Богослужебные тексты, службы (видео и текст)
» Неделя 2-ая Великого Поста - Свт. Григория Паламы
к Дискуссиям
|
 Неделя 2-ая Великого Поста - Свт. Григория Паламы Тропарь Святаго, глас 8: Православия светильниче, Церкве утверждение и учителю, монахов доброто, богословов поборниче непреборимый, Григорие чудотворче, Фессалонитская похвало, проповедниче благодати, молися выну спастися душам нашим. Каноны два Триоди и Святаго Песнь 1. Ирмос: Колесницегонителя фараоня погрузи, чудотворяй иногда Моисейский жезл, крестообразно поразив и разделив море,- Израиля же, беглеца-пешеходца, спасе, песнь Богови воспевающа.: Припев: Слава Тебе Боже наш, слава Тебе. Восприемше теплыми слезами, блуднаго глас, Тебе Отцу всех и Богу припадаем, вопиюще: яко согрешихом от Тебе удалившеся, и блуду работавше, приими наше покаяние. Слава Тебе Боже наш, слава Тебе. Царское преобидев благородие, еже даровал еси мне, мене ради Слове, Человек бывый: люте осудихся угодити свиниям, греховным вкусом: но пощади мя Спасе, милосердием Твоим. Слава Тебе Боже наш, слава Тебе. На колену падающа мя, якоже первее блуднаго Владыко Господи, Ты притек приими, и рукама объем, подаждь ми образы Твоего спасения, вместо наемника Человеколюбче, паки Твоего сына сотворяя. Пресвятая Богородице, спаси нас. Богородичен: Богоявления Тобою сподобися Богорадованная, человеческое естество: едина бо ходатаица Дево, была еси Богу и человеком. Тем яко Божию Тя Родительницу вси достойно славим. Иный канон святаго, глас 4. Ирмос: Отверзу уста моя: Святителю Отче Григорие, моли Бога о нас. Риторов божественнии, и богословов изряднии, и языцы боговещаннии, приидите снидитеся в соединение, воспети по достоянию духоритора, божественнаго Григориа. Святителю Отче Григорие, моли Бога о нас. Столп веры, Церкве поборник, великий Григорий да восхвалится мною, всеизрядный пастырь Фессалонитский, красота чина иераршескаго воистинну. Святителю Отче Григорие, моли Бога о нас. Слава: От младенства возжелал еси лучшее житие, и совершенное отче от юности возлюбил еси мудрование, и купнонравен, и единомудрен показался еси тезоименствующаго тебе отче Григорие. И ныне: Буди ми Всенепорочная живота путь, наставляющий мя к Божественным селением: прельстихся бо, и к пропастем злобы поползнухся, от нихже мя возведи ходатайством Твоим. Песнь 3. Ирмос: Утверждей в начале небеса разумом и землю на водах основавый, на камени мя, Христе, заповедей Твоих утверди, яко несть свят, паче Тебе, Едине Человеколюбче. Слава Тебе Боже наш, слава Тебе. Убоявся моих дел, и далечнаго отшествия, и расточеннаго Твоего богатства, егоже иждих в блудных стремлениих, в покаянии к Тебе зову, Отцу и Богу моему: согреших, спаси мя. Слава Тебе Боже наш, слава Тебе. На земли согрешая, небесе убояхся: сице бо ми будет суд тогда препираяй, егда всяческая предстанут Слове, праведным судом Твоим судимая. Слава Тебе Боже наш, слава Тебе. Мрачная и скверная мя помышления питаху, егда от Тебе Спасе, далече бых блудный, ныне же зову Ти: согреших, согреших, спаси тепле прибегающаго милосердию Твоему. Пресвятая Богородице, спаси нас. Богородичен: Обожися Дево Адамово смешение: из чрева бо Твоего Бог плотоносец явися, Имже воззвани быхом от древняго осуждения, солгани надеждею древле обожения. Иный. Святителю Отче Григорие, моли Бога о нас. Струи Божественных учений твоих сохраняющии, всякия козни злославных избегаем, и вся избиваем твоими священными списаньми полки сих Григорие. Святителю