Богослужебные тексты, службы (видео и текст)
» Канон пред Ахтырской иконой Пресвятой Богородицы
к Дискуссиям
|
Канон пред Ахтырской иконой Пресвятой Богородицы
 Празднуем 2 (15) июля Тропарь, глас 4-й Преблагословенная Дево, Богородительнице Чистая, у Креста Сына Твоего и Бога нашего предстоящи, скорбь велию претерпела еси и благодать от Него прияла еси сущия в скорбех утешати. Темже на пречистый образ Твой благоговейно взирающе и изображенную Тя на нем пред Крестом Спаса нашего видяще, умиленно к Тебе вопием: Заступнице Усердная, благая и милостивая! Ускори избавити ны от всякия скорби, нужды и болезни и спаси души наша, да Тя со благодарением славим во веки. Канон, глас 4-й Песнь 1 Ирмос: Отверзу уста моя, и наполнятся Духа, и слово отрыгну Царице Матери, и явлюся, светло торжествуя, и воспою, радуяся, Тоя чудеса. Припев: Пресвятая Богородице, спаси нас. Даждь нам слово, Слове Божий, Иисусе Всеблагий, воспети радостное явление иконы рождшия Тя Богоневесты и преславная Тоя чудеса, в нихже сила Твоя Божественная славно прославися. Пресвятая Богородице, спаси нас. О, предивнаго Твоего чудесе, Владычице, и многаго милосердия к людем: се бо икону Твою честную в былии травном солнцеподобным сиянием иерею благоговейну являеши днесь и исцелений множество от нея источаеши недужным, яко Всемилостивая. Слава: Ты, о Богомати, рождшая Претерпевшаго нас ради на древе Крестнем распятие, умоли Его благость, еже страдание Его всегда памятовати, волю же Его Божественную творити и благ Небесных наследники быти. И ныне: Владычице Всеблагая, умоли Сладчайшаго Сына Твоего и Господа, рукописание грех наших на Кресте пригвоздившаго, да сподобит нас достойно одесную Его стати и глас благий Его слышати, егда приидет во славе Своей. Песнь 3 Ирмос: Твоя песнословцы, Богородице, Живый и Независтный Источниче, лик себе совокупльшия, духовно утверди, в Божественней Твоей славе венцев славы сподоби. Пресвятая Богородице, спаси нас. Во образе невесты явилася еси во сне, Богородице, обретшему икону Твою иерею Даниилу, лице Твое на иконе омыти водою повелевающи, и сия, яко врачевство Богоданное, во исцеление недужным явися. Пресвятая Богородице, спаси нас. В скорбех многих и гонениих скончати жизнь временную обретшему икону Твою иерею судила еси: да, яко злато, в горниле скорбей очистився, достоин явится блаженнаго в вечности упокоения. Слава: Омраченных нас грехи многими, о Мати Божия, просвети и на стезю спасительную покаяния направи, отверзи очи наша душевная, якоже очи телесная слепой жене и слепому отроку пред иконою Твоею отверзла еси, да узрим свет спасения и имя Твое прославим святое во веки. И ныне: Страстей нечистых беснование обуревает нас, Госпоже Всемилостивая, и иныя Помощницы, разве Тебе, Всеблагая, не имамы, от сего душегубительнаго беснования избави нас, якоже многия беснуемыя от насилия вражия пред иконою Твоею свободила еси, яко Всесильная. Господи, помилуй (трижды). Слава, и ныне: Седален, глас 4-й Яко воистинну Божественное украшение Церкви и залог милости Твоея к христоименитым людем икона Твоя, Богородице Дево, показася: всяк бо, с верою к ней приходяй, в недузех исцеление, в скорбех утешение, в бедах вспоможение от Тебе скоро приемлет, Всемилостива бо сущи, милости Твоея источник в чудотворнем образе Твоем нам зде являеши, да славим имя Твое преблагословенное во веки. Песнь 4 Ирмос: Седяй в Славе на Престоле Божества во облаце легце, прииде Иисус Пребожественный Нетленною Дланию и спасе зовущия: слава, Христе, силе Твоей. Пресвятая Богородице, спаси нас. Единаго возлюбити Христа сподоби нас, Владычице, и Ему присно угождати Сама научи нас, Всеблагая, якоже болящую Евфимию, во сне той явльшися, ко храму Твоему приити наставила еси и в нем исцеление недугом просити. Пресвятая Богородице, спаси нас. Житие непорочное на земли совершити помози нам, Преблагословенная Дево, и от разслабления греховнаго рукою Твоею державною свободи нас, якоже зело разслабленнаго Моисея пред иконою Твоею исцелила еси преславно. Слава: Ты, о Благодатная, в милостивом явлении чудотворнаго Твоего образа страну нашу благодатно посетила еси и ныне чудотвореньми, от него бываемыми, нас посещаеши, ихже множество исчести невозможно, но, елико мощно, сия благодарне во славу Твою исповедуем. И ныне: Благочестно отвсюду, о Богомати, к чудотворней иконе Твоей притекающия и усердно покланяющияся милостей Твоих и щедрот не лишаеши, от бед сия спасающи, от недуг избавляющи, духи лукавыя от них прогоняющи, утешение же и здравие всем подающи, яко