Богослужебные тексты, службы (видео и текст)
» Канон об усопших, чит. в мясопустную субботу
к Дискуссиям
|
ВЕЛИКИЙ КАНОН, ПОЕМЫЙ В СУББОТЫ МЯСОПУСТУЮ И ТРОИЦКУЮ
Канон же поем святаго обители на 6: И триоди на 8. Поет же ся и вторая песнь без стихословия. И песни псалтира. Канон Студита творение, в Троичных и Богородичных тропарех краестрочие: Недостойнаго Феодора. Глас 8. Песнь 1. Ирмос: Песнь возслем людие: Вси помолимся Христу, творяще память от века мертвых, да вечнаго огня избавит я в вере усопшыя, и надежде жизни вечныя. Упокой, Господи, душу усопших раб Твоих. Глубиною судеб Твоих, Христе, всепремудре Ты предопределил еси коегождо кончину жизни, предел и образ. Темже яже покры гроб во всякой стране, на суде спаси, Всещедрый. Упокой, Господи, душу усопших раб Твоих. Пределы жизни нашея давый, темже усопшыя от житейскiя нощи, дне невечерняго сыны покажи Господи, священники православныя, и вся верныя люди Твоя. Упокой, Господи, душу усопших раб Твоих. Яже покры вода, и брань пожат, трус же яже объят, и убийцы убиша, и огнь яже попали, верныя, Милостиве въ части учини праведныхъ. Упокой, Господи, душу усопших раб Твоих. Вся презираяй плотския долги нашя Спасе наш, во всяком возрасте всего рода человеча, пред судищем твоим постави неосуждены, Тебе Создателю отвещающыя. Слава, Троичен: Триединаго естества пою, Лица Самоvпостасная, Нерожденна Отца, Сына Рождшагося, и Духа Святаго: Безначальное Царство, Власть, Божество Едино. Богородичен: Воистинну Ты явилася еси небо на земли, большее Вышняго Небесе, Безневестная Дево: из Тебе бо возсiя Солнце въ мiре, владычествуяй правдою. Катавасиа: Песнь возслем людие чудному Богу нашему, свободившему Израиля от работы, песнь победную поюще и вопiюще: поим Тебе Единому Владыце. Песнь 2. Ирмос: Видите видите, яко Аз есмь Бог ваш, прежде век рожденный от Отца, и от Девы в последняя без мужа заченшийся и разрушивый грех праотца Адама, яко Человеколюбец. Упокой, Господи, душу усопших раб Твоих. Видите, видите, яко Аз есмь Бог ваш, преведным судом водрузивый пределы жизни, в нетление от тли приемляй вся усопшыя в надежди вечнаго Воскресения. Упокой, Господи, душу усопших раб Твоих. От четырех конец Господи, приемляй верно усопшыя, в мори, или на земли, или в реках, источницех, или езерех, или в ровенницех снедь зверем бывшыя, и птицам, и гадом, вся упокой. Упокой, Господи, душу усопших раб Твоих. В Твоей длани всяческая Господи, предразсудил еси, разрешшыяся в составы четыри: в пришествии Твоем собрал еси воскреси, вся яже в неведении, и разуме, прощая тем прегрешения. Упокой, Господи, душу усопших раб Твоих. О страшнаго Твоего втораго, Господи, пришествия! Зане яко в виде молнии на землю пришед, воздвигнеши все создание Твое судитися, в вере Тебе тогда поживших, сретших Тя с Тобою быти сподоби. Слава, Троичен: Пресовершенная Единице, Божественная, Триипостасная, нерожденне Отче и Сыне Единородне, Душе от Отца исходяй, Сыном же являяся: Существо едино и Естество, Господьство, Царство, спаси всех нас. Богородичен: Неизглаголанное чудо Твоего Рождества Мати Дево: како бо и раждаеши и чиста еси в томже; како Отроча раждаеши, и не веси искуса мужеска отнюд; якоже весть паче естества от Мене новолепно Слово Божие Рождшееся. Катавасия: Видите видите, яко Аз есмь Бог ваш, прежде