Богослужебные тексты, службы (видео и текст)
» Канон преподобному Силуану Афонскому
к Дискуссиям
|
 Канон преподобному Силуану Афонскому Память празднуем 11 (24) сентября Тропарь, глас 4-й Сладостию Духа напаяемь и теплотою Христовы любве согреваемь с плачем искал еси Христа в житии твоем, и Того Смиренна и Кротка слезами изобразил еси в нас, умильно зовущих ти: печалию твоею исполнихомся веселия нетленнаго, Силуане, утешителю наш и молитвенниче вселенныя. Ин тропарь, глас 2-й Плачущим сокровенное радование, боримым защитниче и сирым помощниче, нищих и убогих покровителю, заступник за простыя и смиренныя люди, и всему миру печальник ты еси, потщися избавити ны от бед и напастей, Силуане отче наш, яко обнищахом зело во гресех. Канон Глас 8-й Песнь 1 Ирмос: Воду прошед, яко сушу, и египетскаго зла избежав, израильтянин вопияше: Избавителю и Богу нашему поим. Припев: Преподобне отче наш Силуане, моли Бога о нас. Скорбьми и болезньми обремененнии к тебе прибегаем, Силуане отче наш, утешения ищуще: о носителю дивный Духа Святаго, одожди сердца наша росою умиления. Преподобне отче наш Силуане, моли Бога о нас. Книгу твою, одушевленную дыханием Духа, яко залог нетленныя отеческия любве оставил еси нам, юже чтуще мним слышати твой тихий глас, взывающий нас от бездны греха к исправлению жития. Слава: Охладе любы многих за умножение беззакония, и мраз нощи безлунныя объят нас, но вжег светильник молитвы твоея, отче, разреши мглу страстей и согрей сердца наша сладчайшим светом милости Божия. И ныне: Радость всех скорбящих, алчущим питательница, бездомных светлая обитель, обуреваемым тишина Ты еси, Владычице, со преподобным Силуаном не престай молитеся, да познают вси людие Сына Твоего Духом Святым. Песнь 3 Ирмос: Небеснаго круга Верхотворче, Господи, и Церкве Зиждителю, Ты мене утверди в любви Твоей, желаний краю, верных утверждение, Едине Человеколюбче. Преподобне отче наш Силуане, моли Бога о нас. Буди нам отец и покровитель, Силуане благосердне, отри слезы беззащитных сирот, прохлади души, изнемогающия тяготами житейскими, и всем даждь разумети, что есть отрада Господня. Преподобне отче наш Силуане, моли Бога о нас. Яко глубочайший сосуд, исполнь даров Пресвятаго Духа, изливай нам тишину Божественную, яко буря злых обдержит ны, и вопием ти от сердца: умири жизнь нашу миром Христовым, преподобне. Слава: Щадити всех и вся учил еси, верный органе Святаго Духа, и ныне невидимою рукою прикоснися очесем нашим, да узрим славу Божию в братии нашей, и потечет, яко поток огненный, молитва, милующая всякую тварь. И ныне: Именем Твоим, Владычице, горы искапают сладость, холми яко агнцы взыграются, и земнороднии вси радости неизглаголанныя исполняемся, зряще Тя, ширшую небес и чистшую светлостей солнечных, осеняющую мир милосердием Твоим. Господи, помилуй (трижды). Седален, глас 4-й Жаждею по Бозе возревновав, отче наш Силуане, землю отеческую оставил еси и со пустыннолюбцы Горы Афонския длани твоя поработати Господеви всеусерднейше распростерл еси. Идеже равноангельными труды твоими вертоград Владычицы мира преукрасил еси и, яко миро благовонное, Церкве вселенстей возблагоухал еси, лозо винограда новаго, Духом Святым облагодатствованная. Слава, и ныне: Несть исчислити возможно величия Твоя, Богородице, ниже изрещи неизследимую паче ума глубину чудес Твоих, совершаемых присно, любовию Тя чтущим и верою покланяющимся, яко воистинну Бога