * образ Твоея Матере, Господи, * на немже и Сам благолепно изображен еси. * К нему бо чувственне взирающе, * отвращаем ум наш от злых и суетных мечтаний, * Твое Имя присно вопоминаем, * Иисусе Всесильне, * Спасе душ наших. Храм одушевленный Небеснаго Царя Христа * Тя, Пречистая, ведуще, * во храм Твой прибегаем, * и образ светоносный видяще, * к Тебе припадаем, Владычице, * и сердцем сокрушенным молим Тя * о спасении всех молити Сына Твоего, * Христа Человеколюбца, * Спаса душ наших. Достойно воспети Тя недоумеем, Дево: * паче бо Серафимов Твое имя превознесеся * и паче Херувимов прославися. * Тии, не терпяще зрети славы Царя Царствующих, * закрывающе лица своя взывают: * Свят, Свят, Свят Господь Саваоф. * Ты же Духом Святым осененная, * во чреве Твоем вместила еси Невместимаго тварию, * ко спасению душ наших. Кое принесем песнохваление? * Твоего бо Рождества Таинство * и Ангельский лик воспети недоумеет: * како, Дева сущи, * Мати Богу возмогла еси быти * и паки Дева пребываеши? * О таинства страннаго! Еже провидя, Исаия возопи: * даст Господь вам знамение, * се Дева во чреве зачнет и родит Сына Еммануила. Слава, и ныне, глас 5: Радуйся, вся христолюбивая Русская земле, слава бо Господня на тебе возсия преславным явлением пречистыя иконы Богоматере, пречудно бо днесь отобразися. Ликуй ныне и веселися, граде Киеве, яко приял еси свыше сияющую зарю, чудес благодати неизчерпаемую. Красуйся и радуйся, Церкве Божия, уяснися бо твоя доброта паче Аароня кивота, ибо имееши в себе великое вселенныя сокровище, пречудную икону Божия Матере, еюже дарует нам великую и богатую милость. На Литургии служба вся Богородицы. |
|
|
|
|
|
|