Отче Григорие, моли Бога о нас. Премудрости буия злославных разрушил еси блаженне, премудрость Божию ипостасную имея в сердце твоем, еюже с шумом поразил еси гнилая сих шатания. Слава:Умертвив плоти тлеемыя всякое сладострастие премудре, постнически оживил еси души твоея движения, и сию Божественный орган Богословия показал еси. И ныне: В разуме ума и произволении, студное же и блудное житие прилежно возлюбих: но любовию Божественною мя свяжи, молитвами Твоими, Дево Богоневестная. Господи помилуй (трижды) Кондак, глас 4: Ныне время делательное явися, при дверех суд, востанем убо постящеся, принесем слезы умиления, милостынями, зовуще: согрешихом паче песка морскаго. Но ослаби Содетелю всех, яко да приимем нетленныя венцы. Слава: Прелесть попалил еси злославных премудре, веру изъяснил еси православных добре, и мир просветил еси. Отонудуже победоносный победитель показался еси, столп Церкве, истинный иерарх, моляся не престай Христу, спастися всем нам. И ныне, Богородичен: Скоро приими Владычице моления наша, и сия принеси Сыну Твоему и Богу, Госпоже Всенепорочная: погаси обстояния злославных языковредных, укроти козни, и низложи дерзость вооружающихся безбожных Пречистая, на рабы Твоя. Песнь 4. Ирмос: Ты моя крепость, Господи, Ты моя и сила, Ты мой Бог, Ты мое радование, не оставль недра Отча и нашу нищету посетив. Тем с пророком Аввакумом зову Ти: силе Твоей слава, Человеколюбче. Слава Тебе Боже наш, слава Тебе. Отметательное отеческих ми повелений богатство, еже ми даровал еси, в сладострастии иждив, бых Божественных дарований нищ окаянный. Темже кающася со исповеданием не омерзи мене Владыко Господи. Слава Тебе Боже наш, слава Тебе. Боголепно восприим нищету мене, далече Тебе древле бывшаго, Собою к Себе присвояеши, и освящаеши мя к веселию Человеколюбче: тело Твое Божественное Слове, воззвание мое, веселия творя. Слава Тебе Боже наш, слава Тебе. Да далече слезами непрестанными, вечныя муки избавимся, юже уготова Бог лукавым духовом, яко блудный, вопием: согрешихом Ти Отче, но приими вся прибегающия ны к Твоей милости. Пресвятая Богородице, спаси нас. Богородичен: Собезначальное Отцу Слово сый и Духу, от Неискусомужныя Девы раждается кроме закона: пребыв убо еже бе, пребыв же паки еже от нас прият. Во двою бо естеству един Сын есть, во обою храня естественное. Иный. Святителю Отче Григорие, моли Бога о нас. Отверз уста твоя отче премудре, Божественную премудрость проповедал еси, ейже поучался еси в сердце твоем присно, и Варлаама суетнаго несмысленна и безумна показал еси. Святителю Отче Григорие, моли Бога о нас. Зашел еси сладчайший в землю, солнце законом естества, возсияеши же утро со Христом солнце невечернее, вся назирая молитвами твоими. Слава: Яви благодать тебе блаженне Божий, похвалу и утверждение превелие православных, и пастыря благаго, и богослова втораго, и стада бодраго хранителя. И ныне: Ушеса мне отверзи душевныя Мати Божия, родившая прежде ушеса Отверзшаго глухому, и Божественным внимати словесем, и исполняти сподоби. Песнь 5. Ирмос: Вскую мя отринул еси от лица Твоего, Свете незаходимый, и покрыла мя есть чуждая тма окаяннаго? но обрати мя и к свету заповедей Твоих пути моя направи, молюся. Слава Тебе Боже наш, слава Тебе. Богатства и дарований Божественных лишихся, и в страну приидох благих животных гладом тая: но Ты мя Отче яко Благий, древния славы и сладости, благосердия ради Твоего, исполни. Слава Тебе Боже наш, слава Тебе. Помысл