рождшей. Песнь 4 Ирмос: Услышах, Господи, смотрения Твоего таинство, разумех дела Твоя и прославих Твое Божество. Преподобне отче наш Силуане, моли Бога о нас. Хлебом жизни укрепи руце ослабленныя и колена разслабленная, Силуане, яко уны дух наш от страха и чаяния грядущих на вселенную; да утешатся малодушнии зрением Господа всепрощающа и не убоятся ктому, имуще Христа крепкаго поборника. Преподобне отче наш Силуане, моли Бога о нас. Ныне зряй непостижимо красоту Лица Господня и наслаждаяйся райския доброты, не гнушайся безобразия нашего, отче, но дай помысл умиления, да покаянием обрящем паки образ Христова благолепия. Слава: Аще и время твоих скорбей прейде, Силуане дивне, обаче утробою Христовою не престаеши сострадати нам, бедствующим на земли, и во свете невечернем приносиши о нас слезы неизреченныя любве, ихже ради вси сладости утешения исполняемся. И ныне: Сыны Твоя нарече нас распятый Господь, Чистая, темже от греховныя тьмы избавльшихся яви нас воистинну чада Божия, да со дерзновением воззовем: «Отче наш Небесный, слава Тебе, благоволившему породнити нас Страстьми Христовыми». Песнь 5 Ирмос: Просвети нас повелении Твоими, Господи, и мышцею Твоею высокою Твой мир подаждь нам, Человеколюбче. Преподобне отче наш Силуане, моли Бога о нас. Уязвленныя страстьми многими не презри нас, отче, яко близ есмы отчаяния, но милосердне обвяжи раны наша, и слезами пречистыми покажи ны паки паче снега чистейшия. Преподобне отче наш Силуане, моли Бога о нас. Тек орел на высоту смирения, вещим взором приникаеши в глубины богословия, и нам, слепым, даруй прозрение Духом Святым, отче, да исполнимся Божественных догматов и православно прославим Троицу Единосущную во веки. Слава: Егда удари Моисей жезлом камень, потекоша воды в пустыни, и ныне ты, отче, острием словес твоих уязви ожесточенная сердца наша, да напоимся струями живоносными, и возсияет нам из купели слезныя чудотворный Свет Воли Божией. И ныне: Шипок тайный рая Богоматерняго, на Горе Святей прозябший, ныне благоухаеши вселенную всю ученьми твоими, мудре, и нам погибающим от яда тлетворнаго буди воня Христова в живот вечный. Песнь 6 Ирмос: Молитву пролию ко Господу и Тому возвещу печали моя, яко зол душа моя исполнися и живот мой аду приближися, и молюся, яко Иона: от тли, Боже, возведи мя. Преподобне отче наш Силуане, моли Бога о нас. Источник жизни помози найти заблуждшим в пустыни мира, и нас притекающих к тихим струям словес твоих, Силуане Богомудре, напой реками воды живыя, истекшими от чрева твоего. Преподобне отче наш Силуане, моли Бога о нас. Слез наших не премолчи, Силуане блаженне, якоже сам в житии твоем в плаче истаяваем, познал еси томление души отпадшия от Бога, темже явися ныне помощник державный всем сокрушенным скорбьми житейскими. Слава: Имуще тя питателя жизни нашея, Силуане милостиве, вопием: «Дай нам пищу благодати, яко глад Божий постиже нас, отче, дай нам, жаждущим, живую воду богоразумия Духом Святым, и в теплую ризу облецы ны любве Божественныя». И ныне: Людие да веселятся, осеняемии тайным пришествием Богоматере, покрывающия вся скорби земли, к Нейже души наша влекутся непрестанно любовию, ублажающе Ю гласы твоими, Силуане, яко радость и упование наше. Господи, помилуй (трижды). Слава, и ныне: Песнь 7 Ирмос: От Иудеи дошедше отроцы, в Вавилоне иногда верою Троическою пламень пещный попраша, поюще: отцев Боже, благословен еси. Преподобне отче