Всеблагая. Песнь 5 Ирмос: Ужасошася всяческая о Божественней славе Твоей: Ты бо, Неискусобрачная Дево, имела еси во утробе над всеми Бога и родила еси Безлетнаго Сына, всем воспевающим Тя мир подавающая. Пресвятая Богородице, спаси нас. К Твоей, Дево, прибегаем благости и очи сердец наших к Тебе, Чистая, возводим: не презри воздыханий наших молитвенных, но буди нам покров и Помощница в День судный. Пресвятая Богородице, спаси нас. Едина всем еси Предстательница, Богомати Владычице: услыши убо наша моления, пред чудотворным образом Твоим днесь приносимая, и сподоби нас в будущем веце узрети Тя купно с Сыном Твоим, на облацех во славе грядущим, и глас Божественный Его слышати, призывающий в Царство Небесное. Слава: Земля Российская явлением чудотворнаго Твоего образа, Владычице, освятися, и град малый велик и знаемь по благодати Твоей во всех концех явися: в нем бо драгоценное сокровище блюдется – Твоя целебная икона, залог сый Твоего к нам благоволения. И ныне: Лютыми помышлении от лукавых враг стужаемых нас не остави погибнути до конца, Богородительнице: трепещут бо силы Твоея дуси тьмы и боятся имене Твоего, якоже многажды у иконы Твоея чудотворныя сия изъявишася. Ихже злодейства и нас избави, упование на Тя возложивших. Песнь 6 Ирмос: Божественное сие и всечестное совершающе празднество, Богомудрии, Богоматере, приидите, руками восплещим, от Нея рождшагося Бога славим. Пресвятая Богородице, спаси нас. Освящение, здравие и спасение душам и телесем нашим, Мати Божия, от святыя Твоея иконы подаеши, ейже благочестно покланяемся и усты и сердцем благоговейно сию целуем, Твоя чудеса и неисчетную милость к христианскому роду присно славяще. Пресвятая Богородице, спаси нас. Кое благодарение принесем Ти, Богородице, яко в последняя лета таковаго дара сподобила еси нас, даровавши нам многоцелебную Твою икону? Тем убо, о Всеблагая, о таковей неизреченней милости достойно благодарити Тя Сама нас научи. Слава: Боголепное явление Пречистыя иконы Твоея, Владычице, новое явление Божия благодати, Православной Церкви присущей, в посрамление ересей и расколов показася и яко новое утешение свыше всем православным и верным ей сыном подается. И ныне: Мати Божия милосердая, милости Твоея двери отверзи нам, озари нас светом Божественныя благодати Твоея и от мысленных волков соблюди нас невредимых, в Православии нерушимом сподобивши нас благоугождати Сыну Твоему и Богу и прияти живота конец благий. Господи, помилуй (трижды). Слава, и ныне: Кондак, глас 8-й Притецем, вернии, к благодатному милостей и щедрот источнику – чудотворному Пречистыя Девы образу: сей бо нам свыше даровася, душам и телесем во спасение, емуже покланяющеся с любовию, возопием к Богородице: о Всепетая Мати, о Царице Всемилостивая, покрый и соблюди нас от всякаго зла Твоим к Богу матерним предстательством. Икос Преславное явление иконы Твоея, Богородице, радости исполни сердца верных сынов Православныя Церкве: царие бо и святители о сем возликоваша, и вси людие утешения Небеснаго исполнишася, яко в последняя наша времена таковый дар Божия благодати России свыше дарован бысть Твоим благопромышлением, Владычице. Молим убо Твою благость, умильно к чудотворному Твоему образу припадающе: спасай всех нас от всякаго зла Твоим к Богу матерним предстательством. Песнь 7 Ирмос: Не послужиша твари Богомудрии паче Создавшаго, но, огненное прещение мужески поправше, радовахуся, поюще: препетый отцев Господь и Бог, благословен еси. Пресвятая Богородице, спаси нас. Вдовиц заступление и сирот Покровительнице, Владычице Пречистая, некия умирающия матере молитву о чадех ея услышала еси и, паче надеяния сиротствующия дщери ея благоустроила еси, яже славити навыкоша милость Твою по вся дни живота своего. Пресвятая Богородице, спаси нас. Извещение от Тебе, Богородице, благочестивая императрица Елисавета приимши, сиротствующия две отроковицы под кров своего попечения восприят, Твою же икону честную зело возлюби и новый храм вместо ветхаго от щедрот своих царских благолепно сооруди. Слава: Известная верных еси Помощница и всяких благ Подательница, Пречистая Дево, иконою бо Твоею чудотворною неисчетныя милости просящим подаеши и вся спасаеши, иже Тебе верно вопиют от души: помилуй и спаси нас, Владычице. И ныне: Мати Божия Всеблагая, милосердых щедрот Твоих не лиши нас, обнищавших во гресех, и от челюстей мысленнаго волка исхити души наша, да не погибнем до конца, но приносим присно плоды покаяния Богу. Песнь 8 Ирмос: Отроки благочестивыя в пещи Рождество Богородичо