блуднаго, в блуде житие иждивша приимше, Отцу милостивому притецем, несумненною верою, и сокрушением сердца, яко да согрешений оставление приимем. Слава Тебе Боже наш, слава Тебе. Не косни душе моя, в дальней стране пребывающи: но тецы вскоре, Богу и Отцу исповедающися, да приимеши разрешение, ихже зле соделала еси житие изнуривши. Пресвятая Богородице, спаси нас. Богородичен: Светлый Тя облак, носяй Солнце правды, в Тебе носимое, Пречистая Дево вемы, неразумия тьму идольскую отгоняющее, и разумом истинным просвещающее. Иный. Святителю Отче Григорие, моли Бога о нас. Серпом словес твоих, и священными списаньми посекл еси ереси терновидныя, и плевел ложная прозябения, православия же благочестивая положил еси семена, священноначальне Григорие. Святителю Отче Григорие, моли Бога о нас. Словеса твоя всемудре, и честная списания суть роса Небесная, мед каменный, хлеб ангельский притекающим, питие, брашно, сладость, наслаждение, Григорие, и источник живыя воды. Слава: Общаго тя учителя познавает земля и море, столп священный православия, и оружеположницу Божественных догмат честную, премудраго богослова священнаго, сожителя, сопричастника, апостолом единонравнаго. И ныне: Струями умиления, скверны сердца моего Непорочная отмый Дево, и покаяния образы мне даруй, Твоими к щедрому Богу священными молении, Егоже неизреченно родила еси. Песнь 6. Ирмос: Очисти мя, Спасе, многа бо беззакония моя, и из глубины зол возведи, молюся: к Тебе бо возопих, и услыши мя, Боже спасения моего. Слава Тебе Боже наш, слава Тебе. Юнейший бых сын Твой, и богатство Твое зле иждих, удалением злаго жития, и благих Твоих лишаяся Человеколюбче, прихожду Тебе Отцу и Богу моему, и прошу прощения. Слава Тебе Боже наш, слава Тебе. Странничество безчеловечное получих, и пасти свинии осужден бых, яко мое расточих богатство, еже милостивно вскоре подал еси, и бых от всех наг: но Ты яко Бог мой ущедри. Слава Тебе Боже наш, слава Тебе. Не имам дерзновения Человеколюбче, воззрети и видети, согрешив на Небо, безмерную высоту, ни нарещися сын Твой, блудный: но ущедри мя туне, имеяй безмерную милость. Пресвятая Богородице, спаси нас. Богородичен: Несказанное Твое Рождество, и неизреченный рождества Твоего образ Девице, яко Бога выше ума раждаеши, девство нескверное имущи: тем Тя вси истинную Богородицу достойно славим. Иный. Святителю Отче Григорие, моли Бога о нас. Растерзася суетное шатание, и язык Варлаама безумнаго, словесы и велении, и разума остротою премудраго царя, и твоею, Григорие. Святителю Отче Григорие, моли Бога о нас. Божественную цевницу Духа, трубу яве проповедающую Божественныя тайны, Фессалонитскаго председателя, Богословский язык, песньми почтим. Слава: Людем иногда предводитель, яко столп огненный, веры враги попалил еси, верных же состояния просветил еси, богомудре отче Григорие. И ныне: Буди ми Всечистая Владычице, тишина и пристанище утешения, преводящее к Божественному пристанищу невлаемому, бурю страстей моих укротивши. Кондак святому, глас 8. Премудрости священный и Божественный орган, богословия светлую согласно трубу, воспеваем тя Григорие богоглагольниче: но яко ум Уму первому предстояй, к Нему ум наш отче настави, да зовем: радуйся проповедниче благодати. Икос Ангел явился еси на земли, неизреченная Божия человеком возвещая: безплотных бо гласы, от человеческих сый, и плотию употребляяся, удивил еси нас, и вопити тебе богоглаголиве увещал еси сия: радуйся, имже тьма сокрыся: радуйся, имже