Богослужебные тексты, службы (видео и текст)
» Канон св. мч. младенцу Гавриилу Белостокскому
к Дискуссиям
|
Канон св. мч. младенцу Гавриилу Белостокскому
Память празднуем 20 апреля (3 мая) Тропарь, глас 5-й Святый младенче Гаврииле, ты за Прободеннаго нас ради от иудей люте от онехже в ребра прободен был еси и за Истощившаго кровь Свою за нас все тело твое на истощение крове в лютыя язвы предал еси, ныне же во славе вечней с Ним вселился еси. Тем помяни и нас, молим, зде чтущих память твою, прося нам здравие телеси и спасение душам нашим. КАНОН, глас 4-й Песнь 1 Ирмос: Лицы израильтестии невлажными стопами понт Чермный и влажную глубину прогнавше, всадники тристаты, враги, видяще в ней погружены, с веселием пояху: поим Богу нашему, яко прославися. Припев: Святый мучениче младенче Гаврииле, моли Бога о нас. Младенче и мучениче, чудотворче и болезней целителю, Гаврииле, угодниче Христов, достойными словесы твоя подвиги восхвалити недоумею, обаче твоего терпения и незлобия красотою умиляюся, сих дарований причастника и мене покажи, твоего молитвенника. Святый мучениче младенче Гаврииле, моли Бога о нас. Людие российстии от иудей умученнаго младенца видевше, от псов же несмысленных, яко сокровище, охраняема, взываху: Господи, того молитвами помилуй нас. Слава: Анна смиренномудренная, Гавриила мученика мати, со отцем его Петром трудолюбивым слезы на радость преложиша, своего отрочате уведевше неувядаемую славу. И ныне: Жезл Ааронов прозябший, иже от Иессея преображаше израстший корень, Тя, Пречистую, цвет миру возсиявшую, Бога воплощенна, Егоже о нас молящи не престай, Приснодево, прибегающих к Тебе. Песнь 3 Ирмос: Яко неплоды роди от язык Церковь, и многое в чадех изнеможе сонмище, чудному Богу нашему возопиим: Свят еси, Господи. Святый мучениче младенче Гаврииле, моли Бога о нас. Добро было бысть вам не родитися, нечестивии мучителие, зане отраднее будет Содому и Гоморру в День Судный, неже Христова исповедника убийцем. Того молитвами, Господи, утверди православных веру. Святый мучениче младенче Гаврииле, моли Бога о нас. Егда подписание, еже о твоем мучении, от иудеев бывшем, мучениче, сотвориша судии заблудовстии, тогда истерзанное тело твое земле благочестно предаша людие. Но прошедшим тридесятим летом тоежде тлению непричастно обретоша и Господне о тебе промышление прославиша. Слава: Нищим и обидимым близ есть Господь: Той бо, от нищих родителей отъяти чадо попустив нечестивым, паче царей земных безчадныя прославляет, зане и царие и святителие тех отрочати молитвенно преклоняют колена. И ныне: Яко носиши на руку, Марие, и от сосцу питаеши Питающаго всякое дыхание, Егоже, Богородице, чтуще, проповедаем: молися Ему, Чистая, о всех нас. Господи, помилуй (трижды). Слава, и ныне: Седален, глас 8-й О, каковая мучения твоя, отроча, Богу возлюбленное! О, каковая терпения твоего крепость, избодение бо, и медленное крове испущание, и плоти твоея раздирание за Христа приял еси, но Того ради заступник о страждущих младенцех у Христа Бога являешися, матери твоея безчадствованней бывшей, всем матерем, о чадех молящимся, утешитель бываеши и молишися присно о спасении душ наших. Песнь 4 Ирмос: Услышах Твое, Христе, воистинну преславное, яко безсмертен сый Бог уподобися смертным человеком и пребысть, еже бе, и того ради Твою славлю силу. Святый мучениче младенче Гаврииле, моли Бога о нас. Царем и мучителем преклониша выи своя на убиение древнии мученицы, тех подобник бысть Гавриил младенец, кровь свою неповинную на истерзание отдав иудеом жестокосердым. Господи, того молитвами вложи ревность о славе Твоей в души наша. Святый мучениче младенче Гаврииле, моли Бога о нас. Аще и в темней погребнице заключиша тебе иудее, о мучениче, аще и страшными муками тебе умертвиша, но абие во светлый чертог Господень дух твой, радуяся, вселися, идеже со Ангелы о славе Господней днесь ликует. Слава: Милостив буди к моим немощем, мучениче святый Гаврииле, моего малодушия не возгнушався, прощение ми от Господа испроси, иже себе за веру Его не пощадивый и в младенчестем телеси Того прославивый. И ныне: Тебе, Приснодевую и