наш Силуане, моли Бога о нас. Угаce в нас огнь благодати и небо затворися нам, но даждь нам помощь от скорби, Силуане, отче наш, и просвети нас пети во смирении и любви даже до последняго издыхания: благословен еси, Боже отец наших. Преподобне отче наш Силуане, моли Бога о нас. Адовы ужасы, яко скимни, обыдоша нас, но моления твоя стяжахом яко покров Божественный, имже покрываеши нагия дерзновения, отче милостиве, и сердца согреваеши печалию греховною унывающая. Слава: Неописаннаго смирения Христа Бога вкусивый, во вся дни живота твоего смирялся еси жестко, отче, и нас научи стяжати кроткаго и смиреннаго духа, да не погубим благодати ктому и не возрыдаем о ней адамовым рыданием. И ныне: О всепетая Мати, рождшая всех святых святейшее Слово, вдохнови нам слово пламенное, да сынолепне воспоем милость Твою, еюже матерски болезнуеши о скорбящем мире, якоже возвести нам Силуан, таинник Твой. Песнь 8 Ирмос: Царя Небеснаго, Егоже поют вои Ангельстии, хвалите и превозносите во вся веки. Преподобне отче наш Силуане, моли Бога о нас. Милующее вемы сердце твое, Силуане, яко на земли тайно научаемь Духом Святым, выну скорбел еси о грешницех, в молитвах проливая слезы о них, темже утробу твою сострадательную ныне отверзи и нам, сирым твоим. Преподобне отче наш Силуане, моли Бога о нас. Молитвою слезною укрепи нас утреневати от нощи греховныя, Силуане отче наш, и во свете нетленныя любве, веселыми ногами пойдем с тобою за утренней Звездою, Христом, славяще Его во вся веки. Преподобне отче наш Силуане, моли Бога о нас. Идеже любы, тамо и печаль, яко любы присно состраждет, темже, отче милостиве, пой нам, скорбящим на земли, песнь, ейже научи тя Дух Святый, и расширится сердце наше тещи путь крестный даже до конца. Слава: Лики Ангельскими неизреченно воспеваемую, ныне зриши во славе Матерь и Деву, Юже умоли, любоблагоутробне, ниспослати нам Богородичную благодать, еже Матерним сердцем болезновати о всех, яко о присных детех. И ныне: От змея грехвнаго Симеона юнаго спасла еси, Мати, на стези покаяния наставивши, и души наша, иссохшия от горести уныния, наслади посещением Твоим и исправи, яко жезл, непорочно сохранити пути жестоки, любве ради Сына Твоего. Песнь 9 Ирмос: Воистинну Богородицу, Тя исповедуем, спасеннии Тобою, Дево Чистая, с Безплотными лики Тя величающе. Преподобне отче наш Силуане, моли Бога о нас. Се вся земля скорбит и взывает ти гласом нашим, отче всемирне: научи нас смирити себе и любити враги, да вселится в ны Дух Святый и обрящем Небесное Царство с тобою. Преподобне отче наш Силуане, моли Бога о нас. Труждаяйся паче человека, пророчески приял еси во чреве, страха ради Господа, и поболел и родил еси нам духа спасения Божия, имже веселиши многия, отче, и росою слез твоих исцелиши вся поющия ти: радуйся, Силуане, утешителю наш. Преподобне отче наш Силуане, моли Бога о нас. Изнеможе всякое слово, и токмо воздыхания сердечная оставишася нам, но глаголы твоя украдше, приносим ти последний сей глас: Силуане, отче наш, моли о нас, детех твоих ныне и в час судный, да будем с тобою на небесех, слышаще песни, яже поются Духом Святым. Слава: Видел еси Свет истинный, приял еси Духа Небеснаго, таинниче благодати, да свободимся и мы тобою от всякия прелести, Силуане, и научимся покланятися Живоначальней Троице Духом и истиною. И ныне: Елей светильника нашего оскуде, и мрак смертный найде на нас, но возсиявши, Пречистая