свет взыде. Радуйся, несозданнаго Божества ангеле: радуйся, созданнаго и буяго воистинну обличителю. Радуйся, высоту невосходимую, Божественное естество рекий: радуйся, глубину неудобь видимую, действо рекий: радуйся, яко славу Божию добре рекл еси: радуйся, яко мнения злодеев отрекл еси. Радуйся светильниче, показавый Солнце: радуйся чаше, пития Божественнаго подательнице. Радуйся, имже истина просиявает: радуйся, имже помрачися лжа. Радуйся, проповедниче благодати. Синаксарий. Стихи: Света светлаго проповедника ныне воистинну велия, Источник света, к Незаходимому водит Свету. Сей Божественнаго и невечерняго Света сын, истинный воистину Божий человек, и чудный Божественных слуга и служитель, отечество убо имеяше всех градов царствующее, родители же пресветлыя и славныя: не внешняго токмо и по чувству человека, но много паче внутренняго и невидимаго, добродетелию и наказанием украсити тщашеся. Малу же сущу зело возрастом тому, отец скончася: мати же его, и братию, и сестры в наказании и законе и священных писменех питаше же и наказаше, и внешней мудрости ко учителем посылаше, добре навыкати разуме. Той остротою естества тщание со учением смесив, вмале же всякую словесную хитрость получи. Егда же бе двадесяти лет, вся земная и соний хуждшая вменив, к виновному всякия мудрости и подателю Богу востещи искаше, и совершеншим житием всего себе Томужде возложити. Отонудуже и открывает боголюбезное намерение матери, и многую любовь к Богу своему, и разжженное желание: и оную подобне обретает сими болящую от долга времене, и о равных тому радующуюся. Абие убо мати дети к себе собравши, и се, аз и дети, с веселием рекши, яже ми даде Бог: мысль же их искушает, юже имут о добрых, и намерение великаго Григориа им открывает. Он же поущательная словеса к ним употребив, вмале вся покорны имяше, и к подобней ему любви и бежанию жития последующия прилежно. Отонудуже и сущая убогим евангельски раздав, любовь же царскую, и чести, и плескание сущее в царских, благодушно оставив, Христу последова. Матерь убо и сестры в девственнице сочинив, братию же взем, и святыни тезоименитую гору Афонскую достиг: но братию убо тогда во иных обителех пребыти увещавает, и понеже времени не дающу соединеным друг другу быти, и житие по Богу совершити. Сам же в покорение чуднаго некоего мужа, с безмолвием единому Богу живущаго предается, именем Никодима. У негоже всякой заповеди, всякой добродетели, во смирении души делы научився, и заступление Всечистыя Богородицы, и ко всем непоборимую помощь во откровении тайном тамо приим, по отшествии онаго к Богу, и в велицей лавре лета некая пожив, с великим тщанием и совершенным разумом, любовию безмолвия, от лавры отходит, и пустыню лобызает. Любовь же присно к любви приложив, и с Богом быти выну желая, крайнему жестоковождению себе издает, и вниманием убо прилежным всегда чувства удержав, к Богу же ум возвысив, и во все время молитвы упражнение, и о Божественных поучение сотворив, и житие управив изрядно. Демонския брани помощию Божиею всячески побеждает, и всенощными стояньми источники слез душу очистив, сосуд избранный даров Божияго Духа бысть, и Боговидения частая виде. И чуднейше, яко и прехождение ради исмаильтеских нахождений на Фессалонику, и в Верский скит отшед, и с некими гражданы понуждаемь беседовати. Таже по жительству прилежно прехождаше, в не малых убо летех, совершенно и тело и душу очистив, и Божиим велением велие помазание священства