воистинну едину Богородицу, славим, Юже прообразоваше Боговидцу Моисею неопально, Пречистая, купина, огню примесившаяся. Песнь 5 Ирмос: Просвещение Твое, Господи, низпосли нам и от мглы прегрешений разреши ны, Блаже, Твой мир даруяй. Святый мучениче младенче Гаврииле, моли Бога о нас. Образ злострадания Гавриилова приимем, братие, и своего о вере нерадения устыдимся, от убивающих тело не убоимся, но Имущему власть по убиении в геенну огненную ввергнути, Тому со страхом повинимся, страстотерпца святаго в помощь призывающе. Святый мучениче младенче Гаврииле, моли Бога о нас. Люта есть мука, но сладок рай, болезненно на земли безчадие, но неисчерпаемо утешение наше, – родителя Гавриилова взываху, – от земных бо печалей чадо наше к вечной радости преселися. Слава: Иже о болезнех и муках чад своих скорбяще, родителие, с верою ко гробу Гавриилову припадите, есть бо заступник о них пред Христом, яко кровь свою за исповедание истинныя веры излиявый. И ныне: Мучителей разум девственное посрами чрево: Младенец бо язву аспидную душегубную испыта рукою и, отступника гордаго низложив, верным под нозе покори. Песнь 6 Ирмос: Возопи, прообразуя погребение тридневное, пророк Иона, в ките моляся: от тли избави мя, Иисусе, Царю Сил. Святый мучениче младенче Гаврииле, моли Бога о нас. Твоих раб моления не отвержи, младенче премудре, твоею славою умиляющихся и твоя подвиги со умиленным сердцем воспевающих, аще терпения твоего не стяжавших, но исправити житие свое желающих. Святый мучениче младенче Гаврииле, моли Бога о нас. Всяческих сокровищ, имиже земля украшается: злата, и бисера, и камений многоценных, честнейша суть святых угодников нетленныя мощи, ими бо благодатная сила Божия действует, сия убо нам испроси, угодниче Христов, во исцеление душ и телес наших. Слава: Аще и многая гонения православнии христиане от иудей и от еретик прияша, окрест славныя обители твоея живущии, обаче стояние твое о истинней вере вспоминающе, от прославления истиннаго Бога и твоего предстательства никакоже отпадоша. И ныне: Древле убо прельсти мя змий и умори мя праматерию моею Евою, ныне же, Чистая, Тобою Создавый мя из нетления воззвал есть. Господи, помилуй (трижды). Слава, и ныне: Кондак, глас 6-й Отечество твое Зверки бысть, мучениче Христов Гаврииле, идеже от истых зверей иудеев восхищен: абие родителей лишен еси, поряду люте претерпев, в Отечество Небесное преселился еси. Восхищай и нас зде от всяких напастей и скорбей и умоли, молим тя, улучити вечное наследие твое. Икос Прославим, братие, Гавриила младенца, о Христе злострадания приявшаго, той бо, яко ягня незлобивое, льстивому иудею последовав, из дома отча восхищен бысть и в темную погребницу ввержен, ужасная же терзания и избодение плоти своея претерпев надолзе, яко жертва чистая Троице принесеся и многая заступления о молящихся ему чрез многая лета показует, вся приходящия в церковь его зраком нетленнаго телесе своего умиляя. Тому убо возопиим: умоли, молим тя, улучити и нам вечное наследие твое. Песнь 7 Ирмос: Авраамстии иногда в Вавилоне отроцы пещный пламень попраша, песньми взывающе: отец наших Боже, благословен еси. Святый мучениче младенче Гаврииле, моли Бога о нас. Матерей скорбящих утешителю, младенцев болящих целителю, Гаврииле, угодниче Христов, душу мою, скорбящую о гресех своих, утеши и исцели и сию над плотию госпожу молитвою твоею соделай, своея плоти Христа ради не пощадивый. Святый мучениче младенче Гаврииле, моли Бога о нас. Или не разумеете, нечестивии иудеи, яко Бога отец ваших врага себе соделоваете, Того создание неповинное люте терзающе и сицевым деянием приносити ему службу мняще, безумнии. Господи, Гавриила молитвами чад их сердца умягчи и сердца наша от сицевыя лютости избави. Слава: Слуцк град воистинну блажен есть, тамо бо прошедшим пятидесятим шестим летом положися мученика Гавриила нетленное тело, тамо до днесь слезы, молитвы и благодарения пред гробом его от матерей о чадех своих изливаются и всех верующих приемлются моления. И ныне: Превышши тварей всех еси, яко Творца рождши и Господа. Темже Ти вопию, Богородице: Благословенная, Господь