Богослужебные тексты, службы (видео и текст)
» КАНОН СВЯТОЙ МУЧЕНИЦЕ ИРИНЕ
к Дискуссиям
|
 КАНОН СВЯТОЙ МУЧЕНИЦЕ ИРИНЕ Память празднуем 4 (18) мая Канон, глас 4-й Песнь 1 Ирмос: Воспою Тебе, Господи Боже мой, яко извел еси люди из работы египетския, покрыл же еси колесницы фараоновы и силу. Припев: Святая мученице Ирино, моли Бога о нас. Венец сый страстоносицы, сея, Христе, молитвами мир миру и славу неувядаему поющим Тя даруй. Святая мученице Ирино, моли Бога о нас. Зарею сияющи девства, украшена добротою твоего мучения, Ирино великоименитая, твоему Жениху предстоиши. Слава: Милостиву быти Церквам твоего моли Жениха, Ирино богомудрая, согрешений же оставление подати чтущим тя. И ныне: Плоть бывша Бога Слова и сущаго, яко мы, Святая Дево, неизреченно родила еси, паче слова и разума. Песнь 3 Ирмос: Лук сильных изнеможе, и немотствующии препоясашася силою, сего ради утвердися в Господе сердце мое. Святая мученице Ирино, моли Бога о нас. Мира излиявшагося чувствующи и вселенную облагоухавшаго благодатию приимши, восперися к желанию сего, славная. Святая мученице Ирино, моли Бога о нас. Имела еси Бога помощника во твоих подвизех и защищающа, всемудрая, сего ради венчавшися, мучителя победила еси. Слава: Столп добродетелей непреклонен, и благочестия жилище бысть, и мужества, и целомудрия приятелище, всехвальная. И ныне: Текши до Тебе, смерть ста, приразившися из Тебе рожденному, Всенепорочная, сего ради безсмертия начаток Тя именуем. Господи помилуй. (Трижды.) Седален, глас 8-й Мир тебе мног прибысть, мученице, разрешшися плоти по болезнех многих: радуяся бо, Жених на небесех тя горе прият, всепросвещену, и страданием облистающу, и в чертог божественный введе радующуся. Слава, и ныне, Богородичен: Яко Деву и едину в женах, Тя безсеменно рождшую Бога плотию, вси ублажаем роди человечестии, огнь бо вселися в Тебе Божества, и яко младенца доиши Зиждителя и Господа. Темже ангельский собор и человеческий род достойно славим всесвятое рождество Твое, и согласно вопием Ти: моли Христа Бога, прегрешений оставление даровати, достойно поющим славу Твою. Песнь 4 Ирмос: Твоего на земли явления, Христе Боже, проповедуя пророк пришествие, с веселием вопияше: слава силе Твоей, Господи. Святая мученице Ирино, моли Бога о нас. Иже мир тебе подаваяй, мироименитая, мира ради пособствующу тя видя, мужеподобным разумом, мученице, и крепостию исполни. Святая мученице Ирино, моли Бога о нас. Крепким усердием превозшедши женскую немощь, преблаженная, твердо изобличила еси, мученице, лести служащия. Святая мученице Ирино, моли Бога о нас. Божественное терпение показавши, мучителей дерзости низложила еси, твоему Жениху зовущи: слава силе Твоей, Господи. Слава: Песнословием немолчным и мольбами Владыку, богомудрая, песнословила еси, и, к Нему востекши, славу зриши неизреченную. И ныне: Радостно Тебе, веселящеся, гласы, Пречистая, Тебе ради спасшиися, взываем: радуйся, Дево всечестная, радуйся, Богородице всепетая. Песнь 5 Ирмос: Просвещение Твое, Господи, низпосли нам, и от мглы прегрешений разреши ны, Блаже, Твой мир даруяй. Святая мученице Ирино, моли Бога о нас. Мужеским, славная, разумом Христа, Бога всех ясно исповедала еси, словом же твердым сопротивоборца, страстотерпице, посрамила еси. Святая мученице Ирино, моли Бога о нас. Последовати возжелела еси страсти Христове и подобием тепле последовала еси, подвижно страждущи по Владыце, пребогатая. Слава: Полки мученик, славная, привела еси Христу твоею мудростию и богословием, сия истинно тайноучащи словом веры. И ныне: Научившеся тайны зачатия Твоего и неизреченнаго и Божественнаго Твоего рождества, Дево, ныне всеблагочестно песнословим Тя, Богородице всепетая. Песнь 6 Ирмос: Возопи, прообразуя погребение тридневное, пророк Иона, в ките моляся: от тли избави мя, Иисусе, Царю сил. Святая мученице Ирино, моли Бога о нас. Исправила еси праматере Евы падение, страстотерпице, врага низложивши силу и победивши онаго шатание божественною благодатию. Святая мученице Ирино, моли Бога о нас. Крепость стяжавши, Ирино, разума, мучителем супротивилася еси души доблестию, и венцем noбедным от Христа Бога венчалася еси. Слава: Кровию страдания, мученице, светлейшу соделала еси естественную доброту, чистая, доблественныя подвиги подъемши твердо, добрая дево. И ныне: Прояви тайну Твоего рождества боговидец, горящу купину видев, и неопаляему, Богородице чистая Приснодево. Господи помилуй. (Трижды.) Слава, и ныне. Кондак, глас 4-й Девства добротами преиспещренна, дево, страдальчеством была