Заре, введи ны в Чертог Христов, да причастницы будем Тайныя Вечери Агнца со отцами нашими и с Тобою, Девственная Радосте небесных и земных. Молитва О предивный угодниче Божий, отче Силуане! По благодати, тебе от Бога данной, — слезно молитися о всей вселенней — мертвых, живых и грядущих — не премолчи за нас ко Господу, к тебе усердно припадающих и твоего предстательства умильно просящих. Подвигни, о всеблаженне, на молитву Усердную Заступницу рода христианскаго, Преблагословенную Богородицу и Приснодеву Марию, чудно призвавшую тя быти верным делателем в Ея земном вертограде, идеже избранницы Божии о гресех наших милостива и долготерпелива быти Бога умоляют, во еже не помянути неправд и беззаконий наших, но, по неизреченней благости Господа нашего Иисуса Христа, ущедрити и спасти нас по велицей Его милости. Ей, угодниче Божий, с Преблагословенною Владычицею мира — Святейшею Игумениею Афона и святыми подвижниками Ея земнаго жребия испроси у святых Святейшаго Слова Святей Горе Афонстей и боголюбивым пустынножителем ея от всех бед и наветов вражиих в мире сохранитися. Да Ангелы святыми от зол избавляеми и Духом Святым в вере и братолюбии укрепляеми, до скончания века о Единей, Святей, Соборней и Апостольстей Церкви молитвы творят и всем спасительный путь указуют, да Церковь Земная и Hебесная непристанно славословит Творца и Отца Светов, просвещающи и освящающи мир в вечней правде и благости Божией. Hародам земли всей испроси благоденствие и мирное житие, дух смиренномудрия и братолюбия, добронравия и спасения, дух страха Божия. Да не злоба и беззаконие ожесточают сердца людския, могущия истребити любовь Божию в человецех и низвергнуть их в богопротивныя вражду и братоубийства, но в силе Божественныя любве и правды, якоже на Hебеси и на земли да святится имя Божие, да будет воля Его святая в человецех, и да воцарятся мир и Царствие Божие на земли. Такожде и земному Отечеству твоему — земли Российстей испроси, угодниче Божий, вожделенный мир и небесное благословение, во еже, всемощным омофором Матере Божия покрываемому, избавитися ему от глада, губительства, труса, огня, меча, нашествия иноплеменников и междоусобныя брани и от всех враг видимых и невидимых, и тако святейшим домом Преблагословенныя Богородицы до скончания века ему пребыти Креста Животворящаго силою и в любви Божией неоскудеваему утвердитися. Нам же всем, во тьму грехов погружаемым и покаяния тепла, ниже страха Божия не имущим и сице безмерно любящаго нас Господа непрестанно оскорбляющим, испроси, о всеблаженне, у Всещедраго Бога нашего, да Своею Всесильною благодатию божественне посетит и оживотворит души наша, и всяку злобу и гордость житейскую, уныние и нерадение в сердцах наших да упразднит. Еще молимся, о еже и нам, благодатию Всесвятаго Духа укрепляемым и любовию Божиею согреваемым, в человеколюбии и братолюбии, смиренномудрии и молитвенном сраспинании друг за друга и за всех, в правде Божией утвердитися и в благодатней любви Божией благонравно укрепитися, и сынолюбне Тому приближитися. Да тако, творяще Его всесвятую волю, во всяком благочестии и чистоте временнаго жития путь непостыдно прейдем и со всеми святыми Небеснаго Царствия и Его Агнчаго брака сподобимся. Ему же от всех земных и небесных да будет слава, честь и поклонение, со Безначальным Его Отцем, Пресвятым и Благим, и Животворящим Его Духом, ныне и присно, и во веки веков. Аминь. |
|
|
|
|
|
|