прият, и яко некий невещественный, и яко рещи вне себе быв, тайная сего совершив, яко токмо зримь, душам зрящих умилятися. Велий воистинну бе, и по Богу живущим духоносец познавашеся, являшеся же сицевый сый, и внешняя зрящим: державу имый на демоны, и от их прелести и коварства обладаемыя избавляя: неплодие древес, в благоплодие преложив. Будущая провиде, и иными Божественнаго Духа дарованьми же и плоды украшашеся. Понеже еже убо добродетели действовати, в нашей власти лежит: а еже во искушения впасти, несть в нас. Кроме же сих несть совершение, или явление веры к Богу, [сшедшее бо, глаголет, деяние и страсть, в блазе совершает по Богу человека] в различная и частая искушения пасти, великий сей попущается, да всеми, и совершен воистинну явится. А яже отвсюду, кий ум помыслит? кое изрещи возможет слово? Яже прежних большия козни лютаго борителя: и яже новоявленных богоборцов на него наветы, и клеветы, и елико о благочестии подвизася, во всех трех ко двадесятим летех, от тех претерпе озлобления и скорби различныя. Итальский бо зверь, Калаврийский Варлаам, внешнею мудростию велемудрствует, и суетою своих помышлений, вся помышляя ведати, лютую воздвизает брань на Церковь Христову, и на благочестивую нашу веру, и на держащия сию известно. Общую бо благодать Отца, Сына, и Святаго Духа, и свет будущаго века, якоже и праведнии возсияют яко солнце, яко и Христос предпоказа на горе возсиявый: и просто, всю силу и действо Триипостаснаго Божества и все разнствующее каковолибо буди Божественнаго естества, созданное быти умовредно научи, и благочестно несозданный мудрствующия Божественнейший оный свет, и всю силу и действо, яко ниединому сущу новому от пребывающих естественне в Бозе, словесы же и списаньми пространнейшими, двобожныя именова, и многобожныя, якоже иудеи, Савеллий же, и Арий именуют нас. Сих ради убо Божественный Григорий, яко благочестия поборник, и предстатель пресветлый, и прежде всех о сем и предборяся и оклеветаемь, послан быв от Церкве в Константинополь, и приходит. Божественнейшему убо царю Андронику о благочестии предзащищающу, четвертому от Палеологов, Собор священный собирается. И Варлааму пришедшу, и его предотметным злославным учением, и на благочестие оглаголанием, Духа Божия исполнися великий Григорий, и в силу необоримую облекся свыше, уста его на Бога отверстая загради, и до конца посрами: и огнедухновенными словесы же и списаньми, его хврастныя ереси, яко пепел сотвори. Темже и студа не претерпев благочестия ратник, к латином, отонудуже прииде, бегом отыде: по оном же абие многобедствии соборне изобличает, и списания сего словесы сопротивными разсыпает. А иже оных причастившеся пагубы, ниже тако престаша борити на Церковь Божию. Отонудуже и нуждею многою священнаго Собора, и самаго царя, и прежде Божественным велением уверився Григорий на архиерейский престол возводится, и Фессалонитския священныя Церкве пастырь поставляется. Темже и вящшия подвиги, многих преждних о Православней вере доблественне совершает и терпеливе. Лукавыя бо преемники Акиндина, и Варлаама, многия явльшияся и лютыя, и лютых зверей лютая рождения, и сих учения же и списания ни единожды, или дважды, или трижды, но многажды и многими, ниже при едином царе, или патриарсе: но при триех по преемству скиптров держащих, и патриарсех равночисленных, и Соборех неудобосчисляемых, словесы же и писаньми Богодухновенными, многовидно возвращает, и до конца побеждает. И нецыи непреложно