спасло есть; тогда убо образуемое, ныне же действуемое, вселенную всю воздвизает пети Тебе: Господа пойте, дела, и превозносите Его во вся веки. Пресвятая Богородице, спаси нас. О, преславных чудес Твоих, Владычице, и многаго Твоего к человеком сострадания: единым бо прикосновением к иконе Твоей немощныя врачуеши и издалече, в сониих и видениих, к ней требующих Твоего заступления призываеши. Пресвятая Богородице, спаси нас. Вода освященная и елей от лампады иконы Твоея святыя недуги неисцельныя, Богородице Дево, врачуют и оныя с верою приемлющим во исцеление и спасение бывают; сего ради Тя, Целительницу, ублажаем и чудеса Твоя, от иконы Твоея явленная и присноявляемая, славим. Слава: Воспети пречистаго образа Твоего явление сподоби нас, Владычице, и пений наших хвалебных, Тебе от усердия возносимых днесь, не презри, но приими, Всепетая, молитвы раб Твоих и подаждь нам в нуждах и бедах помощь Твою державную и Твоего заступления благодать. И ныне: Днесь радости исполнила еси нас, Богородице, явивши нам икону Твою святую дивно, на нюже взирающе и с любовию ей покланяющеся, Тебе сице вопием: Мати Божия, спаси град и страну явлением иконы Твоея прославленныя и вся ны помилуй, яко милосердая Предстательница. Песнь 9 Ирмос: Всяк земнородный да взыграется, Духом просвещаемь, да торжествует же Безплотных умов естество, почитающее священное торжество Богоматере, и да вопиет: радуйся, Всеблаженная Богородице, Чистая Приснодево. Пресвятая Богородице, спаси нас. Явление предивныя иконы Твоея, Мати Божия, славословим радостно: сия бо, в былии травном светом Божественным сияющая, явися и чудес множество сотвори, яко воистинну Твоего к нам благоволения залог Богодарованный. Пресвятая Богородице, спаси нас. Яко звезда светозарная, икона Твоя, Пресвятая Богородице Дево, явлением своим Церковь Российскую благодатно озари: лучи бо чудес испущает и верныя души к славословию Бога, всельшагося в Тя, приводит, яко Тобою падшему человечеству благодеющаго. Слава: Единаго от Троицы нетленно, рождши, Богородительнице, матернее к Нему дерзновение имаши: слышит, бо молитву Твою Сын Твой и Бог и милостивно к прошению Твоему приклоняется, Егоже не престай молити за род христианский, присно в песнех Тя славящий. И ныне: Приими наша хвалебныя гласы, Владычице, и пение смиренное не отвергни, но, яко Сын некогда Твой две лепте вдовицы прият, тако и наше славословие благоугодно да будет пред Тобою. Слава Тебе, Богородице Дево, иконою Твоею честною преславная чудеса творящей, слава Тебе. Молитва О Преблагословенная и Многомилостивая Владычице мира! Се мы грешнии на святый образ Твой взирающе и на нем Тя в скорби и сострадании распятому за нас Христу Спасителю предстоящу видяще, усердно молим Тя известную о нас к Сыну Твоему молитвенницу: не остави нас в день испытания и скорби, но во искушениих и напастех нам бываемых огради нас всечестным покровом Твоим от враг видимых и невидимых и даждь нам силу, во еже всесовершенную и благую волю Творца и мира Владыки творити. Зриши бо, милостивая Заступнице наша, колико грехам всяческим подвержени есмы: не токмо бо волею согрешаем, но и неволею в многоразличныя прегрешения впадаем. Сего ради к Тебе державней устроительнице спасения христианскаго прибегаем и умиленно вопием: ум наш познанием Божественныя истины просвети, сердце наше теплотою христианския любви и спасительных желаний согревай, волю же нашу в нелицемерном заповедей Господних исполнении утверди. Ей, Госпоже Премилостивая, приникни с высоты небесныя к воздыханием и молитве нас грешных: исцели болезни недужных, умири сердца озлобленных, даждь терпение страждущим, внуши страх Божий обидящим, укрепи гонимыя за правду, сироты и вдовы защити, подаждь утешение плачущим, испроси прощение кающимся, демонскую же бурю страстей во грешных душах утиши и в сердцах чтущих Тя Христову кротость и любовь вкорени и духом милосердия и сострадания сия утверди; отпадшыя же от веры еретики и отступники к познанию истины направи и уста нечестивых, хулящих Святую Церковь и веру православную поносящих загради. Отшедшим от жития сего отцем и братиям и сестрам нашим, о Мати Божия, прощение грехов и предначатие блаженства вечнаго испроси. Егда же и нашея кончины час приближится, тогда убо, о Владычице, приими душу нашу и в сонме праведных сию упокой, идеже лици Ангел и святых угодник немолчно славословят державу и милость Отца и Сына и Святаго Духа и Твое матернее о нас предстательство и заступление, ныне и присно, и во веки веков. Аминь. |
|
|
|
|
|
|