Сил с Тобою. Песнь 8 Ирмос: Радующеся по осуждении мучительском отроцы, яко да не богам скверным, послужат всем, но живому Богу, на огнь дерзнуша, от Ангела же орошаеми, песнь пояху: дела Господня, Господа пойте и превозносите во вся веки. Святый мучениче младенче Гаврииле, моли Бога о нас. Птицы сыроядцы, над истерзанным телом мученика реюще, и пси гладнии, сия отражающе и тело мученика храняще, обличителие злодеяния иудейскаго явишася, слава же святаго немии проповедницы. Святый мучениче младенче Гаврииле, моли Бога о нас. Аще и зверие глада своего о святем телесе утолити не дерзнуша, како убо злоба иудеев тем насыщашеся? Како тии, чудо зряще, не покаяшася? Зри, о душе моя, сих ожесточение, и ужаснися, и святому сему помолися, да от всякия злобы тебе выну ограждает. Слава: Слезы умиления о подвизе и о славе младенца и мученика проливающе, братие, своего окаянства восплачим и своего нерадения устыдимся: аще бо тако Богу угоди младенец малый, почто мы, мужие, сущи о сем небрегохом? И ныне: От ребра Адамова создавый Тя, от Твоего девства воплотися, Иже всех Господь, Егоже поюще, вопием: вся дела, благословите, пойте Господа и превозносите во вся веки. Песнь 9 Ирмос: От земнородных рождшися и Творца рождшая, наша похвало, Богородице Чистая: Тя яко владычествующую тварьми, величаем. Святый мучениче младенче Гаврииле, моли Бога о нас. И ныне, угодниче Божий Гаврииле, о народе российстем буди пред Господом предстатель, якоже древле: тогда бо от иудей и еретик мучения христиане приимаху, ныне же от обою соблазном вдаются люте, темже твоего стояния даруй нам память и о подражании тебе ревность благую. Святый мучениче младенче Гаврииле, моли Бога о нас. Мысленнаго убийцу души моея, сию поглотити ищуща, побеждати помози ми, Божий угодниче, тело свое на истерзание предавый, но душу свою непорочну от тех устрашения сохранивый и Христу, аки дар честен, страдания своя принесый и сего ради от Него благодать приявый, во еже молитвы наша Престолу славы Его присно возносити. Слава: Язвы, на твое младенческое тело от иудей возложенныя, язвы врагу спасения нашего явишася, демонов победителю, Гаврииле блаженне, от ихже мучительства избави души наша и над тех искушений победители предстательством твоим яви нас. И ныне: От земнородных возрастши и Зиждителя рождши, радуйся, наша похвало, Богородице Чистая, Тя, яко обладающую тварьми, величаем. Молитва мученику младенцу Гавриилу Белостокскому Младенческаго незлобия хранителю и мученическаго мужества носителю, Гаврииле блаженне, страны нашея адаманте драгоценный и иудейскаго нечестия обличителю! К тебе мы, грешнии, молитвенно прибегаем и, о гресех своих сокрушающеся, малодушия же своего стыдящеся, любовию зовем ти: наших скверн не возгнушайся, чистоты сый сокровище, нашего малодушия не омерзи, долготерпения учителю, но паче сих немощи наша от Небес видя, тех исцеления нам твоею подаждь молитвою и твоея Христу верности подражатели нас быти научи. Аще ли терпеливно крест искушений и злостраданий понести не возможем, обаче и тогда милостивыя твоея помощи не лиши нас, угодниче Божий, но свободу и ослабу нам у Господа испроси. Таже и молящияся о чадех своих матери услыши, здравию и спасению младенцем от Господа податися умоляяй. Несть таковаго жестокаго сердца, еже слышанием о муках твоих, святый младенче, не умилится, и аще кроме сего умиленнаго воздыхания никоегоже благаго деяния принести возможем, но и таковым умиленным помыслом наши умы и сердце, блаженне, просветив, на исправление жития нашего благодатию Божиею нас настави. Вложи в нас о спасении души и о славе Божией ревность неустанную и о часе смертнем память неусыпную хранити помози нам. Наипаче же в смертном успении нашем терзания демонская и помыслы отчаяния от душ наших предстательством твоим отжени и сия упованием Божественнаго прощения исполни, во еже и тогда и ныне славити нам милосердие Отца, н Сына, и Святаго Духа, и твое крепкое заступление во веки веков. Аминь. Величание Величаем тя, страстотерпче святый младенче Гаврииле, и чтем честная страдания твоя, яже за Христа претерпел еси. |
|
|
|
|
|
|