имуще, нивочтоже полагающе Горний суд, тако пребыша: и всех бо ересей суть еще остатки безстудствующии на победивших я святых, да не глаголю вседерзый род иудейский, даже и до ныне имый неистовство на Христа: таковыя убо яко вкратце и толикия великаго Григориа победы на нечестивыя. Бог же неизреченными образы, и к востоку сего отсылает учителя. Посылается убо яко старейшина от Фессалоникии в Константинь град, примирити разнствующия цари. Поемлется же от агарянов, и держится во все лето, места от мест, и грады от градов, страдальчески преходя, и уча небоязненно Христову Евангелию. И овыя убо утверждая и увещавая, еще и моля в вере пребыти, колеблющияся же в ней, и некая недоумения и взыскания о бывших тогда предлагающия, Богомудренно утверждая, и исцеление, в нихже глаголаху, довольнейшее отдаяше. Прочим же неверным и окаянно отторгшимся христианом, и отлучившимся ко оным и влекущим наша о воплощенном смотрении Господа и Бога нашего, и о поклонении от нас честнаго Креста, и святых икон, многажды не обинуяся глаголаше. Еще же о Моамете (Магомете), и многих иных взысканиих от них предложенных, овыя убо имяше о себе дивящияся, овыя же на себе неистовствующия, и руки простирающия, иже и мученически скончали бы его, аще бы не Божиим промыслом, надеждею пенязей, юже имяху о нем, пощаден быв. Таже от христолюбивых свобождашеся великий, и к своему стаду мученик безкровный светло паки отходит. Ко иным многим и великим дарованием же и первенством, яже имяше, ранами Христовыми и той украсися, и яже Христова, по Павлу, имый в себе лишения. И да покажем некая онаго начертавающая, сия бяху его свойства: еже со превосхождением кроткое и смиренное, [зде не о Бозе и Божественных слово: ибо в сих и зело бе поборник] непамятозлобие зело и незлобие, еже тщатися по силе, благшим воздати, к нему в неких явльшимся злым. Еже отнюд удобно на некия не приимати словеса. еже к грядущим всегда напастем терпеливое и великодушное. еже всякия сласти, и тщеславия вышшее. еже худому присно быти, и неизбыточественному во всех потребах телесных, ибо в толикое воистинну время не изнемогшу. еже терпения безмолвное же и тихое, и присно благодатное, тако до края ему сотворено, яко и от внешних яве быти видящим всем, еже разумное присно, и внимательное же и неразливательное. Имже последовательное, еже никогда очесем его быти тщим слез, но болезновати сим по источником слез. Тако убо из начала даже до конца на страсти и демоны страдальчески подвизався, и от Христовы Церкве далече еретики изгнав, и Православную веру словесы же и списаньми изъяснив, и теми якоже печатию все Писание Богодухновенное запечатлев, яко его житие и слово якоже слову некоему быти и печати жития и слова святых. Еще же свое стадо о трех и десяти летех апостольски и Богоугодно упас, и нравными словесы украсив, и ко ограде небесней управив: и яко рещи, общий делатель явився живых же и потом будущих православных всех, к премирней жизни прелагается: пожив всех лет, три ко шестидесятим. И дух убо в руце Божии предлагает, тело же пастве оставляет, изрядно в конец просвещенное же и прославленное яко некий жребий и сокровище пречестное. Чудесы бо Христос на кийждо день верно приходящия благодействует и недугов всяческих изменение дарует, от нихже немало историа о нем поведает. Того убо молитвами Боже помилуй нас, аминь. Песнь 7. Ирмос: Божия снизхождения огнь устыдеся в Вавилоне иногда; сего ради отроцы в пещи радованною ногою, яко во цветнице, ликующе