век рожденный от Отца, и от Девы в последняя без мужа заченшийся и разрушивый грех праотца Адама, яко Человеколюбец. Песнь 3. Ирмос: Утвepждей pукою Твoею: Прешедшыя жития течение, в славе благочестной праведным одеятися венцем сподоби Боже, и вечных благ насладитися. Упокой, Господи, душу усопших раб Твоих. Напрасно восхищенныя, попаляемыя от молнии, и измерзшыя мразом, и всякою раною, упокой Боже, егда огнем вся искусиши. Упокой, Господи, душу усопших раб Твоих. Присномутное жития море преплывшыя Христе, в нетленное Твоего жития сподоби пристанище притещи, православным житием окормленныя. Упокой, Господи, душу усопших раб Твоих. Ихже всякое естество морских и птиц небесных прият снедение Христе, Твоими судьбами, воскреси Боже, в последний день со славою. Слава, Троичен: Умно Божественную Единицу, в три лица просто купно еже пресещи совокупляю несекомая: якоже бо скорость молнии, трисияющая видится во единстве. Богородичен: Недоуменное Твое чудо: без мужа бо раждаеши, и девство Твое, Чистая, соблюдаеши рождши. Темже ангел множество, и человеческий род поет Тя во веки. Kaтaваcиa: Утвepждей pукою Твoею, Cловe Божий небеса, пpocвещениeм Твoeго иcтиннaго пoзнания, утвepди и наc нa Тя нaдеющиxcя cepдца. Седален, глас 5: Подобен: Собезначальное Слово: Нас ради претерпевый крест и смерть, и умертвивый ад, и совоскресивый мертвыя, преставльшыяся от нас Спасе, упокой, яко Человеколюбец Бог, и в трепетное и страшное пришествие Твое Жизнодавче, яко имеяй множество милоcти, царствия Твоего сподоби. Слава, тойже. И ныне, Богородичен: Скорый Твой покров, и помощь и милоcть покажи на рабех Твоих, и волны Чистая, укроти суетных помышлений, и падшую душу мою возстави Богородице: вем бо, вем Дево, яко можеши, елика и хощеши. Песнь 4. Иpмoc: Из горы приосененныя: Отцы и праотцы, деды и прадеды, от первых и даже до последних, во благозаконии умершыя и благоверии, вся помяни Спасе наш. Упокой, Господи, душу усопших раб Твоих. В горе, на пути, на местех пустых житие оставльшыя в вере, монахи же и бельцы, юношы и старцы, со святыми Христе всели. Упокой, Господи, душу усопших раб Твоих. От печали и радости прешедшыя ненадежно, верою абие пременившыя житие, в благоденствии пострадавшыя, или злоденствии, вся упокой Спасе наш. Упокой, Господи, душу усопших раб Твоих. Яже уби мечь, и конь совосхити, град, снег и туча умноженная: яже удави плинфа, или персть посыпа, Христе Спасе наш упокой. Слава, Троичен: Странно яко Едино, и Три, Божество все по единому лицу нераздельно: Отец бо, Сын, и Дух Святый есть покланяемь, яко Един Бог. Богородичен: Направи нас Дево, молитвами Твоими, окормляющи обуреваемыя волною греха, во спасительная пристанища, Господородительнице, избавляющи от всяких лютых. Kaтaваcиa: Из гopы пpиоcененныя Cловe, пророк, единыя Богородицы, xoтящe вoплoтитиcя, богoвидно уcмoтpи, и co cтpаxoм cлaвocловяшe cилу Твoю. Песнь 5. Иpмoc: Утренюет дух мой: Коегождо память умерших благочестно от века днесь творяще Господи, прилежно Ти вопием: вся упокой со святыми Твоими. Упокой, Господи, душу усопших раб Твоих. От всякаго, яже приял еси, рода и рода в царех, в князех, или монашествующих православныя, щедре, вечнаго избави мучения. Упокой, Господи, душу усопших раб Твоих. Всех яже создал еси полезная ведый, имже попустил