еси краснейшая, Ирино, кровьми твоими истекшими обагрена, прелесть же низложившая безбожия. Сего ради и прияла еси почести победы рукою Создателя твоего. Песнь 7 Ирмос: Авраамстии иногда в Вавилоне отроцы пещный пламень попраша, песньми взывающе: отец наших Боже, благословен еси. Святая мученице Ирино, моли Бога о нас. Венценосно, мученице, предстоящи престолу твоего Владыки, соблюди верою зовущия: отец наших Боже, благословен еси. Святая мученице Ирино, моли Бога о нас. В небесных селениих ликовати, мученице, сподобилася еси, досточудная Ирино, зовущи: отец наших Боже, благословен еси. Слава: Желающи улучити Рачителя твоего доброты, мучения болезни претерпела еси, Ирино, зовущи: отец наших Боже, благословен еси. И ныне: Глаголом устен Твоих последующе, верою Тя, Богомати, ублажаем, вопиюще Рождеству Твоему: отец наших Боже, благословен еси. Песнь 8 Ирмос: Отроки благочестивыя в пещи рождество Богородичо спасло есть, тогда убо образуемое, ныне же действуемое, вселенную всю воздвизает пети Тебе: Господа пойте, дела, и превозносите Его во вся веки. Святая мученице Ирино, моли Бога о нас. Пострадала еси, Ирино блаженная, добле, и мучителя низложила еси, имущи пособие непобедимое, Владыки твоего силу, содействующую тебе, и Господа пойте, вопияла еси, и превозносите Его во веки. Святая мученице Ирино, моли Бога о нас. Юношескою любовию уязвена, во след твоего Жениха последовала еси, Сего страдания, мученице, и раны на теле твоем носящи и вопиющи: Господа пойте, дела, и превозносите Его во веки. Слава: Твое, еже в муках, терпение, Ирино венценосице, посмеяся суетию и безбожию надеющимся, славная, верою же пояше: Господа воспевайте, дела, и превозносите Его во веки. И ныне: Мудрость Божия всех хитрец, во Твое чрево, Богомати, всельшися, храм созда, разумен же и одушевлен Себе, и спасе мир, зовущий: Господа воспевайте, дела, и превозносите Его во веки. Песнь 9 Ирмос: Ева убо недугом преслушания клятву вселила есть; Ты же, Дево Богородице, прозябением чревоношения мирови благословение процвела еси. Тем Тя вси величаем. Святая мученице Ирино, моли Бога о нас. Окрест твоего Рачителя ликующи в вышних, добрая дево, испроси миру мир, Ирино, и согрешений оставление верою творящим память твою светоносную и священную. Святая мученице Ирино, моли Бога о нас. Внутрь тя чертога Христос яко мученицу и деву всели, идеже с девами радуешися и с мученическими воинствы, Ирино венценосице всехвальная, темже тя вси ублажаем. Слава: Двери отверз небесныя, прият душу твою всенепорочную един всеми Царствуяй, и правды Строитель, Ирино, божественнаго мира тезоименитая. Темже тя вси ублажаем. И ныне: Имущи к Твоему Сыну, Пренепорочная, дерзновение непостыдно, Сего умоли низпослати миру мирно устроение и всем Церквам единомышление, да Тя вси величаем. Моли Бога о нас, святая мученице Ирино, яко мы усердно к тебе прибегаем, скорой помощнице и молитвеннице о душах наших. (Поклон.) Тропарь, глас 4-й Агница Твоя, Иисусе, Ирина зовет велиим гласом: Тебе, Женише мой, люблю, и Тебе ищущи страдальчествую, и сраспинаюся, и спогребаюся крещению Твоему, и стражду Тебе ради, яко да царствую в Тебе, и умираю за Тя, да и живу с Тобою. Но яко жертву непорочну приими мя с любовию пожершуюся Тебе. Тоя молитвами, яко милостив, спаси души наша. Кондак, глас той же Слава: Девства добротами преиспещренна, дево, страдальчеством была еси краснейшая, Ирино, кровьми твоими истекшими обагрена, прелесть же низложившая безбожия. Сего ради и прияла еси почести победы рукою Создателя твоего. И ныне, Богородичен: Еже от века утаенное и Ангелом несведомое таинство, Тобою, Богородице, сущим на земли явися Бог, в неслитном соединении воплощаемь, и Крест волею нас ради восприим, имже воскресив первозданнаго, спасе от смерти души наша. Молитва мученице Ирине О многострадальная и преславная Ирино, невесто Христова всехвальная, угоднице Божия! Ты предстоиши у Престола Пресвятыя Трои¬цы и наслаждаешися неизреченнаго блаженства. Призри убо милостивно на нас, приносящих ти хвалебное пе¬ние сие, испроси нам милость, отпу¬щение грехов у Преблагаго Господа, вемы бо, воистинну вемы, яко вся, елико восхощеши, испросити у Него можеши. Темже убо смиренно припадаем к тебе и просим: умилостиви Владыку неба и земли, да подаст нам дух твоея ревности ко хранению свя¬тых Его заповедей, яко да возможем земное поприще в добродетельном житии проводити, райских селений унаследовати и тамо с тобою и всеми святыми прославляти Отца и Сына и Святаго Духа во веки веков. Аминь. |
|
|
|
|
|
|