пояху: благословен еси, Боже отец наших. Слава Тебе Боже наш, слава Тебе. Дерзновения не имам, еже нарещися сын Твой, Отче Человеколюбче, яко единаго от наемник Твоих быти молюся, не гнушайся мене зовуща: отец наших Боже благословен еси. Слава Тебе Боже наш, слава Тебе. Осквернивше первым житием жизнь, и погубивше благородие первое, притецем Единому Отцу и Богу нашему, покаянием теплым прияти спасение. Слава Тебе Боже наш, слава Тебе. Жесток гражданин, емуже работати окаянный осудихся: глад же, егоже подъях, свиниям угождая, крепок и нестерпимь: но обращься прошу, Спасе, помилуй мя. Пресвятая Богородице, спаси нас. Богородичен: Умерщвленное естество оживила еси, едина Живот рождшая Дево Богородице: темже Тя спасение вернии свемы, отец наших Бога плотию рождшую. Иный. Святителю Отче Григорие, моли Бога о нас. Словесем беседующии, и списанием твоим Григорие, разуму поучаются Божию, и полны являются премудрости Божия духовныя, и несозданную благодать, и действо Божие богословствуют. Святителю Отче Григорие, моли Бога о нас. Меч и стрелы злославных сокрушил еси, и гордость Варлаамову, и всякую силу еретическую, яко ткание паучины расточил еси, аки камень превеликий иерарше. Слава: Запечатлеся твоими словесы и догматы вера благочестивых, и дерзость ереси ста Григорие, и низложение православия преста, и крепость злославных. И ныне: Струи Тя источника, усохшии страстей болезньми, ведуще воистинну, почерпаем спасение, и Божественныя струи, и взываем: благословен Всечистая, плод Твоего чрева. Песнь 8. Ирмос: Седмерицею пещь халдейский мучитель Богочестивым неистовно разжже, силою же лучшею спасены сия видев, Творцу и Избавителю вопияше: отроцы, благословите, священницы, воспойте, людие превозносите во вся веки. Слава Тебе Боже наш, слава Тебе. Безмернаго Владыко, и многаго милосердия Твоего, вемы богатство в Тя веровавшии. Темже Ти припадаем с блудным вси тепле: приими согрешившия, и к Тебе прибегшия: несть бо, несть грех Щедре, Твое человеколюбие победити могий. Слава Тебе Боже наш, слава Тебе. Милосердия ради Владыко Себе смирив, падшим Твоим сыном приближился еси: Сам бо Человеколюбче срел еси падших, и облобызаеши, и спасение даруеши: аще кто и долу паднет, милостив сый не гневаешися, яко Человеколюбец. Слава Тебе Боже наш, слава Тебе. Страшнейший суд мене усрящет о Владыко, яко Тя человеколюбца и незлобива зря, не притекаю к Тебе, блуднаго зовый гласом, но в лености житие препровождаю: Ты убо милостив буди ми, и осуждения онаго исхити Щедре, покаяния ради. Пресвятая Троице, Боже наш, слава Тебе. Троичен: Не три боги славим, но Едино Божество, три же воистинну Ипостаси чтим, Отца нерожденна, и рожденна Сына от Отца, и исходна от Отца Святаго Духа, Бога Единаго три, аще и звание коеждо, якоже Бог есть верно славимая. Пресвятая Богородице, спаси нас. Богородичен: От многих мя Всенепорочная напастей преклонена, и печалей бурею потопляема пристанище спасения, Твоею молитвою Пречистая избави, и от всех исхитивши спаси: да Тя достойно яко теплую предстательницу, славлю Богородицу во вся веки. Иный. Святителю Отче Григорие, моли Бога о нас. Предстоиши ныне престолу Всещедраго, яко богословов подобный, и сим единонравный всемудре Григорие, Фессалонитский председателю, иерархов доброто, светло украсився славою священноначалия, Богу и ныне служа. Святителю Отче Григорие, моли Бога о нас. Ведый чистое твоего помышления Бог, и прежде чрева, и прежде зачатия, верному возглагола