еси Господи, внезапными падежьми ненадежно умрети, избави муки всякия Боже наш. Огня присно палящаго, и от тьмы несветимыя, скрежета зубнаго, и червия безконечно мучащаго и всякаго мучения избави Спасе наш, вся верно умершыя. Слава, Троичен: Единопрестольная, Безначальная, Триvпостасная Единице, разделением единство, и вопротив лицы естество имущая, во едино нас совокупи хотение Твоих заповедей. Богородичен: Средь огнезрачных серафимов явилася еси Чистая Честнейшая, порождши сим неприступнаго Спаса, воплощением обожившаго земнородных смешение. Катавасиа: Утренюет дух мой к Тебе Боже, зане свет повеления пришествия Твоего: имиже убо озари ум наш Владыко, и настави на стезю жизни. Песнь 6. Иpмoc: Содержима мя: Смерти разрешив болезни, пострадав Начальниче жизни Боже наш, усопшыя от века рабы Твоя упокой. Неизглаголанными Твоими судьбами, яже убиша чаровная напоения, отравы, костная удавления, со святыми Господи упокой. Упокой, Господи, душу усопших раб Твоих. Егда судити будеши всяческим, стоящым нагим и откровеным пред лицем Твоим: тогда Щедре, пощади послужившыя Ти верно Боже. Упокой, Господи, душу усопших раб Твоих. Последнею убо трубою вострубившу Твоему архангелу, в воскресение жизни всех, тогда Христе, рабы Твоя упокой. Упокой, Господи, душу усопших раб Твоих. От века яже Иисусе еси верныя Боже, род всякий человеческий сподоби, во веки со служащими Тебе, славити Тя. Слава, Троичен: Богоначалие Трисвятое, Единопрестольное, Отче, Сыне со Святым Духом, Ты еси Бог мой, вседержительством Твоим содержай все. Богородичен: От корене твоего возсия цвет жизни, Иессее праотче взыграй спасаяй мiр, от Чистыя Отроковицы Христос Бог. Катавасиа: Содержима мя приими Человеколюбче, грехи многими и припадающа щедротам Твоим, яко пророка Господи, и спаси мя. Кондак: Со святыми упокой Христе, душы раб твоих, идеже несть болезнь, ни печаль, ни воздыхание, но жизнь безконечная. Икос: Сам Един еси Безсмертный, сотворивый и создавый человека: земнии убо от земли создахомся, и в землю пойдем, якоже повелел еси, создавый мя и рекий ми: яко земля еси, и в землю отыдеши: аможе вси человецы пойдем, надгробное рыдание творяще песнь. Песнь 7. Иpмoc: В начале землю основавый: Благочестно от века преставльшихся память творяще, вопием: благословен еси во веки, Господи Боже отец наших. Упокой, Господи, душу усопших раб Твоих. Внезапу благочестно умершыя, и от стремнины всяческия падшыя, древа, железа, всякаго камене, упокой Боже усопшыя верныя. Упокой, Господи, душу усопших раб Твоих. В страшное Твое пришествие Щедре, одесную овец Твоих постави, православно Ти в жизни послужившыя Христе, и преставльшыяся к Тебе. Упокой, Господи, душу усопших раб Твоих. В лице Христе, избранных Твоих вчини Твоя рабы, вопити Тебе: благословен еси во веки, Господи Боже отец наших. Упокой, Господи, душу усопших раб Твоих. От земли персть содетельствовавый, плоть духом оживотворивый, Спасе Щедрый, яже приял еси, упокой Боже, в нестареющем животе. Слава, Троичен: Якоже треми солнцы Божество, единым света срастворением да воспоется, Отец, и Сын, и Божественный Дух, един естеством, но три Ипостасьми. Богородичен: Давидское согласно воспеваем Ти пение, гору Тя Божию нарицающе Дево, в Нейже вселився плотию Слово, обоготвори нас духовно в Себе. Катавасeя: В начале