божественному царю яве, Церкве необоримаго быти тя поборника: темже правильным извеством, миром запечатлен еси священноначальства. Слава: Побеждается яве и бедствует собрание Поликиндина дланию твоею, и мудрыми твоими глаголы, преславне Григорие, Фессалонитский председателю: и яко исчезает дым, исчезе гнилое безумие, твоим громогласным и Богословным языком. И ныне: Слово Божие в Тебе Дево, человеческое естество погружаемое страстьми, возобрази крайнею благостынею: и все обнови и посвяти: темже Тобою спасени, Тя славословим во вся веки. Песнь 9. Ирмос: Ужасеся о сем небо, и земли удивишася концы, яко Бог явися человеком плотски, и чрево Твое бысть пространнейшее небес. Тем Тя, Богородицу, Ангелов и человек чиноначалия величают. Слава Тебе Боже наш, слава Тебе. Радости и веселия ныне, мене ради заклавшемуся Твоему тельцу, исполни сего от Тебе чающую мою душу Боже: заблуждена приими мя, и умерщвлена к жизни возведи, и в Божественную одежду спасения, в нетление мя облецы. Слава Тебе Боже наш, слава Тебе. Души удаленыя от Бога, и Божественных дарований лишеныя, приидите тепле, и блуднаго обращение восприимше зовем: Отче Благий, Иже на Небесех, согрешихом Ти вси, очисти и спаси прибегающия к милости Твоей. Слава Тебе Боже наш, слава Тебе. Яко имый милосердия множество многое, не гнушайся мене Господи Господи, во многих сластех богатство иждивша, и прибегающа ныне, и зовуща блуднаго гласом: согреших Ти, спаси прибегающаго к милости Твоей. Пресвятая Богородице, спаси нас. Богородичен: Спасения пристанище и наставление, и предстательницу Тя имам раб Твой, лютых всех препятий, яко благая к Богу мольбами Твоими Владычице да избавлюся: яко на Тя всю мою надежду возложих любовию, да верою величаю Тя. Иный. Святителю Отче Григорие, моли Бога о нас. Зерцало Божие был еси Григорие: еже бо по образу нескверное соблюл еси, ум же владыку на страсти плотския мужески поставив, еже по подобию восприял еси. Отонудуже дом был еси Святыя Троицы светлейший. Святителю Отче Григорие, моли Бога о нас. Царь благочестивый крилатаго тя воздухоходна показует, сему споборствующа, яко всего исполнена Божественнаго Духа, на суемудреннаго неистовствующаго Варлаама, глаголющаго на высоту неправедная Богу, егоже праведно победил еси. Слава: Весь быв премудрости лучшия исполнен преславне, свет мирови просветил еси, православия источив догматы: дружеством бо изряднаго любомудрия премудре, Божественный страх во чреве зачал еси, и словеса Духа породил еси. И ныне: Песнь Тебе вернии согласно приносим благодарения: Ты бо древнюю разрушила еси нашу клятву Богородительнице, и благословение вси Божественное приемлем, спасение, просвещение, и милость Тобою, и радость вечную. Господи помилуй (трижды) Ексапостиларий Радуйся отцев похвало, богословов уста, безмолвия селение, премудрости доме, учителей крайность, пучино слова. Радуйся деяния органе, видения крайность, и исцелителю недугов человеческих. Радуйся Духа храме, и умерый и живый отче. Слава и ныне: Владычице, всех Владычице, и всех вышшая, всех же превосходящая горних воинств, простри руку державну, и сохрани мир, священники благослови Тебе священнодействующия, монахи же прости, молящия Тебе. Люди вся умири, и сущия в палате: воинство же укрепи во время брани: сей град соблюди, святая Богородице. И ныне нас сподоби видети Небесное Царство, и райскую дверь, егда сядет Судия судити вселенней, во втором и страшном судилищи, Владычице ангелов. |
|
|
|
|
|
|