землю основавый, и небеса Словом утвердивый, благословен еси во веки, Господи Боже отец наших. Песнь 8. Иpмoc: На горе святей прославльшася: Сокрушивый первее сень смертную, возсияв яко солнце из гроба, сыны Воскресения Твоего сотвори, Господи славы, вся умершыя в вере, во веки. Упокой, Господи, душу усопших раб Твоих. Безвестных и сокровенных Сведетелю, егда имаши открыти дела тьмы и советы сердец наших, тогда не истяжи слова со всеми верою усопшими. Упокой, Господи, душу усопших раб Твоих. Егда имаши сести на престоле, и повелиши на суд предстати, собранным трубою от конец земли: тогда пощади всех Христе, яко Милоcтивый. Упокой, Господи, душу усопших раб Твоих. Умершым напрасно от случаев, от клича же зельнаго и скораго течения, заушения, удавления же, и лягания, Господи славы, верою усопшым ослаби во веки. Благословим Отца и Сына, и Святаго Духа, Господа. Яко единицу существом пою Тя, яко Троицу лицы Тя чту: Отче, и Сыне, и Душе Пресвятый, безначальную державу Твоего Царствия славлю во веки. Богородичен: Струи живыя источник запечатленный, показалася еси Богородице Дево: без мужа бо Господа рождши, безсмертия верныя напаяеши водою во веки. Хвалим, благословим: Иpмoc: На горе святей прославльшася, и в купине огнем Приснодевы Моисеови тайну явльшаго, Господа пойте и превозносите во вся веки. Песнь 9. Иpмoc: Проявленное на горе законоположнику: Идеже есть веселящихся жилище святых Твоих Господи, вся от века усопшыя, в вере же и надежди радоватися сподоби. Упокой, Господи, душу усопших раб Твоих. Умершыя Божиим прещением, смертных громов всяких с небесе изнесенных, земли разседшейся, морю возшумевшуся, вся верныя Христе, упокой. Упокой, Господи, душу усопших раб Твоих. Всякий возраст, старцы и юныя, младенцы и дети, и ссущыя млеко, мужеское естество и женское, упокой Боже, яже приял еси верныя. Упокой, Господи, душу усопших раб Твоих. От ядовитых угрызений умершыя, от поглощения змиев, от попрания коней, и от удавления, и обешения от искренняго, верою Ти послужившыя упокой. Упокой, Господи, душу усопших раб Твоих. Коегождо по имени в вере умершыя, от века и от рода родов, неосужденно предстати Тебе Слове, в пришествии Твоем сподоби. Слава, Троичен: Единый в Троице Боже, слава Тебе непрестанно: аще бо и Бог кийждо, но един естеством есть, Отец, и Сын, и Дух, трисветлыми свойствы. Богородичен: Паче ума Рождество Твое: раждаеши бо прежде Сущаго, и млеком питаеши несказанно, Пищедавца мiру: держиши же Содержащаго вся, Христа Единаго Избавителя нашего, Всенепорочная. Катавасиа: Проявленное на горе законоположнику во огни и купине Рождество Приснодевы, в наше верных Спасение, песньми немолчными величаем. Подобен: Небо звездами: Живыми и мертвыми обладаяй яко Бог, упокой Твоя рабы в селениих избранных: аще бо и согрешиша, Спасе, но не отступиша от Тебе. Слава: Другий. Подобен: Жены услышите: Упокой рабы Твоя во стране живых Господи, отонудуже отбеже болезнь, печаль вкупе и воздыхание: очисти яко Человеколюбец, яже в житии согрешиша: Един бо Безгрешный еси и Милоcтивый, мертвых и живых Владыка. Богородичен: Марие Богоневесто, Христа непрестанно моли о нас рабех Твоих, с Богоглаголивыми пророки, и мученик соборы, иерархи же и преподобными, и всеми праведными, снаследники быти Небеснаго Царствия. |
|
|
|
|
|
|
